Matewuji 5:1-48
-
MWAHA WAVAMWANGONI (1-48)
5 Yesu nuwoona muthithi waathu ogwela vamwangoni okarati, vano anamaharaye omususedha.
2 Oliye wambela wahudhiha* egihina:
3 “Oohagalala baathu enamurabulela Mulugu,* mwaha Omwene wodhulu bwewa.
4 “Oohagalala baathu enunla, mwaha enere otodoliwa.
5 “Oohagalala baathu oopwaseya,* mwaha enere wakela elabo yavati.
6 “Oohagalala baathu enunlela wereliwa opama,* mwaha enere wakwanelihedhiwa.
7 “Oohagalala baathu athagaraga, mwaha enere weddeliwa thagaraga.
8 “Oohagalala baathu oweela murima, mwaha enere omoona Mulugu.
9 “Oohagalala baathu enasayela murenddele, mwaha enere withaniwa ahima a Mulugu.
10 “Oohagalala baathu enaharahariwa mwaha werana opama, mwaha Omwene wodhulu bwewa.
11 “Oohagalala dinyu anaruwaniwa, anaharahariwa ni aninkedhiwa dhithu dhatedhene dhabure, mwaha wa ndina naaga.
12 Muhagalale, muthabe nuuhagalala, mwaha mareeliho enyu odhulu ehinjhiva, teto oobajha oharahariwa banamavuhulela.
13 “Nyu muli mwinnyu weelabo. Mbwenye mwinnyu wahidhivaga, podi ohogolowela odhiva? Kunakanna mabasa, onorahiliwa athu onyingalelaga.
14 “Nyu muli waara weelabo. Nimakalelo mamodhave, kaavo ahinona sidadi emagiwe vamwangoni.
15 Athu yamwihiddiha lampada kinampweha mukukutuni, mbwenye enomutomeya, wamonelaga athu aatene.
16 Nimakalelo mamodhave, muhiye waara weenyu wamoneyelege athu aatene, wi yawone mabasa apama munaparinyu ni emuthithimihe Babinyu oodhulu.
17 “Miyo kagidhele omariha Nlamulo obe dhiwogile Anamavuhulela. Mbwenye gidhele wakwaneliha ohiya omariha.
18 Mwebaribarene podi wandeya elabo yavati ni yodhulu ovira, mbwenye kinandeya ovira Nlamulo nimodha nihinathi wakwanela.
19 Muthu yole anaviriganihe nlamulo nimodha ni anahudhihe* athu amodha werana emodhave kanafwanelela Mumweneni wodhulu.* Mbwenye muthu yole anavirihemo ni anahudhihe athu amodha werana emodhave anoofwanelela Mumweneni wodhulu.*
20 Ginnuwaddelani ebaribari, opama* weenyu wahikumaga vati vamurima munoligana ni anamaleba vamodha ni afarizewu, teto kamunaavolowe Mumweneni wodhulu.
21 “Nyu muhunona nlamulo yaddeliwe makolwinyu, nawoga negihina: ‘Kumpe muthu, yole anampe mukwaye anere owogiwa muladdu otiribunale.’*
22 Mbwenye miyo ginnuwaddelani wihina, muthu yole anamukoyele ntxiga ddibile anere owogiwa muladdu otiribunale; ni muthu yole anaamuwogele ddibile madhu abure, anere owogiwa muladdu Tiribunale Enlubale. Teto muthu yole anaamwithane mukwaye: ‘Taduwawe!’ anere ovokedhiwa oJhehena* winahidda mootho.
23 “Vano, wathukula nvaho wawo odhowana waltareni, nuwindo onowubuwela wihina ohukanna muladdu nddibilo,
24 ohiye nvaho wawo vevale ohogolowele mundduli. Odhowe watxokotxele muladdu onniwena* nddibilo, wamala podi odhowa wakuthe mukutho wawo.
25 “Kulegele otxokotxela muladdu onniwena ni mwiddanaawo, mugaali mudila mudhowaga otiribunale, wihina ahupeleke mmadani mwanamatoriha, vano anamatoriha ehupeleke mmadani mwasupayi windo ovokedhiwe mukambura.
26 Ginnuwaddela ebaribari: Kunatapuliwe ohulinve korowa yatene onniwena.
27 “Nyu muhunona nlamulo nnihina: ‘Kuraruwe.’*
28 Mbwenye ginafuna guwaddeleni wihina, muthu yole anadidela omusugwa muhiyana ofiyedha omukalela munigwa mmurimani ohumukumiha mba.
