Athu owinjhiva enubuwela wi Anamona a Yehova ndina na gereja. Mbwenye okwaranya yaka 2700 mundduli, adhari a Mulugu ebaribari yoowithaniwa ‘anamona’. (Isaías 43:10-12) Ofiyedha yaka ya 1931 niithaniwa anamahudhera a Bibliya. Ki vano, mwahaya bwaddi nigiithaniwa Anamona a Yehova?

Ndina nno nnomutoonya Mulugu ehu. Moligana ni malivuru akale, ndina na Mulugu, Yehova, noofwanyeya mBibliyani matxikwi ni matxikwi. A Bibliya owinjhiva ndina nno nere wakakanihiwa ni madhu owi Nabuya obe Mulugu. Mbwenye Mulugu ebaribari ahimwaddela Moses ndina naye, Yehova, eraga: ‘Nna thindina naga namukalakala’. (Êxodo 3:15) Ndo oliye ohihiyaniha naamulugu amodhaya owoota. Nnowithukula mwaha wowiithaniwa ni ndina nootxena na Mulugu.

Nnowoga mabasa ehu. Okuma nsaka nakale, athu owinjhiva yaherela onamona nroromelo newa ni Yehova. Oobajha aali Abeli. Nuvira yaka dhowinjhivadhene, Nowe, Abaraawu, Sara, Moses, Davidi, ni amodhaya, ehera epaddi ya ‘murabo munlubale wa anamona’. (Hebreus 11:4–12:1) Moligana ni muthu anamwerela onamona muthu ali mukambura ahithegile, iyo nihithoma wawaddela amodha ebaribari ya Mulugu.

Nnamutajhiha Yesu. mBibliyani oliye anithaniwa ‘namona ororomeleya ni ebaribari’. (Apocalipse 3:14) Yesu ohuwoga miyo ‘gihanoniha ndina nenyu’ ni ‘ohuvaha onamona webaribari’ wodhela Mulugu. (João 17:26; 18:37) Mowindo, sofuneya wi anamahara a Yesu Kiristu ebaribari ethugule ndina na Yehova evuwihe. Siyeyo anamona a Yehova enilibihedhiwa werana.

• Mwahaya bwaddi Anamahudhera a Bibliya edhe yiithaniwege Anamona a Yehova?

• Oromana aline Yehova anniyena Anamona veelaboni yavati?

• Namona a Yehova munlubale baani?