OHUDHERA 12
Onanfiyedhe addi Mulugu?
1. Mulugu anowawiwa malobelo atene?
Mulugu onowawithana athu atene onfiyedha oliye wodhela nlobelo. (Salmo 65:2) Ehikalawo malobelo Mulugu ahinavuruwaniye ni ahinarumedhiye. Motajhiha, Mulugu kanaavuruwana malobelo a mulobwana anamutabusa mwariye. (1 Pedro 3:7) Mudhidhi amwaana Ezarayeli yakaleliwa ntidi werana dhithu dhabure, Mulugu kavuruwana malobelo ewa. Mweebaribarene, malobelo oneeti. Naari dhigarive ndo, muthu eerana yothega enddimuwa vano athwaruwa, Mulugu onowavuruwana malobelwaye.—Omwileri Isaías 1:15; 55:7.
2. Nlobelege avi?
Nlobelo nnokosa epaddi yomwebedha Mulugu. Bumwahaya malobelo ehu edhowege wa Jeova bahi, Mpaddusi ehu. (Mateus 4:10; 6:9) Wona wi nili athu ohilogomana, nilobelege mwa ndina na Yesu, mwaha wi oliye ohukwa wodhela dhothega dhehu. (João 14:6) Jeova kanafuna wi nalobelaga nawogege madhu mamodhave naari oolebiwa. Oliye anafuna nilobelege ni murima watene.—Omwileri Mateus 6:7; Filipenses 4:6, 7.
Mpaddusi ehu onowawiwa malobelo mmurimani-mmurimani. (1 Samuel 1:12, 13) Oliye onoonithana wihina nilobelege mudhidhi watene, ninga omambelelo ni omagomihedho walabo, nafunaga ojha naari nafwanyiwa makathamiho.—Omwileri Salmo 55:22; Mateus 15:36.
3. Mwahaya bwaddi Anamona a Jeova egatugumana?
Onfiyedha Mulugu kahiyo yokweya mwahaya wi nnakala vari vaathu ehinna nroromelo ni Mulugu ni enanyoza efunelo yaye yodhana murenddele wapela elabo yatene ya vati. (2 Timóteo 3:1, 4; 2 Pedro 3:3, 13) Mowindo, nnohowela otugumana ni addibilihu wihina nlibihanege.—Omwileri Hebreus 10:24, 25.
Otugumana naathu enamudhivela Mulugu winonikavihera onfiyedha Mulugu. Mutugumano dha Anamona a Jeova mudhidhi wolibiha nroromelo nehu ni naakwihu.—Omwileri Romanos 1:11, 12.
4. Onanfiyedhe addi Mulugu?
Onere onfiyedha Jeova wodhela wubuwelela onahudheriwe mBibliyani. Kubuwelela dhowera dhaye, dhoholela dhaye ni mpaganyo dhaye. Wubuwelela madhu a Mulugu ni olobela winere onikavihera wunuwiha omutamalela wehu wodhela odhivela ni thotho dha Mulugu.—Omwileri Josué 1:8; Salmo 1:1-3.
Onere onfiyedha Mulugu wamuroromela ni wakanna nroromelo ni oliye. Mbwenye nroromelo nili ninga motho onafuna otetedhiwa mudhidhi watene wihina wahithime. Enofuneya otetedhela nroromelo nehu modhela wubuwelela dhinarumelihu.—Omwileri Mateus 4:4; Hebreus 11:1, 6.
5. Onakaviheriwe addi wanfiyedha Mulugu?
Jeova onowapwatha ale enamudhivela. Oliye onowabarela mwa dhithu dhatene dhaafune weeka vangovini nroromelo newa ni ejhehedho ya egumi yohimala. (Salmo 91:1, 2, 7-10) Oliye ononixagiha wodhela mweddelo wineeka egumi yehu ni ohagalala wehu vangovini. Jeova anonihudhiha okalawo ni mukalelo wapama.—Omwileri Salmo 73:27, 28; Tiago 4:4, 8.