Madhu owoga ‘piyonero’ anagiwana muthu anabajha osakasa murudda itaga dila exa wi athu amodha eviremo. Podi owoga wi Yesu ali piyonero, mwaha wi aarumiwe odhulu odha mwilaboni yavati wi alaleye muthenga wowobola dhigumi, afugulaga dila enaya omavulusiwelo. (Mateus 20:28) Peeno, anamahara aye enotajhiha mweddelo waye mwaha wolabihedha mudhidhi wowinjhivene yaavedaga ‘anamahudhera’. (Mateus 28:19, 20) Amodha enowapara mabasa enithaniwa mabasa oopiyonero.

Piyonero namalaleya a mudhidhi wamutene. Anamona a Yehova, aatene anamalaleya a muthenga dhapama. Mbwenye amodha, enowegeredha egumi yewa wi elabe ninga apiyonero a mudhidhi wamutene va mwerini epelekaga mawora owakwana 70 a mabasa oolaleya. Wi yande werana ndo owinjhiva enaveda ganyo-ganyo onvaha mudhidhi. Amodha enosakuliwa okala apiyonero avayekiwa elabweyo winahoweleya anamalaleya Oomwene, kadda mweri opelekaga mawora owakwana 130 a mabasa oolaleya. Apiyonero enahisa mweddelo wokalawo wohuthuwathuwela oreela, eroromelaga wi Yehova onere wavaha dhatedhene dhinahalela. (Mateus 6:31-33; 1 Timóteo 6:6-8) Ale ehinawedha okala apiyonero a mudhidhi wamutene, podi dhenyeya, okala apiyonero ookavihera, va mwerini epelekege mawora owakwana 30 obe 50 a mabasa oolaleya.

Winamuthugula murima piyonero fudhivela oriyena ni Mulugu vamodha naathu. Ninga Yesu, iyo nihinona wi athu a mudhidhi ola eli ookwerebeyene omuzimuni. (Marcos 6:34) Mbwenye iyo nihikanna muthenga onakavihere aliwa malabo ala oorusa, ofiyedha aliwa okanna ejhehedhelo yapama osogolo. Odhivela naathu, winomuthukula piyonero olabihedha mudhidhi wowinjhivene obe olabihedha kopolo dhaye wi aahudhihe athu muthenga dhapama. (Mateus 22:39; 1 Tessalonicenses 2:8) Piyonero erana ndo, onolibiha nroromelo naye, onolibiha wandana waye ni Mulugu ni onowenjhedha murenddele waye. — Atos 20:35.

• Woona wawo, piyonero baani?

• Enaathukula athu okala apiyonero amudhidhi watene ddiniyani?