Matewuji 27:1-66
27 Vigasile anddimuwa aanamakutha, anamaholela a nlogo otugumana wihina epangane makalelo oompeleka Yesu wihina apiwe.
2 Egamanle ommaga omuthukulela wa musadoro Pilatu.
3 Nuwindo, Judasi aamugulinhe Yesu nuwoona wihina oliye ahithongeliwa okwa, wambela woova ni wahogolosela korowa ndhe 30 dha parata anddimuwa aanamakutha ni anamaholela a nlogo,
4 egihina: “Gihithega mwaha wooguliha nikame nihinna muladdu.” Aliwa owoga yegihina: “Eyo eli ni we kahi ni iyo!”
5 Vano oliye odhowa ovokedha mutempulu korowa ndhe dha parata, okuma odhowa wimaga.
6 Mbwenye anddimuwa ale aanamakutha othukula korowa ndhe dha parata ni owoga yegihina: “Kinenyeya okoya korowa ndha mburo mmodhave munakoyiwa korowa dha mutempulu, mwaha korowa dhiguliwena nikame.”
7 Egamanle opanganela othoma wihina korowa ndhe egulena mundda waakoyiwege anyawedda.
8 Bumwahaya ofiyedha peeno mundda ole onithaniwa Mundda wa Nikame.
9 Vano wakwanela madhu anamavuhulela Jeremiya enawoga yegihina: “Vano aliwa othukula korowa ndhe 30 dha parata dhaguliwena muthu, muthengo yoyo wathomme ahima amodha aamwaana Ezarayeli,
10 ni ogulana mundda mowiwanana ni madhu aagirumme Yehova.”
11 Yesu agimenle vamentoni va musadoro, vano musadoro ole omukoha egihina: “We oli mwene aaJudewu?” Yesu omwaakula egihina: “Di nyu munawoga ndo.”
12 Mbwenye mudhidhi inkedhiwaga nanddimuwa aanamakutha ni anamaholela, oliye kaakunle ethu.
13 Vano Pilatu omukoha egihina: “We kuniwa dhithundha dhatedhene enuwinkedhiwa?”
14 Mbwenye oliye kamwakunle newene ndhu nimodha, mwaha wa yeyo musadoro otikina vanlubale.
15 Yaali elemelelo labo namathanga musadoro omukumiha munyakambura mmodha, yoyo mulogo wamuthomiwa wihina akumihiwe.
16 Aliwa yahikanna munyakambura ithaniwa Baraba, namapa aathambwe ononiwa.
17 Mowindala, nutugumana, Pilatu okoha muthithi ole waathu egihina: “Aabilene yaala munafuna gimutapule aani, Baraba obe Yesu anithaniwa Kiristu?”
18 Mwaha Pilatu ahinona wihina yampeleke mwaha wa ntxiga.
19 Ohiya eyo Pilatu agakarante otiribunale, mwariye oruma muthenga wawoga wegihina: “Kuvolowele muladdu wa muthu yoyo owogowa, peeno gihoona goyi enlubale girohaga mwaha wa muthu yoyo.”
20 Mbwenye anddimuwa aanamakutha ni anamaholela otujela muthithi ole waathu wihina Yesu apiwe mbwenye Baraba atapuliwe.
21 Nuwindo, musadoro wakoha egihina: “Aabilene yaala munafuna gimutapule aani?” Aliwa wakula yegihina: “Baraba!”
22 Pilatu wakoha egihina: “Yesu anithaniwa Kiristu munafuna gimwerena ddi?” Aatene wakula yegihina: “Akomeliwe vantxikwani!”
23 Wakoha egihina: “Mwahaya bwaddi? Ethu baani yabure eriliyena?” Mowindo aliwa okuwave yegihina: “Akomeliwe vantxikwani!”
24 Pilatu nuwoona wihina kaapuravo ethu teto muthithi ole waathu wera othabwave onyagula, oliye wathukula manjhe, onawa madaye vamentoni va muthithi ole waathu egihina: “Miyo kaginathukula nibili na muthu yola, anna muladdu di nyu.”
25 Muthithi waatene wakula wegihina: “Iyo podi othukula nibili vamodha naanihu.”
26 Oliye omutapula Baraba mbwenye oruma wihina Yesu uukuthiwe ni wavahedhela wihina apiwe vantxikwani.
27 Atoropa a Pilatu omuthukula Yesu omudhowana nyumba ya musadoro, vano atoropa aatene omurijha.
28 Numala omurula dhowara dhaye aliwa omuwariha malaya oofila,
29 oluwa kara ya mwinga omuwariha ni othukula mmiri omwihiddeliha moono woojha. Okokora vamentoni vaye ni omunyemula yegihina: “Kiivuluse Mwene aaJudewu!”
30 Aliwa omuturela maara, othukula mmiri ole wambela onvadana musolo.
31 Numala omunyemula omurula malaya ale oofila, omuhogolosela dhowara anniyena vano omuthukula wihina akomeliwe vantxikwani.
32 Edhowaga omugumanana mulobwana dhaala ooSireni ithaniwa Simawu. Omuwaddihedha mulobwana ole othukula ntxikwa nne.
33 Nufiya mburo onithaniwa Golgota, obe neere Mburo wa Dhigarigadhi,*
34 aliwa onvaha vinyu otaganyihedhiwa ni makupu dhaala oowawa wihina amung’we, mbwenye numulawiha oliye okoodda omug’wa.
