Athu owinjhiva enohiya odhowa ogereja wewa mwaha kinfwanya otodoliwa newene dhowakula dhohagalasa dha makoho ewa. Ki yuthukulele odhowa omutugumanoni dhineriwa ni Anamona a Yehova ddi? We onaafwanyemo ddi?

Ohagalala okala naathu enooniha odhivela ni enapwathana. Malabo aarumiwi makiristawu yegeredhiwe mmulogoni ni yootugumana wi emwebedhe Mulugu, emuhudhere Bibliya ni elibihane mmodha ni mukwaye. (Hebreus 10:24, 25) Mwaha wa otugumana vego vili odhivela, aliwa yoona wi yaali athu enna odhivela webaribari: yaali addibila omuzimuni. (2 Tessalonicenses 1: 3; 3 João 14) Iyo nnahara mweddelo yola nnowoona ohagalala wimodhave.

Mareliho eliwo mwaha ohudhera ni ovirihamo dholaga dha mBibliyani. Ninga malabo a makiristawu obajha alobwana, ahiyana, ni ahima enotugumana aatene vamodha ni anamahudhiha oofwanelela enomulabihedha mabasa Bibliya wi enikavihere onona, ovirihamo dholaga dha mBibliyani labo ni labo. (Deuteronómio 31: 12; Neemias 8: 8) Aatene podi woniha nroromelo newa wodhela dhowakula dhewa obe wiba mmutugumanoni. — Hebreus 10:23.

Mareliho okanna nroromelo nooliba ni Mulugu. Murumiwi Pawulo ahawaddela athu a mulogo wa mudhidhi waye eraga: ‘Mwebaribarene ginofuna vanlubale wuwoonani, wi nilibihane omuzimuni wodhela nroromelo nehu, nenyu ni naga.’ (Romanos 1:⁠11, 12) Mmutugumanoni okala naaddibila onoolibiha nroromelo ni yothoma yehu ninga mukiristawu.

Onowithaniwa wi odhe woone ni mentwawo mutugumano wehu woharela ela elebiwe epaddi ela. We onere wakeliwa pama! Kunakukusiwa korowa dha mutugumano dhatene newene kineeddiwana togwa.

• Mutugumano dhehu dheekiristawu dha mmulogoni dhinahara makalelo baani?

• Otugumana winanikavihera addi?