Iyo makiristawu kannaselela otugumana naari naabuwaga mwihinjhe, nipahiwaga nduwa obe nirubwiwaga musongwe. Naari nifwanyiwaga makathamiho mwigumini obe nigari oogomeene mwaha wa mabasa a kadda labo, mwaha bwaddi Anamona a Yehova egilibihera okala naddibiliwa a munroromeloni?

Ononikavihera. Pawulo ohuwoga wodhela wandana wa addibila a mmulogoni, oliye wera ‘nubuwelanege mmodha ni mukwaye.’ (Hebreus 10:24) Madhu ala enatapulela ‘opwasedhana’ obe nisayele wanona addibilihu. Nna nikongomedho wi nisamalelanege. Nasayela onona murala dhimodha dha makiristawu nnere wafwanya addibila amodha enagonjhiha makathamiho enaligana naale ninnihuna, ndo aliwa podi onikavihera.

Winolibiha wandana wehu. Mmutugumanoni mwehu kannakala naathu nanonnihu baahi, mbwenye nnakala naakwihu odhivela. Mudhidhi mmodha, nnokala naliwa wihina naredhe mwamakalelo apama. Okala naaddibilihu onanikavihera addi? Nnohudhera orihana, eyo enolibiha odhivela wehu. Addibilihu ni arogolihu yafwanyiwa makathamiho nnowakavihera. (Provérbios 17:17) Okala naaddibilihu aatene a mmulogoni nnowoniha wi ‘nnosamalelana’. — 1 Coríntios 12:25, 26.

Nnowukongomedha wi wandane naale enerana efunelo ya Mulugu. Onere wafwanya akwawo apama vari va Anamona a Yehova. Kuhiye wi ethu sithu yuhihe wandana ni iyo.

• Mwamakalelo baani okala ni addibila onanikaviheriwa?

• Onafuna onone mulogo wehu alini?