Wanonne Anamona a Yehova angasi? Podi wera mwanddamani awo, mukwawo omabasani, obe oskola. Obe we ohuthapanya ni mmodha wa iyo muselu dha mBibliyani. Mwebaribarene nili aani, mwahaya bwaddi nigawaddela athu amodha ndhe nnarumedhihu?

Nnooligana naathu amodha. Nili athu a malogo ni dhikalelo dhoohiyana-iyana. Amodha wa iyo nahikanna gereja obe kanarumedha wi Mulugu ohukalawo. Mbwenye, nihinakale Anamona a Yehova, nibanjhe ozusa dhohudhiha dha Bibliya. (Atos 17:11) Iyo orumedha nihudherihu vano othoma omweebedha Yehova Mulugu.

Omuhudhera Bibliya ononikavihera. Ninga athu amodha nihikanna makathamiho ni nnowukuwa. Mbwenye nihoona wi naparihedhaga mabasa malagano a mBibliyani kadda labo egumi yehu onothabwa owomihedheya. (Salmos 128:1, 2) Eyo ethu enaneriha wawaddela athu amodha dhithu nnahudherihu mBibliyani.

Nnohara dhohudhiha dha Mulugu. Dhohudhiha ndho dhinazusiwa mBibliyani dhinoneriha okanna makalelo apama, waariha athu amodha, nihiwogaga ekalelo ninga orolomeleya ni opama. Dhinowakavihera athu okanna egumi yapama, okala athu olabesesa, ni dhinokongomedha okala owiwanana ni okanna emuthu yapama. Nihikanna ebaribari wi ‘Mulugu kanna nsakulo’ finvo addibilihu eri wapela elabo yatene, kinna nsakulo obe kinivolosiha mpulitikani, nnowiwanana mwaha wa dhorumedha dhehu. Naari nliganaga naathu amodha, niri nlogo navayekiwa. — Atos 4:13; 10:34, 35.

• Anamona a Yehova enaligana addi naathu amodha?

• Dhohudhiha dha Mulugu Anamona a Yehova enazusiwa mBibliyani sivi?