Nsaka na makiristawu, nikuru nig’ono na ‘anamahara a Yesu ni anamaholela mulogo oJerusale’ yahilaba ninga Nikuru Nolamulela wi ethomege dhithu dhofuneya ni ndina na mulogo dhatedhene na addibila oothikitheliwa. (Atos 15:2) Aliwa yofiyedha othoma ni ohuvanyihana mwaha ohara dholaga dha mBibliyani ni muzimu wotxena wa Mulugu. (Atos 15:25) Mukalelo yola onoohariwave ofiyedha peeno.

Nnalabihedhiwa ni Mulugu wi nerena efunelo yaye. Addibila oothikitheliwa enalaba ninga Nikuru Nolamulela enothuwathuwela madhu a Mulugu ni ehikanna thotho dhoweddiha muselu dha labo ni labo ni dhomuzimuni. Aliwa enotugumana sumana dhatedhene wi etakunele dhohalela dha addibila a elabo yatene. Ninga nsaka na makiristawu obajha, dholaga dhinakumihiwa mBibliya dhinogawiwa wodhela makarta obe anameeddela mulogo ni athu amodha. Eyo enoweriha wi mulogo wa Mulugu okale wowiwanana mmubuweloni ni mmabasani. (Atos 16:4, 5) Nikuru Nolamulela nnokabelela mabasa osasanyedha yojha yomuzimuni, nnovaha thima mabasa olaleya Omwene ni nnowathoma addibila wi ekanne mutholo munikuruni mwa Yehova.

Nnahara dhoholela dha Muzimu wa Mulugu. Nikuru Nolamulela nnosayela dhoholela ni Namathonga Eelabo yatene, Yehova ni dhoholela dha Yesu ali Musolo wa mulogo. (1 Coríntios 11:3; Efésios 5:23) Nikuru nno kanniyona ninga Mweneya a nikuru na Mulugu. Aliwa ni ale oothikitheliwa ‘enahara Ninbila mburo bu mburo nnayiwa’. (Apocalipse 14:4) Nikuru Nolamulela nnovaha thima nalobelelaga aliwa.

• Aali epaddi na Nikuru Nolamulela nsaka nooroma na makiristawu baani?

• Makalelo baani Nikuru Nolamulela nnasayeliwa dhoholela dha Mulugu?