Yapadduwa ngovi, Anamona a Yehova enowiwegeredha mowaguva wi yakavihere addibiliwa efwanyiwe ngovi. Wilibihera wula winoniha odhivela ninnihuna mmodha ni mukwaye. (João 13:34, 35; 1 João 3:17, 18) Nnakavihera addi addibilihu?

Wodhela yovelela yodhifunela. Nsaka noobajha dala yuunlubale yahathanyuwela makiristawu oJudeya, makiristawu oAntiyokiya wakavihera addibiliwa ni yovelela yodhifunela. (Atos 11:27-30) Peeno, nanona wi addibilihu ehifwanyiwa makathamiho, nnolabihedha mulogo wi nivahedhe yovelela yodhifunela wi nakavihere addibilihu efwanyiwe makathamiho. — 2 Coríntios 8:13-15.

Nnowakavihera neraga ethu sithu. Anamaholela mulogo a murudda yole wipadduwe ngovi enowilibihera wasayela addibila wi enone akala eli apamene. Komisawu Yokavihera yapadduwa ngovi, enosogolela mabasa ogawa yojha, manjhe apama, dhowara, ofwanya mburo wokala, ni wakavihera athu ofwanya murombwe. Anamona a Yehova owinjhiva enaanda wapara mabasa bi mabasa enowivelela odhowa wipadduwe ngovi wi yatxove mabasa ookavihera yapadduwa ngovi, ovenyihedha nyumba, obe Nyumba Yomwene dhimonthe. Wiwanana ninnihuna munikuruni, yaka dhowinjhiva dha mabasa nilabaga vamodha dhinonikavihera wathamagela addibila yafwanyiwa ngovi. Naarive nthabwaga wakavihera ‘ale eneera epaddi yemudhi yehu yomuzimuni’, yandeyaga nnowakavihera athu amodha nihipwathaga gereja enalobeliwa. — Gálatas 6:10.

Nnowakavihera epaddi yomuzimuni ni mubuwelo. Ale enafwanyiwa ngovi enohowela olibihiwa vanlubale. Yapadduwa ngovi aliwa podi olibihiwa ni Yehova, ‘Mulugu a olibiha watene.’ (2 Coríntios 1:3, 4) Nnohagalala vanlubale nawogaga mpaganyo dha mBibliyani naathu osegedheya, nawaddelaga wi Omwene wa Mulugu onere omariha ngovi dhatene ni goyi. — Apocalipse 21:4.

• Anamona a Yehova enaanda addi okavihera mowaguva yapadduwa ngovi?

• Athu yafwanyiwa ngovi nnalibiha addi epaddi yomuzimuni?