Matewuji 28:1-20
28 Sabadu nuuvira, vati nuusa labo nowambela na sumana, Mariya Madalena ni Mariya mmodha odhowa woona omahame.
2 Wahereya oddiginyeya winlubale, mwaha mungero a Yehova ahikita odhulu ofiya vamahame vale, osusihawo nibwe nne, nuwindo oliye okiratela.
3 Ekalelo yaye yakala ninga ojerima wa dari, teto dhowara dhaye dhaali dhotxena ninga murabo.
4 Mwaha wowoova anamasugwera wambela ogurumela, okalaga ninga yere okwa.
5 Mbwenye mungero ole wawaddela ahiyana ale egihina: “Kamoove, mwaha gihinona wihina munanveda Yesu apiwe vantxikwani.
6 Oliye kali vevala, ohuvenyihiwa muukwani ninga vawogeliye. Mudhe moone mburo vapwehiwiye.
7 Mwindo mudhowe mowaguva, mwawaddele anamaharaye mwegihina: Oliye ohuvenyihiwa muukwani, mudhowe mowaguva oliye anadhowa oGalileya. Munere omoona wengo. Siyeyo gaadhelimi wuwaddelani.”
8 Nuwindo, aliwa ovenya omahame wule mowaguva yovaga ni egaali oohagalalene, othamaga wihina yawaddele anamahara aye.
9 Nuwindo Yesu odhowa ogumana naliwa ni walojhela egihina: “Bondiya!” Aliwa omwaddamela, omwabarasari manyalo aye ni omukokorela.
10 Yesu wawaddela egihina: “Kamoove! Kadhowani mwawaddele addibilaga edhowe oGalileya, wengo enere ogoona.”
11 Edhowaga mudila anamasugwera amodha odhowa musidadi wawaddela anddimuwa aanamakutha dhatedhene dhaapadduwe.
12 Aliwa numala otugumana nanamaholela wihina ethome ethu baani yahoweliwa werana, wavaha atoropa korowa dhowinjhiva dha parata
13 wawaddela yegihina: “Mwawoge mwegihina: ‘Anamahara aye bidhile mahiyu omwiya iyo nigonaga.’
14 Vano Pilatu iiwa dhithu ndha iyo nnere omwaddela, nyu kamunahowela othuwathuwa.”
15 Mowindala aliwa othukula korowa ndhe dhaparata ni werana yele yaddeliwiwa, woota wule onna ovuwave murudda wojudeya ofiyedha peeno.
16 Vano anamahara ale 11 odhowa oGalileya, omwangoni Yesu aatonyihedhiyewo.
17 Nuumona aliwa okokora vamentoni vaye, mbwenye amodhaya omwanganyedhaga.
18 Yesu wawaddamela ni owoga naliwa egihina: “Givahiwa onamathonga watene odhulu ni elabo yavati.
19 Mowindala, dhowani mwaahudhihe athu amalogo amatene, wihina ekale anamahara aaga, mwaabaddizaga ni ndina na Babi, na Mwaana, na muzimu wotxena,
20 mwaahudhihaga wiwelela dhithu dhatedhene gurumilimini. Munone wihina miyo gili ni nyu malabo aamatene, ofiyedha omakuthulo wa elabo.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
