Iyo kaninna anamasogolela a gereja enaliviwa korowa. Ninga yopadduwa ya makiristawu oobajha, anamaholela oofwanelela enothomiwa wi ‘ekukulege mulogo wa Mulugu’. (Atos 20:28) Anamaholela a mulogo ayo athu athotho owithwelavo omuzimuni enaholela mulogo ni enakukula nikuru ‘moohuwaddihedhiwa, mbwenye ni murima watene, nuuwivelela.’ (1 Pedro 5:1-3) Anamaholela mulogo ayo enanikavihera addi?

Aliwa enonisamalela ni enoonibarela. Anamaholela mulogo enokukula ni enokavihera obarela mulogo epaddi yomuzimuni. Yubuwelaga wi athomele di Mulugu oneti ola wathima aliwa kinithukula vaari vamulogo, mbwenye enowilibihera wihina mulogo okalege ni murenddele ni wohagalalene. (2 Coríntios 1:24) Ninga namakukula anivelela wihina aanone pama mambila aye, anamaholela mulogo enosayela makalelo wi yanone pamadhene addibila a mulogo wewa. — Provérbios 27:23.

Aliwa enonihudhiha makalelo owerana efunelo ya Mulugu. Sumana dhatedhene anamaholela mulogo enoweddiha mutugumano dha mulogo wi elibihe nroromelo nehu. (Atos 15:32) Ohiya eyo anamaholela ayo owivelela yotajhiha yapama ya mmalaleyelo, aliwa enonivelela mmabasani ala ni enonxagiha ni makalelo atene owapara mabasa yala.

Aliwa enomulibiha kadda muthu. Wi enisamalele epaddi yomuzimuni, anamaholela mulogo ehu enonipaada mmavade mwehu obe mu Nyumba Yomwene wi enikavihere ni enlibihe emulabiheraga Bibliya. — Tiago 5:14, 15.

Ohiya mabasa enapariwa mmulogoni, anamaholela owinjhiva ehikanna ganyo ni enokabelela emudhi, dhego dhendha dhinohoowela mudhidhi wi yerena. Mohanganyedha addibila ayo owilibihera enofwanelela orihiwa vanlubale. — 1 Tessalonicenses 5:12, 13.

• Mabasa aanamaholela mulogo baavi?

• Anamaholela mulogo entonyihedha addi wi ennapwata athu atene mmulogoni?