Matewuji 18:1-35
18 Mudhidhi yole, anamaharaye omwaddamela Yesu ni omukoha yegihina: “Mwebaribarene munlubaleya a Mumweneni wodhulu baani?”
2 Vano oliye omwithana mwaana ompweha vaari vewa
3 ni owoga egihina: “Ginowuwaddelani ebaribari mwahisaddula murima dhenyu mukala ninga anamwani, kamunande ovolowa Mumweneni wodhulu.
4 Bumwahaya ole aniyeviha ninga mwaana diyoyo ali munlubaleya Mumweneni wodhulu;
5 teto muthu yole anamwakela mwaana ninga yola ni ndina naaga anogakela ni miyoya.
6 Mbwenye ole anaamukwakwathuse mmodha wa ola anagiroromela, yakale yapama ommagelela mukohini mwaaye nibwe ninlubale amusilana buru tirigu, vano avokedhiwe muniya addaddele mommo.
7 “Ginowakubanyedha athu amwilaboni mwaha wowakwakwathusa athu amodha! Mwebaribarene yere okalawo athu amodha yaakwakwathuse* amodha, mbwenye ginowakubanyedha athu yayo enakwakwathusa athu amodha!
8 Akala nlada nawo obe nnyalo nawo nnowukwakwathusa, ogwaddewo ni orahilele wolapela. Sapama ovolowa ni egumi ogaddibwaga obe ooragalene, ohiya ovokedhiwa maladawo aamenlene obe manyalo awo aamenlene othukuthani wa mootho ohunathima.
9 Teto ninto naawo nukwakwathusaga, ovenyihemo orahilele wolapela. Sapama ovolowa ni egumi nninto nimodha ohiya ovokedhiwa oJhehena onahidda mootho ni mento awo aamenlene.
10 Mukale pasope wihina munaamulamuse mmodha wa athu yala ang’ono, miyo ginowuwaddelani wihina angero ewa eli odhulu enosugwa malabo amatene kove ya Ababa enakala odhulu.
11 ——
12 “Nyu munoonamo aavi? Namakukula anna mambila 100 vano nimodha nnorimela, kanahiya 99 omwangoni vano anodhowa osayela nne nirimele?
13 Ginowuwaddelani ebaribari, oliye afwanya anoothabwa ohagalala ohiyana naale 99 ehirimele.
14 Nimakalelo mamodhave, Ababa eli odhulu kinafuna newene mmodha wa athu yala ang’ono orimela.
15 “Ohiya eyo, ddibilo erana yothega, odhowe wamonihe yothega eriliyena, we nuliye baahi, uvuruwana woomobola ddibilo.
16 Mbwenye ahuvuruwana omuthukule muthu mmodha obe abiili, mwaha onamoona waathu abiili obe araru, munowanda otxokotxela pama muladduya.
17 Oliye ahuvuruwanani, muwoge ni mulogo, teto ahivuruwana ni mulogoya omoonege ninga muthu amwilaboni ni namakukusa musoko.
18 “Ginowuwaddelani ebaribari: Dhatedhene munamaginyu elabo yavati dhinere omagiwa elabo yodhulu, teto dhatedhene munatapulinyu elabo yavati dhinere otapuliwa elabo yodhulu.
19 Teto ginowuwaddelani ebaribari ela: Nyu athu abiili munakala elabo yavati, mwiwananela oloba ethu yathima, munere ovahiwa Nababa eli odhulu.
20 Mwaha vili athu abiili obe vili athu araru egatugumane mwa ndina naaga, miyo ginakala vaari vewa.”
21 Vano Peduru omwaddamela Yesu ni omukoha egihina: “Nabwiya, ddibilaga agithegela gimulevelele dila ngasi? Gimulevelele dila 7?”
22 Yesu omwakula egihina: “Miyo kaginuwaddela dila 7 baahi, mbwenye okunamo dila 77.
23 “Bumwahaya Omwene wodhulu onaladdanihiwa ni mwene awithanihe anamalabaye wihina aakukuse mangawu.
24 Nubajha wakukusa, odhiwana mulobwana ambolihe korowa dhowakwana 10 000 talentu.
25 Mbwenye woona wihina kanna ethu wihina alivena mangawu ale, nabwiye oruma wihina oliye, mwariye, anaaye ni dhithu dhatedhene anniyena dhigulihiwe wihina eliviwe mangawu ale.
26 Vano mudhaari ole okokora ni ompigiriyela egihina: ‘Mugeddele thagaraga, ginere wulivani dhatedhene.’
27 Mwaha womweddela thagaraga nabwiya amudhaari ole, omwihiya odhowaga ni omulevelela mangawu anniyena.
28 Vano mudhaari ole omaruwa, odhowa ogumana ni mudhaari mukwaye, yoyo ambolihe korowa dhowakwana 100 denariyu, vano oliye omuhidda mmilo, wambela omuhoga egihina: ‘Gilive korowadhaga ogibolihewe.’
29 Nuwindo mudharaaye omukokorela ni omuloba egihina: ‘Kagikurumuweleni miyo ginere oliva korowa dhenyu.’
30 Mbwenye oliye okoodda. Ohiya eyo, oliye onvokedha mukambura ofiyedha omuhogolosela mangawu anniyena.
31 Vano adhaari akwaye nuwoona dhaapadduwe, aliwa okwerebeya vanlubale, odhowa omwaddela nabwiya ewa dhatedhene dhereye.
32 Nabwiye omwithana ni owoga egihina: ‘Mudhaari abure, we nugiloba miyo gihulevelela mangawu amatene wanniwena.
33 Ninga miyo guweddelimi thagaraga, we kuwerena emodhave, omweddela thagaraga mudhaari mukwawo?’
34 Vano nabwiye nutakaleliwa, omuthukula wavahedha anamasugwera kambura ofiyedha oliva dhatedhene aboliheye.
35 Ababa oodhulu enere wuwerelani emodhave kadda muthu wa nyu ahimulevelelaga ddibile ni murima watene.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Wathukulela amodha oyelela nroromelo.”
