Akala we onomuhudhera Bibliya ni Anamona a Yehova, podi wera onowegeredha epaddi dhatedhene dhinahudherinyu. Enere okala pama werana emodhave nihinafiye labo nodhowa otugumana wi opurelemo ethu-sithu. Onowawakela mareliho weragana ndo malabwene.

Osakule mburo ni mudhidhi onahudheregiwe. Mudhidhi baani onpwaseyiwe? Mambesi, ohunarome olaba, txiguwo, obe mahiyu anawo yagonelavo? Naari ohandaga ohudhera mudhidhi wowinjhiva, osakule mudhidhi wohudhera ni wilibihedhe wi ethu-sithu enaadhe yuholose. Ovede mburo womaleya, omaalihe dhatedhene dhinaruma ninga TV, radiyu, obe telefoni. Olobela ohunathi ohudhera, winere wukavihera ovugula mubuwelo wa dhego dhalabo ni labo wihina mubuwelo wawo okale baahi ni madhu a Mulugu. — Filipenses 4:6, 7.

Wegeredhe ni okweretemo munafuniiwe waakula. Vobajha, onone muselu watene. Wubuwele musoloya, opendde makalelo mwana musolodha dhinaharaniwa ni museluya, woone fotudha ni makoho ogwaddela enawoga thomodha dha thima. Wileri kadda ddima, ovede ofwanya yowakula ya makoho elebiwe. Ovede ni wileri dholebeladha dhitonyiwe ni wubuwele makalelo enaharaniwa ni museluya. (Atos 17:11) Wafwanya yowakulaya, okwerete obe olebe nikome madhu enuukavihere wubuwela yowakulaya mudhidhi wamutugumano. Mutugumano weddaga, wafuna we podi ovenyiha nlada wakule ni madhu awo mwamakalelo okweya.

Ohudhera muselu dhohiyana-iyana dhinahudheriwa sumana dhatedhene mmutugumanoni, dhinere okavihera yubuwelo yawo wenjhedhedha enonelo exa ni ‘dhorela’ dha mBibliyani. — Mateus 13:51, 52.

• Ddanddandda awo duuvi anukavihera wiyegeredha?

• Oniyegeredhe addi wi wakule mmutugumanoni?