Karta Pawulo aalebeliye akudda Roma 12:1-21
12 Mowindo, addibilaga, ginowulobelelani ni thagaraga dha Mulugu, wihina mpeleke mwiili weenyu ninga mukutho wegumi, woweela, onarumedhiwa ni Mulugu, mwaparaga mabasa ootaleleya ni makalelo enyu owubuwela.
2 Muhiye wuubiwa ni elabo, musaddule mubuwelo weenyu, wihina monelemo yekinyu ele eli yapama, enarumedhiwa ni efunelo yologomana ya Mulugu.
3 Mwaha wa opama wohinifwanelela givahiwimi, ginowoga ni kadda muthu wa nyu wihina kamuthabwege wivaha thima, mbwenye kadda muthu iwonelegemo mwamakalelo enatonyihedha wi ohukanna thotho, mowiwanana ni nroromelo aakenliye ni Mulugu.
4 Mowindala ninga mwiili onniwana yaano dhowinjhiva mbwenye yaanodha kadhinaapara mabasa mamodhave,
5 ni makalelo mamodhave naarive iyo nigaali owinjhiva nili mwiili mmodhave mowiwanana ni Kiristu, mbwenye kadda yaano enomuhowela mukwaye.
6 Kadda muthu wa iyo ohukanna gari yohiyana ni mukwaye wodhela opama wohinifwanelela nivahiwihu; mowindo akala gari yehu sovuhulela nivuhulelege mowiwanana ni nroromelo ninnihuna;
7 akala gari yehu sokavihera, nikaviherege; ole anna gari yohudhiha, ahudhihege;
8 ole anna gari yolibiha, alibihege; ole anavaha, eeregena ni murimaye wamutene; ole anasogolela, eregena mohupwaza; ole anoniha thagaraga, eregena nuuhagalala.
9 Odhivela weenyu kukale wogwalagwambi.* Mwiidde obure, mbwenye mudidele werana opama.
10 Ni odhivela wooddibila, mukanne odhivela wavati vamurima mmodha ni mukwaye. Mukalege oobajha othithimihana mmodha ni mukwaye.
11 Mukale ooviheya, kamukale amangonya.* Mukanne muzimu woviheya. Mulabege ninga adhaari a Yehova.
12 Ejhehedhelo yuhagalasegeni. Nvilele ni makathamiho. Mudidele olobela.
13 Mugawanege ni oweela ndhe munninyuna mowiwanana ni ndhe dhinahalela. Mudidele wawakela aleddo.
14 Mmulobe Mulugu wihina aareelihe ale enuharaharani; ni kamwawogege obure.
15 Muhagalalege ni ale enahagalala; munlege ni ale enunla.
16 Mwawonege athu amodha ninga muniwonelinyu; kamubuwelege mowithukulela, mbwenye mukanne murima wowiyeviha. Kamwiwonege ninga muli athotho vamentoni veenyu.
17 Kammuwelihedhe muthu obure nuubure. Mbwenye musayelege werana opama vamentoni vaathu aatene.
18 Akala enowenyeya vamentoni veenyu, muthuwathuwelege okanna murenddele naathu aatene.
19 Addibilaga, kamuwelihedhanege kunyawunya, mbwenye mmwihiye Mulugu oonihe owali waye; mwaha dholebela dhinihina “Kunyawunya saaga; ginere omuhogolosela’ onawoga di Yehova.
20 Mbwenye, “mwiddanaawo avoliwa, onvahe yojha, akanna nthona onvahe manjhe, weragana ndo, onomutolela makala a mootho vamuruvaye”.
21 Kuhiye obure wugonjhiha, mbwenye odidele ogonjhiha obure nuupama.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “wowisinjhedha, mukalaga ninga muhukanna odhivela ni athu amodha.”
^ Obe: “awara.”
