Mudhidhi Yesu ahalaga neena wi apiwe ahiwoga: ‘Muthenga wapama womwene ommadha olaleyiwe mwilaboni yatene yavati, wengo winafwanyeya athu, vano omakuthulo wifiye’. (Mateus 24:14) Mbwenye, ki mabasa ala oolaleya elabo yatene yegeredhiwe addi? Wodhela ohara makalelo oolaleya a Yesu mudhidhi agari elabo yavati. — Lucas 8:1.

Nnothapanya naathu mmavaade mwewa. Yesu ahaxagiha anamaharaye olaleya nyumba ni nyumba. (Mateus 10:11-13; Atos 5:42; 20:20) Anamalaleya ala a nsaka noobajha, yahithomeliwa murudda wolaleya. (Mateus 10:5, 6; 2 Coríntios 10:13) Ni makalelo mamodhave, mabasa ehu a peeno oolaleya yegeredhiwe mwa mukalelo odhuwanyeya, kadda mulogo onosakuleliwa murudda wolaleyawo. Eyo enokavihera wakwaneliha madhu a Yesu ‘olaleya ni ovaha onamona wowakwana’. — Atos 10:42.

Nnowilibihera walaleya athu mburo bu mburo munafwanyeyiwa. Yesu ohuvaha yotajhiha oolaleya mburo vinavira anamwinjhi, ninga seresere ya niya, obe mmatxelani a murudda. (Marcos 4:1; João 4:5-15) Ninga Yesu, iyo nnothapanyedha wodhela Bibliya mburo watene nnafwanyihumo athu: mudila, vamusika, vaparajeni obe ni telefoni. Yawedheyaga, nnowavaha onamona amwanddamani, akwihu oomabasani, ooskola obe amudhihu. Mwaha wilibihera, athu matxikwi ni matxikwi elabo yatene ya vati enowiwa ‘muthenga dhaye dhapama dhinavulusa’. — Salmos 96:2.

Ohumunona muthu oothapanyana muthenga dhapama ni omwaddeliha makalelo onaamukaviheriwa osogolo? Kukoye muthenga ndho dha ejhehedhelo. Wawaddelege athu mowaguva!

• ‘Muthenga dhapama’ dhinahoweleya olaleyiwa sivi?

• Anamona a Yehova enamutajhiha addi Yesu makalelo oolaleya?