29 Mowindo, akala ninto nawo na moono woojha nnowukwakwathusa, okumihemo orahile. Yaakale yapama oyelela yaano modha ya mwiili wawo ohiya mwiili watene ovokedhiwa oJhehena.*
30 Emodhave, akala nlada nawo na moono woojha nnowukwakwathusa, ogwaddewo orahile. Yaakale yapama oyelela yaano modha ya mwiili wawo ohiya mwiili watene ovokedhiwa oJhehena.*
31 “Ohiya yeyove, dholebela dhinihina: ‘Akala muthu anafuna amwalane ni mwariye anvahe pethe.’*
32 Mbwenye ginafuna guwaddeleni wihina muthu yole anafuna omwalana ni mwariye, ehili mwaha wa mararuwo anamutotela mwariye okuma mba,* teto muthu yole anamutela muhiyana amwalana ni mamune ohukuma mba.
33 “Ohiya eyo, nlamulo yaddeliwe makolwinyu nawoga negihina: ‘Kulibele ebewene sewakwaneliha, mbwenye wakwanelihe dholibela dhawo weriliwena vamentoni va Yehova.’
34 Mowindala, ginowuwaddelani: Kamulibelelege ethu-siithu, newene kamulibelelege odhulu, mwaha mpaddo wa Mulugu;
35 newene kamulibelelege elabo yavati, mwaha mburo Mulugu anapwehiye manyalwaye, newene kamulibelelege elabo yo Jeruzale, mwaha sidadi ya Mwene munlubale.
36 Newene kamulibelelege vamuru veenyu, mwaha nyu kamunanda otxeniha obe oribiha nthithi nenyu.
37 Mwahiye madhu enyu owi “hee” ekale hee, “naari”, akale naari; dhatedhene dhinakwaranye madhu yala dhinadhela wa Mbure.
38 “Nyu muhunona nlamulo nnihina: ‘Ninto nninto, niino nniino.’
39 Mowindala, ginowuwaddelani: Kuwane ni muthu abure,* mbwenye anuvade nthama nna, omulevele nthama nimodha.
40 Akala muthu ohusumela otiribunale mwaha anafuna uwake malayaawo, omwihiyedhe naleya onaawariwe ode.
41 Akala namathonga eere wuwaddihedha opwathela dhoobo wihina weddena kilometuru modha, weddena kilometuru biili.
42 Muthu uloba ethu onvahe teto muthu afunaga wufiyari kumukoddihe.
43 “Nyu muhunona nlamulo nnihina: “Omudhivelege mwanddamanawo mbwenye omwidde mwiddani awo.’
44 Mowindala ginowuwaddelani: Mwadhivelege amwiddani enyu ni mwalobelelege ale enuharaharani,
45 mwerana ndo munooniwege ninga ahima a Babinyu ari odhulu, mwaha oliye anowavaha nduwa athu apama ni athu abure ni anowavaha muzongwe athu owogowa naathu ohogowa.
46 Ki vano mwadhivelaga baahi ale enudhivelani mpunrevo ddi? Kamunerana emodhave enerana anamakukusa musoko?
47 Mwalojhelaga baahi addibilinyuve, sapama? Kamunerana emodhave enerana athu amalogo oode?*
48 Mowindala, mukale oologomana* ninga Babinyu ali odhulu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “wasuziha.”
^ Obe: “Enonne wihina ehikanna dala yomuzimuni.”
^ Obe: “Ookurumuwa murima.”
^ Lit.: “Enna dala ni nthona nowereliwa opama.”
^ Obe: “anasuzihe.”
^ Obe: “Kanakele Omwene wodhulu.”
^ Obe: “Anere wakela Omwene wodhulu.”
^ Obe: “Wogowa.”
^ Obe: “muwani.”
^ Waali mburo wapahiwa lixu ode wa sidadi yoJeruzale. Wasugwe Madhu Etapuleliwe.
^ Lit.: “Werana murenddele.”
^ Obe: “Kukume mba.”
^ Obe: “Sertificado oomwalana.”
^ Obe: “Anamureyela mangala mwariye.”
^ Obe: “Kuwelihe kunyawunya.”
^ Obe: “Athu ehili amwaana Ezarayeli.”
^ Obe: “Owakwanela.”
