Karta Pawulo aalebeliye akudda Roma 8:1-39
-
Egumi ni woboliwa wodhela muzimu wotxena (1-11)
-
Muzimu wotxena onovaha onamoona wihina nili ahima a Mulugu (12-17)
-
Dhopaddusiwa dhatedhene dhinna ojheha wooboliwa wa ahima a Mulugu (18-25)
-
‘Muzimu wotxena ononikavihera’ (26, 27)
-
Osakuliwa ni Mulugu mudhidhiya ohunathi ofiya (28-30)
-
Ogonjhiha wodhela odhivela wa Mulugu (31-39)
8 Mowindala, kawili otorihiwa waathu yaale eli mwimodhani ni Yesu Kiristu.
2 Bumwahaya nlamulo na muzimu wotxena nihuvahani egumi wihina mukalegewo mwimodhani ni Yesu Kiristu. Nlamulo nimodhave nihuvulusani wodhela nlamulo na yothega ni nlamulo na okwa.
3 Woona wi Nlamulo kananna kopolo mwaha ohulogomana wehu, Mulugu omuruma Mwanaye ninga muthu oomwiilini wihina avenyihevo yothega. Mowindala, yothega yaathu otorihiwa,
4 wihina Malamulo owogowa yakwanele mwigumini mwehu, woona wi kanneddihiwa ni efunelo yomwiilini mbwenye ni efunelo ya muzimu wotxena.
5 Mwaha athu enakalawo mowiwanana ni efunelo yomwiilini enubuwela dhithu dhomwiilini; mbwenye athu enakalawo mowiwanana ni muzimu wotxena, enubuwela dhithu dhomuzimuni.
6 Mwaha wubuwela dhithu dhomwiilini winatapulela okwa, mbwenye wubuwela dhithu dhomuzimuni winatapulela egumi ni murenddele.
7 Mwaha muthu anubuwela dhithu dhomwiilini onowiddana ni Mulugu, woona wi mwiili kuniwelela malamulo a Mulugu; newene kunaavirihamo malamulo.
8 Bumwahaya athu yaale enakalawo mowiwanana ni dhofuna dhomwiilini kinande omuhagalasa Mulugu.
9 Mowindala, akala muzimu wa Mulugu oli ni nyu, eyo enowoniha wihina kamunakalawo mowiwanana ni dhofuna dha mwiili. Mbwenye akala muthu kanna muzimu wa Kiristu, muthu yoyo kali epaddi yaye.
10 Akala Kiristu ali mwimodhani ni nyu, mwiili ohukwa mwaha wa yothega, mbwenye muzimu sigumi mwaha wogowa.
11 Mowindo akala muzimu wa ole anvenyihile Yesu muukwani oli ni nyu, yole anvenyihile Kiristu Yesu muukwani anere ovaha egumi mwiili dhenyu dhimanle okwa wodhela muzimu waye, oli vamodha ni nyu.
12 Bumwahaya, addibila, iyo nihikanna mangawu, mbwenye kahiyo oomwiilini obe ookalawo ni efunelo yomwiilini;
13 mwaha mwakalagawo ni efunelo yomwiilini nyu munere okwa; mbwenye wodhela muzimu wotxena mpe dhofuna dhenyu dhomwilini, mwerana ndo nyu munere okalawo.
14 Mwaha athu yaale aatene eneddihiwa ni muzimu wa Mulugu, mwebaribarene ahima a Mulugu.
15 Bumwahaya muzimu wa Mulugu kunanthukulela okala adhaari newene okala athu owoova mbwenye ononthukulela okala ahima a Mulugu, teto muzimu yoyo ononthukulela okuwa negi: “Aaba, Babani!”
16 Muzimu wa Mulugu onovaha onamoona ni muzimu wehu wi nili ahima a Mulugu.
17 Mowindala, akala nili ahima a Mulugu nili athu yaale enaakele nvaho wa Mulugu ni nnere wakela nvaho vamodha ni Kiristu. Mbwenye akala nnowona goyi vamodha, nihiyoya nnere othithimihiwa vamodha nuliye.
