Matewuji 3:1-17
3 Malabo yaale Juwawu Batista odhowa olaleya mwiddeddereni oJuda,
2 egihina: “Muthwaruwe, mwaha Omwene wodhulu ohaddamela.”
3 Mwebaribarene ola diyole awogiwe nnamavuhulela Izayiya egihina: “Nihikala ndhu nnithana mwiddeddereni negihina: ‘Mmwegeredhele Yehova dila! Mogoolele dila dhaye.’”
4 Juwawu dhowara dhaye dhaali dha mooya akamelu ni sintu nathebe noovadda. Yoojha yaye dhaali kwaakwa ni enwi yamukokolani.
5 Vano athu aatene oJeruzale, ooJuda ni amurudda woJordawu yoodha ogumana nuliye,
6 aliwa yobaddiziwa ni Juwawu mwihinjhe woJordawu, ni yowoga dhothega dhewa.
7 Vano Juwawu nuwawoona afarizewu ni asadusewu owinjhiva yaddamelaga mburo ole wabaddiziwa athu, oliye owoga naliwa egihina: “Nyu odhuulu weevili, baani uwaddenleni wihina munere wanda othawa owali wa Mulugu onafuna odha?
8 Mowindo, mweregena dhithu dhinoniha wihina muhuthwaruwa.
9 Kamwilekethege mwegihina: ‘Iyo nili ahima aAbaraawu.’ Mwebaribarene miyo ginowuwaddelani wihina Mulugu afuna podi wasaddula mabwe ala ekale ahima Abaraawu.
10 Maxadu ohumala opanihiwa wihina agwadde musisi dha muthanko. Mwebaribarene, muthanko ohunavaha dhowima dhapama onere ogwaddiwa ovokedhiwe vamoothoni.
11 Miyo ginubaddizani ni manjhe, mwaha othwaruwa weenyu, mbwenye ole anadha mundduli mwaaga dakopolo ogikwaranya miyo, newene kaginafwanelela orula sandaliya dhaye. Oliye anere wubaddizani ni muzimu wotxena vamodha ni mootho.
12 Oliye ohukanna paya* mmadani yonvethana tirigu ni anere oxela mburo vamuugeliye tirigu,* amala anere omugela veringwini* mbwenye makataya anere wapaha vamoothoni ohunadha othima.”
13 Vano Yesu okuma oGalileya odhowa mwihinjhe Jordawu, wihina abaddiziwe ni Juwawu.
14 Mbwenye Juwawu okoodda egihina: “Miyo ni nyu aafwanelele ombaddiza mukwaye baani, kahi nyu Nabwiya?”
15 Yesu omwakula egihina: “Peeno ohiye wihina dhithudha dhereye ndala, mwaha nimakalelo yala, nnere wakwaneliha dhithu dhatedhene dhili dhowogowa.” Vano Juwawu orumedha ombaddiza.
16 Yesu agamanle obaddiziwa, atavuwagawene mmanjheni, odhulu wahifuguwa, vano Juwawu woona muzimu wa Mulugu omukitelaga ninga kangayiwa.
17 Ohiya eyo, nahikuma ndhu odhulu negihina: “Oyo di mwanaga ginamudhivelimi, ni ginamurumedhimi.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “muthanko wamunyonga wavethiwana tirigu.”
^ Obe: “veebuwani.”
^ Obe: “vasasarani.”
