Livuru nna ninna musolo Makalelo oolabihedha malagano a mBibiliyani mwigumini mwehu nnere wukavihera ofwanya versu ni dhopadduwa dha mBibiliyani dhinukavihere wawanana makathamiho a kadda labo. Teto nnere wukavihera ofwanya dhipaddi dha mBibiliyani wihina walibihena amodha ni wakongomedha aliwa werana dhothoma dhinamuthithimiha Yehova. Odhave ofwanya muselu onafuniwe; ohiye wihina makoho ni ogwaddeliwa wa dhopadduwa dha mBibiliyani dhuholele. (Osugwe kwaduru “ Makalelo oolabihedha livuru nna.”) Mohulegela onere ofwanya dholebela dhowinjhiva dha mBibiliyani dhili ntxela nootodola ni dholaga. Onere ofwanya versu dha mBibiliyani dhinaahagalase, dhinaakavihere otxokotxela muladdu ni dhinalibihe.

Livuru nna kadhitonyiwe dholebela dhaatedhene wa kadda musolo. Mbwenye nnere wukavihera obajha osayela muselu dhimodha. (Pr 2:1-6) Wihina wonelemo pamadhene, olabihedhe referensiya ni manota enafwanyeya mu Tradução do Novo Mundo da Bíblia Sagrada. Omulabihedhe Guia de Pesquisa para Testemunhas de Jeová obe Índice das Publicações da Torre de Vigia wihina ohudhereve yotapulela ya kadda yolebela ya mBibiliyani obe makalelo oolabihedha. Osayele muselu dhikumihiwe ovanene wihina ofwanye monelo muxa wodhela ebaribari ya mBibiliyani.

Nnojheha wihina livuru nna Makalelo oolabihedha malagano a mBibiliyani mwigumini mwehu nuukavihere ofwanya thotho ni enonelo eli mu Dholebela Dhootaleleya. Walabihedhaga livuru nna, onere okanna ebaribari wihina “madhu a Mulugu ehikanna kopolo.” — Eb 4:12.