Bibliya ahiwoga wi Kiristu akwa, vari va makiristawu obajha yere okumelela anamahudhiha owoota yavunganyedhe ebaribari ya mBibliyani. (Atos 20:29, 30) Nuvira mudhidhi yahipadduwa. Aliwa ovunganyedha dhohudhiha dha Yesu ni yubuwelo dha gereja dha epagaawu, vano okalawo makiristawu otajhiha. (2 Timóteo 4:3, 4) Ki nnaanone addi wi peeno nihikanna enonelo yeebaribari ya mBibliyani?

Mudhidhi wa Yehova woovitula ebaribari. Yehova ahiwoga wi ‘mudhidhi wokuthula, enonelo yeebaribari kinarameye.’ (Daniel 12:4) Yaka ya 1870, nikuru ning’ono naathu nasayela ebaribari woona wi dhohudhiha dhanyagereja owinjhiva kadhadhela mBibliya. Vano aliwa obajha otiba wihina efwanye dhohudhiha dhebaribari dha mBibliyani, Yehova wareliha.

Athu oowoma murima yahilibihedha omunonelamo Bibliya. Anamahudhera a Bibliya ale owiveleela obaajha, yohara makalelo omuhudhera Bibliya enalabihedhiwa peeno. Yomuhudhera Bibliya muselu ni muselu. Yafwanya yolebela yorusa aliwa yosayela yotapulelaya va yolebela emodha. Yoona wi enowiwanana ni dholebela dhimodha aliwa yoleba dholebela ndhe dhiniwanana. Mwaha ohiya wi Bibliya iitapulelege, aliwa ovitula ebaribari ya mBibliyani wodhela ndina na Mulugu, Omwene, efunelo yaye ni elabo ya vati, ekalelo ya muthu ookwa, ni njhehedho novenyihiwa muukwani. Otiba wewa ohakavihera orula dhilemelelo ni dhorumela dhowoota. — João 8:31, 32.

Yaka ya 1879, anamahudhera a Bibliya yahonelamo wi wahifiya mudhidhi wolaleya ebaribari ofiya venvo vaagomele kopolo dhiwa. Vano yaka yele aliwa wambela omuleba A Sentinela Alaleyaga Omwene wa Yehova, revista nnalebiwa ofiyedha peeno. Ovanene nnolaleya ebaribari ya mBibliyani dhilabo dhowakwana 240 ni dhiwogelo dhokwaranya 750. Kinavituwege ‘enonelo yeebaribari’ ninga peeno!

• Nuukwa Kiristu epadduwe ddi?

• Enikavihere ovitula ebaribari ddi?