Karta Pawulo aalebeliye akudda Roma 4:1-25
4 Ki vano niwoge ddi wodhela nikolo nehu Abarawu?
2 Motajhiha, wogowa wa Abarawu wahadhele mwaha wa mabasa aapanriye, oliye erege withukula mbwenye kiithukulege vamentoni va Mulugu.
3 Yolebela enawoga ddi? “Vano Abarawu omuroromela Yehova, bumwahaya Mulugu adhe amonege ninga muthu owogowa.”
4 Akala muthu anaapara mabasa onothambila, kahiyo wihina Patarawaye eere othabwa owoma murima, mbwenye oliye onofwanelela othambila.
5 Mbwenye akala muthu onomuroromela Mulugu ni kanaaroromela mabasa aye, Mulugu anamoona muthu yoyo ninga owogowa mwaha wa nroromelo naye.
6 Mwamakalelo mamodhave, ohagalala wa muthu Mulugu anamooniye ninga owogowa, kunadhela mwaha wa mabasa aapanriye, bumwahaya Davidi ohuwoga egihina:
7 “Oohagalala baathu yaale yenrena dhithu dhabure enoleveleliwa, teto dhothega dhewa dhibibiddeliwe;
8 oohagalala di muthu yole Yehova ahinubuweliye dhothega dhaye.”
9 Nerege ohagalala wula, bwaathu owineliwa baahi obe ni oohineliwaya? Woona wi nnowoga negihina: “Mwaha wa nroromelo aanna Abarawu, Mulugu ahifiyedha omoona ninga muthu owogowa.”
10 Waali mudhidhi baani oliye ooniwiye ninga muthu owogowa? Agamanle wineliwa obe ahinathi wineliwa? Aali ahinineliwe.
11 Oliye ahakela yintelelo, yatapulela wineliwa ninga makalelo oorumedhiwa wogowa waye mwaha wa nroromelo aanniyena ahinineliwe teto wihina akale baabi aathu aatene enna nrororomelo naarive yahineliwe wihina naaliwaya yoniwege ninga athu owogowa;
12 vano akale baabi anihimo naathu oohineliwa, ohiya aathuve eniineliwa, mbwenye naaleya enahara nroromelo nimodhave na babihu Abarawu anniyena ahinineliwe.
13 Kanaali Nlamulo nanvahile Abarawu vamodha ni odhuulu waye mpaganyo wowakela elabo, mbwenye yahakela mpaganyo oyo mwaha wogowa winadhela mwaha nroromelo.
14 Akala enaakele mpaganyo baale enaroromela Nlamulo, nroromelona kaninna mabasa teto mpaganyoya kunaakwanele.
15 Ebaribariya sowi, Nlamulo * nnotatamula owali wa Mulugu mbwenye vahili nlamulo kavili yothega.
16 Bumwahaya mpaganyo ola onere wakwanela mwaha wa nroromelo, mowiwanana ni opama wohinifwanelela, wihina nihimo naatenene na Abarawu naakele mpaganyo oyo, ohiya athuve eniwelela Nlamulo, mbwenye naaleya enna nroromelo nimodhave aanna Abarawu ali baabi a iyo aatene.
17 (Ninga dholebela dhinawogiwa: “Miyo gihuweriha wihina okale baabi a malogo owinjhiva.”) Eyo ehereya vamentoni va Mulugu oliye amuroromeliye ole anaavaha egumi athu ookwa, ni anawoga dhithu dhihiliwo ninga dhihikalawo.
18 Oliye oojhehedha ni ahikanna nroromelo wihina eere okala baabi a malogo owinjhiva, naarive aanganyedhaga wihina eyo kayereye, oliye ahirumedha mwaha wa madhu aaddeliwiye: “Mowindala odhuulu wawo onere winjhivana.”
19 Naarive ahiyelele nroromelo naye oliye owubuwela wihina kaakanne ahima (mwaha ahanle vang’ono wakwaniha yaka 100), teto woona wi ni mwariyeya Sara kaabala.
20 Mbwenye, mwaha wa mpaganyo wa Mulugu, oliye kahiyile wihina nroromelo naaye niridhe, ohiya eyo ahikanna kopolo mwaha wa nroromelo naye wula amuthithimihaga Mulugu,
21 aganna ebaribari wihina ele Mulugu ampaganyiliye eere wakwaneliha.
22 Mwaha wa yeyo “oliye ahoniwa ninga muthu owogowa.”
23 Mowindo, madhu ala owi “oliye ahoniwa ninga muthu owogowa” kilebeliwe oliyeneve baahi,
24 ni iyoya nnere withaniwa owogowa mwaha nnomuroromela Ole anvenyihile Yesu, Nabwiya ehu muukwani.
25 Oliye apelekiwe mwaha wa dhothega dhehu, teto avenyihiwe muukwani wi nooniwe ninga athu owogowa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Nnagiwana, Nlamulo na Moyizeji.
