Karta Pawulo aalebeliye akudda Roma 15:1-33
15 Mbwenye iyo ninna nroromelo nooliba, nnohowela wakavihera ale ehinna nroromelo nooliba, ohiya wihagalasa yeekihu.
2 Kadda muthu amudhivelege mwanddamanaye amwerelaga dhithu dhapama dhinamulibiha.
3 Newene Kiristu, kihagalase yeka, mbwenye, ninga munawogela dholebela dhegihina: “Dhoruwana dhaathu yaale enuruwana, dhinagimorela miyo.”
4 Mwaha dhithu dhatedhene dhilebiwe kale, dhilebiwe wihina dhinihudhihe, wodhela ovilela wehu ni otodoliwa ni Dholebela, nikanne ejhehedhelo.
5 Mulugu anantodola ni ananikavihera ovilela, ukavihereni kadda muthu wa nyu okanna mubuwelo mmodhave aanna Kiristu Yesu,
6 wihina mwimodhani ni ndhu nimodha, mmuthithimihe Mulugu ni Baabi a Nabwiya ehu Yesu Kiristu.
7 Bumwahaya, mwakelanege mmodha ni mukwaye, ninga Kiristu uwakenliyeni, wihina Mulugu athithimihiwege.
8 Mowindo, ginafuna munone wi Kiristu mudhaari aathu yaale yineliwe.* Oliye erilena eyo, wihina atonyihedhe wi Mulugu anawoga ebaribari ni oonihe mpaganyo Oliye eriliyena ni makolo ewa,
9 wihina malogo emuthithimihe Mulugu mwaha wa thagaraga dhaye. Ninga dholebela dhinawogiwa dhegihina: “Bumwahaya ginere wuthithimihani vaari va malogo ni ginere ovuwiha ndina nenyu ni jhibo.”
10 Teto nuliyeya onowogave egihina: “Malogo aamatene ehagalale vamodha ni nlogo naaye.”
11 Ohiya eyo: “Malogo aamatene emuthithimihege Yehova teto athu aatene envuwihe.”
12 Izayiya onowoga egihina: “Muthu mmodha a nlogo na Jese anere odha ni anere wathonga malogo owinjhiva teto aliwa enere omujheha nuuhagalala wihina erena dhithu dhapama.
13 Mulugu anavaha ejhehedho uvaheni ohagalala vamodha ni murenddele wodhela omuroromela oliye, wihina ejhehedho munninyuna yunnuwe wodhela kopolo dha muzimu wotxena.
14 Addibilaga, miyo gihikanna ebaribari wihina nyu muhukanna dhithu dhapama dhowinjhiva ni muhukanna enonelo yowinjhiva teto munowanda olagana mmodha ni mukwaye.
15 Mowindo, miyo gihulebelani dhithu dhatedhene wihina mwahidduwale dila biili. Ginowerana dhithu ndha mwaha wa opama wohinifwanelela agivahile Mulugu
16 ginowilibihedha vanlubale olaleya muthenga wapama ola wa Mulugu ninga mudhaari a Yesu Kiristu. Ethu egithukulele wapara mabasa ala, sowihina malogo erumedhiwe ninga mukutho otxenihiwe ni muzimu wotxena.
17 Mowindo, gihikanna ethu yowithukulana wa Kiristu Yesu mwaha wa mabasa ginamparelimi Mulugu.
18 Kagidha gixixa owoga ethu, ehili ele Kiristu eriliyena agilabihedhaga miyo wihina malogo ekale owiwelela.Oliye oherana eyo wodhela madhu aaga ni dhowera dhaaga,
19 wodhela kopolo ya dhintelelo ni matikiniho vamodha ni kopolo ya muzimu wotxena wa Mulugu, gihilaleya mohihiyedhedha muthenga dhapama wodhela Kiristu, okuma oJeruzale ni murudda dhatedhene ofiyedha Oliriku.
20 Ni makalelo yayo, gihilibihedha vanlubale wihina gihilaleye mburo mumanle ononiwa ndina na Kiristu, wi gihimmage alisersi vamburoni vamuthu mmodha;
21 mbwenye ninga dholebela dhinawogiwa dhegihina: “Ale yahiniwege alaleyiwaga wodhela oliye enere omoona teto ale yahiniiwege enere omunona.”
22 Siyeyo egibarele dila dhowinjhivadhene miyo ohudha wuwaredhelani.
23 Mbwenye vano, gihimala olaleya mburo dhatedhene dha murudda yoola, teto muwari mwa yaka dhowinjhivadhene ginna waaja makalelo wihina gidhe guwaredheleni.
24 Bumwahaya, miyo gadhowa wEspanya, ginoojheha wuwoonani teto gamala othapanya ni nyu, munere ogivelela vang’ono.
25 Mbwenye ovanene vala ginadhowa oJeruzale wihina gaakavihere addibila oororomeleya * eli wengo.
26 Mwaha addibila ooMasedoniya ni owAkaya ehivaha dhovelela dhewa ni murimiwa wamutene wihina yakaviherena addibila oohawa eli oororomeleya enakala oJeruzale.
27 Hee, yaherana eyo ni murimiwa wamutene mwaha yahikanna mangawu naaliwa. Majudewu yahigawana ni malogo mamodha dhithu dhapama dhomuzimuni dhinadhela wa Mulugu. Mbwenye vano athu amalogo yohowela wakavihera ni dhithu yahoweliwa.
28 Vano gamariha dhithu ndha ni gafiyana pama dhoveleladha, ginere ovira wengo wihina guwaredheleni gadhowaga wEspanya.
29 Ohiya eyo, gihinona wihina gadha wengo wuwaredhelani, ginere wadhana mareeliho owinjhiva a Kiristu.
30 Addibila, wodhela Nabwiya ehu Yesu Kiristu ni odhivela wa muzimu wotxena, ginowukongomedhani wihina mwilibihedhe ogilobelela wa Mulugu,
31 wihina gooboliwe mmadani mwa Majudewu ehinamurumedha Yesu teto wihina mabasa ginadhowimi waapara oJeruzale erumedhiwe pama naathu oororomeleya.*
32 Mowindo, Mulugu afuna ginere wuwaredhelani nuuhagalala ni ginere olibihiwa ni nyu.
33 Mulugu anavaha murenddele akale ni nyu aatene. Amem.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “egaddiwe nthuba.”
^ Obe: “oweela.”
^ Obe: “oweela.”
