Bernabe ni Pawulo enothabwa owogiwa mu dholebela dha Egeregu. Aliwa yakavihera ninga anameeddela mulogo ni ehipaada mulogo dha nsaka noobajha. Mwaha waddi? Mwebaribarene yowapwatha addibiliwa a munroromeloni. Pawulo wera ohoowela vanlubale ‘owelela apaade addibila wi anone makalelo eliwa.’ Oliye owivelela weedda olenddo wa mazana a mazana a makilometuru wi alibihe addibila. (Atos 15:36) Anameeddela mulogo ehikanna efunelo emodhave.

Enoodha onlibiha. Kadda nameeddela mulogo anopaada mulogo dhowakwa 20, kadda sumana mulogo mmodha, yaka yantero enapaada dila bili kadda mulogo. Aliwa, vamodha namwariwa, akala ehitela podi onikavihera vanlubale mwaha wa thotho enniwana. Aliwa enowilibihera wanona azombwe vamodha naleya owunnuwelavo ni enodhiveliwa onivelela mmalaleyelo ni nadhowaga wahudhiha anamahudherihu. Aliwa, enodhowa waredhela woholela vamodha nanamaholela mulogo, enowoga mwaha dhohagalasa mmutugumanoni, ni wakala musonkano wi enlibihe. — Atos 15:35.

Aliwa enonithuwathuwela iyo atene. Anameeddela mulogo enothuwathuwela epaddi yomuzimuni ya kadda mulogo. Aliwa enotugumana nanamaholela mulogo vamodha ni adhari ookavihera wi ethapanyedhe dhithu dha mmulogoni ni enowavaha dholaga wi esamalelege mutholo dhiwa. Enowakavihera apiyonero wapara mabasa apama, enodhiveliwa wanona anamahudhera axa ni akala enowuunuwelavo epaddi yomuzimuni. Addibila ayo awilibihera enowivelela ninga ‘akwihu ni ale nnaparihuna vamodha mabasa’. (2 Coríntios 8:23) Nnofwanelela otajhiha nroromelo newa ni makalelo ewa omulabela Mulugu. — Hebreus 13:7.

• Anameeddela mulogo enapaadela ddi mulogo?

• Opaada wewa mulogo onuukavihere addi?