18 Ni makalelo yaala, makathamiho enanifwanya peeno kahiyo ethu gaaliganiha ni nthithimiho nnafunihu wakela.
19 Bumwahaya dhopaddusiwa dhatedhene dhinna ojheha nuuthaba woonehiwa wa ahima a Mulugu.
20 Mwaha dhopaddusiwa kadhafuna wihina dhikalegewo dhahijhehaga ethu osogolo, mbwenye Mulugu weenya wihina eyo yereye. Vano ni efunelo ya Mulugu, olamula wihina dhikanne ejhehedhelo.
21 Wihina dhopaddusiwa dhinere woboliwa muudharini ni dhinere okanna ofuru ni nthithimiho na ahima a Mulugu.
22 Mwaha nihinona wihina ofiyedha peeno dhopaddusiwa dhatedhene dhinowunla ni dhinna woona goyi.
23 Ohiya eyo, mbwenye nihiyowa ninna namulibu a muzimu wotxena, hee, nihiyowa nnowunla mmurimani mwehu, wula nijhehaga wi nikale ahima a Mulugu teto mudhidhi yoyo nnere woboliwa mmwilini mwehu wodhela yowobola.
24 Mbwenye wodhela ejhehedhelo iyo nihoboliwa, teto ejhehedhelo enooneya kahiyo ejhehedhelo, dhinandeya addi muthu ojheha ethu anooniye?
25 Mbwenye, akala nnojheha ethu nahinoonihu, nuuvilela ndidele ojheha nuuthaba.
26 Ni makalelo mamodhave, muzimu wotxena ononikavihera nakwerebeya; muladduya bowi, malabo mamodha naalobelaga kannanona ethu nnahowelihu oloba, naarive nihinna yowoga muzimu wotxena podi onikavihera ofiyiha dhithu nafunihu oloba.
27 Mowindo, ole anapendda murima ohunona dhofuna dha muzimu wotxena, mwaha muzimu wotxena oyo onowakavihera ale eli oweela mowiwanana ni efunelo ya Mulugu.
28 Iyo nihinona wi Mulugu onowaweriha mabasa aye aamatene wihina yiwananege ni opama waathu yaale enamudhivela oliye, enithaniwa wodhela efunelo yaye;
29 obajha kale oliye ahanona athu aasakuliye ni othoma wihina yere okala ninga Mwanaye, wihina Mwanayeya akale oobajha wa addibila owinjhiva.
30 Ohiya eyo, wa athu yaale oliye aasakunliye ohawithana, teto awithanniye anawoona ninga athu owogowa. Vogomihedhava, naaleya anawooniye ninga owogowa ohathithimiha.
31 Ki vano nnaawoge ddi wodhela dhithu ndha? Akala Mulugu ali ni iyo, ananigonjhihe baani?
32 Woona wi oliye koovelele onivaha Mwanaye, mbwenye onivaha iyo, ohiya onivahave Mwanaye nerege kananivahe dhithu dhimodha nnahowelihu?
33 Baani anaawinkedhe oosakuliwa a Mulugu? Di Mulugu anawoona ninga athu owogowa?
34 Baani ananitorihe? Kawo, mwaha Yesu Kiristu ohukwa ni ohuvenyihiwa muukwani, vano oliye okarati moono woojha wa Mulugu ni onilobelelaga.
35 Baani ananimwalanihe ni odhivela wa Kiristu? Enaakale makathamiho, osegedheya, oharahariwa, dala, osiwa, ngovi obe supadda?
36 Mowindala ninga dholebela dhinawogiwa: “Malabo aamatene nnothukuliwa wihina napiwe mwaha weenyu; teto nnakala ninga mambila enadhowa yapiwe.”
37 Naarive dhigali ndo, ni makathamiho yala maatene, nnoogonjhiha wodhela ole anidhivele.
38 Miyo kaginanganyedha wihina newene okwa, newene egumi, newene angero, newene anamathonga, newene dhithu dhiriwo, newene dhithu dhinafuna odha, newene kopolo,
39 newene otaama, newene oddiiha, newene yopaddusa eli yatene, kinande onimwalaniha ni odhivela wa Mulugu, oli mwimodhani ni Nabwiya ehu Yesu Kiristu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
