Mpaddusi ehu da thotho onipitha iyo. Ninga Babi odhivela, oliye ononipwatha. Mulugu kanipadduse wi iyo nikalegewo nihiholeliwaga nuliye. (Jeremias 10:23) Ninga mwana anahowela oholeliwa ni ababi, iyo atene nnohowela oholeliwa ni Mulugu. (Isaías 48:17, 18) Niholelo nnafwanyeya mmalaganoni a Bibliya nvaho wa Mulugu.​—Omwileri 2 Timóteo 3:16.

Malamulo ni malagano a Jeova enonihudhiha makalelo eegumi yapama ovanene ni enonooniha mukalelo wowakela mareliho ohimala musogolo. Wona wi Mulugu dinipadduse, sapama wi niwelelege oholeliwa nuliye.​—Omwileri Salmo 19:7, 11; Apocalipse 4:11.

Malagano a mBibliyani si nikoma na malamulo. Mbwenye malamulo podi okumihiwa wihina elabihedhiwe wa ethu sithu. (Deuteronómio 22:8) Sofuneya olabihedha mubuwelo wehu wihina nnonelemo makalelo enalabihedhiwa malagano a mBibliyani wa ethu sithu. (Provérbios 2:10-12) Motajhiha, Bibliya ononihudhiha wi egumi nvaho wa Mulugu. Nlagano nno podi oneeddiha omabasani, vaade nari mulenddoni. Nlagano nno nnonithukulela okala obareleya.​—Omwileri Atos 17:28.

Yesu ohawoga malagano menli eli oofuneya wahara. Nooroma nnowoniha mwahaya bwaddi Mulugu aapadduseliye athu. Mulugu aapaddusele athu wihina emunone, emudhivele ni emulabele nuroromeleya.  Sofuneya wi nilabihedhege nlagano nna nooroma modhela dhosakula dhehu dhatedhene. (Provérbios 3:6) Ale enalabihedha ni murima watene nlagano nna enokanna wandana ni Mulugu, ohagalala weebaribari ni egumi yohimala.​—Omwileri Mateus 22:36-38.

Nlagano na nabili nnonithukulela okanna wandana wamurendele ni athu amodha. (1 Coríntios 13:4-7) Mukalelo mmodhaya wohara nlagano nna futajhiha mukalelo Mulugu anaweddihiye athu.​—Omwileri Mateus 7:12; 22:39, 40.

Malagano a mBibliyani enohudhiha murala okala dhowiwanana mwaha wodhivela. (Colossenses 3:12-14) Madhu a Mulugu enobarela murala wodhela wahudhiha nlagano nimodha noholela nnawoga wi matelo ekale a mukalakala.​—Omwileri Génesis 2:24.

Naharaga Bibliya ananihudhihiye, nnobareleya epaddi yomwilini ni dhithu dhinanukula. Motajhiha, mapatarawu owinjhiva enaafuna anamalaba enaahara malagano a mBibliyani ninga okala ororomeleya ni enilibihedha yaparaga mabasa. (Provérbios 10:4, 26; Hebreus 13:18) Madhu a Mulugu enonihudhiha okala ohagalala akala dhohowela dhehu dhinowakwanelihiwa. Bibliya ononihudhiha ovaha thima wandana ni Mulugu opitha dhego dhomwilini.​—Omwileri Mateus 6:24, 25, 33; 1 Timóteo 6:8-10.

Naharihaga malagano a mBibliyani enokoya egumi yehu. (Provérbios 14:30; 22:24, 25) Motajhiha, wawiwelela malamulo a Mulugu wodhela ong’wa wokwaranyiha winonibarela wa dhiredda dhinapa ni ngovi. (Provérbios 23:20) Jeova kananikoddiha dhong’wa dhowawa, mbwenye ning’wege ni opimelela. (Salmo 104:15; 1 Coríntios 6:10) Malagano a mBibliyani enonikavihera mwaha enonihudhiha okala pasope ni dhowera dhehu vamodha ni dhowubuwela dhehu. (Salmo 119:97-100) Makiristawu eebaribari kinawiwelela malagano a Mulugu wihina yikavihere yekiwa bahi. Mbwenye aliwa enowerana eyo wihina emuthithimihe Jeova.​—Omwileri Mateus 5:14-16.