35 Egamanle omukomela vantxikwani aliwa ovokedhana gari, wihina egawane dhowaradhayedha
36 ni okarati vevale, omusugweraga.
37 Ohiya eyo vadhulu vamusolo waye okomelavo tabwa walebavo madhu yamwinkedha oliye yegihina: “Ola di Yesu mwene aaJudewu.”
38 Dhipaddi dhaye dhabilidhene waakomeliwa ambava abiili, mmodha moono woojha mmodha moono weemara.
39 Athu yavira yomuruwana ni edhuudhaga musolo
40 yegihina: “We wawogesa ginoobwanyula tempulu givenyihedhe malabo mararu, kivuluse-to! Akala we oli mwaana a Mulugu okite vantxikwani nvo!”
41 Ni makalelo mamodhave, anddimuwa aanamakutha, anamaleba ni anamaholela, wambela omunyemula yegihina:
42 “Amodha owanda wavulusa; mbwenye oliye kananda wivulusa! Oliye Mwene oWizarayeli; okite ovanene vantxikwani, wera ndo iyo nnere wurumedha.
43 Oliye eere anamuroromela Mulugu, Mulugu yoyo uuvuluse-to ovanene akala onowurumedha, mwaha oliye awogesa egihina: ‘Miyo gili Mwaana a Mulugu.”’
44 Nimakalelo mamodhave ni ambavaya yakomeliwe vamodha nuliye yomuruwana.
45 Obajha 12 ofiyedha 15 elabo yatene okalawo yiihi.
46 Mudhidhi yole mmodhave wa 15 wora, Yesu okuwa ni ndhu nootama egihina: “Eli, Eli, lama sabakitani?” obe nere: “Mulugwaga, Mulugwaga, mwahaya bwaddi mudhe muginyanyalege?”
47 Athu amodha yaali avale nuwiwa, aliwa owoga yegihina: “Mulobwana ola anamwithana Eliyaji.”
48 Mohilegela mmodha waaliwa othamaga othukula esponja, obwiniha nvinyuni oowawa opulela ommirini ni onvahedha wihina amung’we.
49 Mbwenye athu owinjhiva owoga yegihina: “Kamwihiyeni nnafuna nimone akala Eliyaji anodha anvuluse.”
50 Dila yanabili Yesu okuwa ni ndhu nootama, nuwindo oliye okwa.*
51 Mudhidhi yole kurtina namutempulu otaala vaari, wambela odhulu ofiyedha vati, elabo oddiginyeya, mabwe opweseya.
52 Vano muruthu dhowinjhiva dhaathu oweela yakwile ovokedhiwa ode
53 (athu yakuma murudda yole womahame Yesu numala ovenyihiwa ovolowa sidadi yoweela), muruthu ndhe okala vaddedderenivene athu wonaga.
54 Vano kapitawu aatoropa vamodha naale yamusugwera Yesu, nuwoona oddiginyeya weelabo ni dhithu dhapadduwa, aliwa wambela woova vanlubale ni owoga yegihina: “Mwebaribarene ola aali Mwaana a Mulugu.”
55 Vevale yahikalavo ahiyana owinjhiva emusugwaga wolapelawene yanvelela Yesu okuma oGalileya, wihina emukavihere;
56 vaakaleliwa ahikalavo Mariya Madalena, Mariya amaye Tiyagu ni Jozeji mayi aahima a Zebedewu.*
57 Mowindala ofiya mulobwana dhaala ooreela oArimateya ithaniwa Juze, nuliyeya aali namahara a Yesu.
58 Mulobwana ola, odhowa wa Pilatu ni oloba muruthu wa Yesu, vano Pilatu oruma wihina avahedheliwe.
59 Juze othukula muruthu ole ovidigelela ni guwo ya linyu yathima,
60 odhowa opweha mmahameni mwaaye maxa aatibiliye vanibweni. Numala, ofugawo nnibwe ninlubale, oliye odhowaga.
61 Vano Mariya Madalena ni Mariya mmodhaya okarati vamahameni vevale.
62 Labo nomwegeredha Sabadu nihinafiye, anddimuwa aanamakutha ni afarizewu otugumana vikaleliwa, Pilatu ahinaatugumane
63 ni owoga yegihina: “Nabwiya, iyo nnowubuwela dhithu awogesa namaleketha ole ahinakwe, egihina: ‘Yavira malabo mararu miyo ginere ovenyihiwa.’
64 Mowindala murume wihina mahame ale esugweriwege ofiyedha labo nanatharu, anamaharaye enadha emwiyemo vano ewogege ni nlogo yegihina: ‘Oliye ohuvenyihiwa muukwani!’ Vano woota wula wogomihedha winere othabwa okwaranya woota wowambela.”
65 Pilatu wakula egihina: “Nyu podi wathukula anamasugwera. Kadhowani mwasugwerege mahame ninga munandinyu.”
66 Nuwindo aliwa odhowa olibiha pamadhene nibwe nomahame wule ni wahiyawo atoropa oosugwera.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “makuva a musolo.”
^ Obe: “Opeleka muzimu waye.”
^ Lit.: “Mwaadha Zebedewu.”
