Mohanganyedha, dhohudhiha dha mBibliyani nonilihu ofiyedha vala dhihilibiha odhivela wawo ni Jeova. Mbwenye odhivela wula winohowela olibihiwave. (1 Pedro 2:2) We onere okanna egumi yohimala wadidela onfiyedha Mulugu modhela omuhudhera Bibliya.​—Omwileri João 17:3; Judas 21.

Enonelo yawo wodhela Mulugu yunnuwagave, nroromelo nawo nnere oliba. Nroromelo nawo nnere wukavihera omuhagalasa Mulugu. (Hebreus 11:1, 6) Nnere wukavihera othwaruwa ni osaddula egumi yawo.​—Omwileri Atos 3:19.

Sononeya wihina we onohowela wawaddela athu amodha dhihudheriwe. Iyo atene nnodhiveliwa olaleya muthenga dhapama. Wadidela omuhudhera Bibliya onere ohudhera omulabihedha Bibliya wihina wawaaddele athu amodha nroromelo nawo ni Jeova vamodha ni muthenga dhapama dhinniyena.​—Omwileri Romanos 10:13-15.

Athu owinjhiva enambela owoga naakwiwa vamodha naamudhiwa dhithu dhapama dhihudheriwa. Mbwenye kawaaddele ni mukalelo wapama. Ohiya wawaddela wi webedha wewa fowoota, kawoga dhithu dhipaganyile Mulugu. Wubuwele wihina athu owinjhiva enodhiveliwa ni dhithu dhinerihuna opitha dhinawogihu.​—Omwileri 2 Timóteo 2:24, 25.

Omuhudhera Bibliya winere wukavihera wunnuwelavo epaddi yomuzimuni. Vasogolova, onere okanna wandana  wapama ni Jeova. Ebaribarene, we onere okala namwebedha aye.​—Omwileri 2 Coríntios 6:18.

Eri yowedheya wunnuwelavo epaddi yomuzimuni wadhowaganave omuhudhera Bibliya. (Hebreus 5:13, 14) Kamulobe Namona a Jeova wihina omuhudherege Bibliya nuliye mulabihedhaga livuru O Que nos Ensina a Bíblia? Wadhowaganave omuhudhera Bibliya, egumi yawo enere wuweddela pama.​—Omwileri Salmo 1:1-3; 73:27, 28.

Muthenga dhapama dhinadhela wa Jeova, Mulugu ohagalala. Kanfiyedhe Jeova modhela osayela nlogo naye. (Hebreus 10:24, 25) Wilibihedhaga omuhagalasa Jeova onere ofwanya egumi yeebaribari — egumi yohimala. Mohanganyedha, onfiyedha Mulugu ethu yapama onafwaneliwe werana.​—Omwileri 1 Timóteo 1:11; 6:19.