Matewuji 20:1-34
20 “Omwene woodhulu onaligana ni mwinnya a mundda avennye mambesi adhowaga wasayela anamalaba wihina yalabe mmunddani mwaaye mwa uva.
2 Nuwiwananela nanamalabaya waaliva denariyu modha kadda labo, vano waruma wihina yalabege mmunddani mwaaye mwa uva.
3 Aakwanaga 9 wora a mambesi, ovenya wawona amodha egimenle vamerkadu ehaparaga mabasa,
4 Oliye owoga naliwa egihina: ‘Ni nyunwa kadhowani mwalabege omunddani waga wa uva, ginere wuvahani korowa munafwanelelinyu.’
5 Vano aliwa odhowa. Oliye ohogolowelawo mawora a 12 ni a 15 ni werana emodhave.
6 Omagomihedhowa ohogolowelawo mawora a 17, wafwanya amodha egimenle mburo mmodhave yole, oliye wakoha egihina: ‘Mwahaya bwaddi mudhe mwimelege vevala nduwa nantero muhaparaga mabasa?’
7 Aliwa wakula yegihina: ‘Kaavo anithanele mabasa.’ Oliye wawerela egihina: ‘Ni nyunwa kadhowani mwalabege omunddani waga wa uva.’
8 “Vati viribaga, mwinnya ole a mundda wa uva owoga nnamaholelaya a mabasa egihina: ‘Kawithane anamalaba aatene ni walive korowa dhewa, wambele naale eli ogomihedha ni ogomihedhe naale eli owambela.’
9 Alobwana ale yavolowile mawora a 17 nufiya, kadda muthu wakela korowa modha ya denariyu.
10 Mowindo owambela nuufiya wubuwelaga wihina yere wakela okunamo, mbwenye naaliwaya kadda muthu wakela korowa modha ya denariyu.
11 Nuumala wakela aliwa wambela oroga vamentoni va mwinnyaya
12 yegihina: ‘Alobwana ala ogomihedha elabile wora modha baahi, naari dhigarive ndo iyo nilabile labo nantero vanduwani munanivaha emodhave!’
13 Mbwenye oliye omwakula mmodha wa aliwa egihina: ‘Mulobwana, miyo kaginowujhela. Iyo kaniwananile wihina ginuvaha korowa modha ya denariyu?
14 Kahisa eli yawo odhowege. Miyo ginafuna ginvahe ogomihedha ola emodhave guvahelemi.
15 Miyo kaginna ofuru wowerana dhithu ginafunimi ni korowa dhaaga? Obe we onna nrima mwaha miyo wawerela aliwa opama?’
16 Nimakalelo yala, oogomihedha enakale owambela, teto owambela enakale oogomihedha.”
17 Adhowaga oJeruzale Yesu wathukula anamaharaye 12 wawithanela okwibi ni wawaddela egihina:
18 “Nvuruwane, nnadhowa oJeruzale, Mwaana Muthu anere opelekiwa mmadani mwa anddimuwa aanamakutha ni anamaleba. Aliwa enere omuthonga wihina apiwe
19 ni enere ompeleka mmadani mwa athu a malogo wihina emunyemule, emutxapule,* ni empele vantxikwani, vano labo nanatharu avenyihiwe.”
20 Mwariye Zebedewu vamodha naanaaye aanalobwana okokora vamentoni va Yesu, omuloba ethu.
21 Oliye omukoha egihina: “Onafuna ddi?” Oliye wakula egihina: “Ginaloba wihina anaaga ala aabilene ekarati mumweneni mweenyu mmodha moono woojha, mmodha moono weemara.”
22 Yesu omwakula egihina: “Nyu kamunonne ethu munalobinyu. Nyu munere wanda ong’wela kopo modhave ginafunimi ong’wela?” Aliwa wakula yegihina: “Iyo nnere wanda.”
23 Oliye wawakula egihina: “Mwebaribarene nyu munere ong’wela kopo yaga, mbwenye okarati moono waaga woojha obe moono waaga weemara anenya kahi miyo, maburo ala annyaya baale Ababa yawegeredheliwa.”
24 Anamahara ale 10 nuwiwa muselu ole, aliwa watikina anamahara ale abiili.
25 Mbwenye Yesu wawithana ni owoga egihina: “Nyu muunona wihina anamathonga eelabo enathonga nlogo mowiwanana ni efunelo yewa teto anamathonga anlubale enowagonjhiha anamathonga akwiwa.
26 Nyu kamukale ndo, mbwenye ole anafuna okala munlubale vaari veenyu akale mudhariya,
27 teto ole anafuna okala owambela vaari veenyu akale mudhariya,
28 woona ninga Mwaana Muthu kaadhele olabiwa, mbwenye aadhele olaba ni ovelela egumaye wihina awobole anamwinjhi.”
29 Akumaga oJeriko, muthithi munlubale waathu omuharaga.
30 Vano aliba ohoona abiili yakirante sere-sere ya rampa wiiwa wihina Yesu anna ovira murudda yole ni okuwa yegihina: “Nabwiya, Mwaana Davidi, kaneddeleni thagaraga!”
31 Nuwindo muthithi ole waathu wasumulula ni waruma wihina emaalewo. Mbwenye aliwa othabwagave okuwa, yegihina: “Nabwiya, Mwaana Davidi, kaneddeleni thagaraga!”
32 Vano Yesu wimela wawithana ni wakoha egihina: “Munafuna guwereleni ddi?”
33 Aliwa omwakula yegihina: “Nabwiya nnaloba wihina mento ehu yonege.”
34 Yesu waweddela thagaraga ni wapara mento ewa, mudhidhi yole aliwa wambela woona ni omuharaga.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “envosole.”
