Wihina nilaleye mwamakalelo apama, ‘muthenga dhapama’, ‘malogo, mahimo, dhiwogelo ni athu atene,’ nnowaleba malivuru a dhiwogelo dhokwaranya 750. (Apocalipse 14:6) Nnanda addi wapara mabasa ala? Mwaha okavihera wa nikuru na aliba oleba a elabo yatene, vamodha ni anamatapulela oviheya, atene Anamona a Yehova.

Vobajha malivuru ayo enalebiwa ni Engeleji. Nikuru Nolamulela nnowasogolela mabasa a Departamento Yoleba o sede enlubale ya Anamona a Yehova. Departamento eyo enosogolela dhothomeliwa dha anamaleba o sede enlubale ni Filiyale dhimodha. Okanna anamaleba a elabo dhatene enokavihera owoga muselu wa dhilabo dhohiyana-iyana, dhinathukula murima anamileri a dhilabo dhohiyana-iyana.

Vano ovahedhiwa anamatapulela. Numala olebiwa ni orumedhiwa malivuru ayo, enovahedhiwa anamatapulela eelabo yatene elabihedhiwaga internet. Aliwa enowatapulela, enosugwa pamadhene, ni enowona akala ehilebeya pama. Enowilibihera osakula ‘madhu ebaribari, ninga munawogeliwiwa’, madhu eniwanana ni ale elebiwe livuru na Engeleji. — Eclesiastes 12:10.

Akomputadori enokavihera mabasaya. Akomputadori yekiwa kinanda wapara mabasa aanamaleba ni aanamatapulela. Naari dhigari ndo, enokavihera mwaha wa disiyonariyo, porogarama a komputadori enniwana ni faramento dha osayelana dhithu. Anamona a Yehova ehikanna Sistema Enaalebiwana Malivuru a dhiwogelo dhowinjhiva (MEPS) enowandeya ofwanya musistemani muselu dha ewogelo dhowinjhiva mudhidhi mmodhave. Bu mwahaya mudhidhi woopida livuru nnokumana fotu ndezenyudha.

Mwahaya bwaddi nigiilibihera, otapulela dhiwogelo dhinawogiwa naathu owinjhiva naathu vang’ono? Mwaha Yehova ‘onafuna wi athu atene evuluwe ni enone ebaribari.’ — 1 Timóteo 2:3, 4.

• Malivuru ehu enalebiwa addi?

• Mwahaya bwaddi nigatapulela dhiwogelo dhowinjhiva?