Yesu dohiyana ni muthu di muthu mwaha oliye ohukala odhulu ninga muthu omuzimuni ahinathi obaliwa elabo ya vati. (João 8:23) Yesu dowambela opaddusiwa ni Mulugu. Yesu ohumukavihera Mulugu opaddusa dhithu dhatedhene. Yesu dipaddusiwe ni Mulugwene bahi, bumwahaya ithaniwaga “mwaana mmodha bahi” a Mulugu. (João 1:14) Yesu awoga mwandina na Mulugu bumwahaya anithaniwiye “Madhu”.​—Omwileri Provérbios 8:22, 23, 30; Colossenses 1:15, 16.

Mulugu ohumuruma mwaanaye odha veelaboni ya vati wodhela osaddula egumi yaye odhulu ni weeka mbani mwa namwali oJudeya ahinagonege ni mulobwana, ithaniwa Mariya. Bumwahaya Yesu kanakalegena babe omwilini. (Lucas 1:30-35) Yesu adheele elabo ya vati wihina (1) anihudhihe ebaribari ya Mulugu, (2) anihiyedhe mweddelo wowerana efunelo ya Mulugu naari naafwanyiwaga makathamiho, ni (3) avelele egumi yaye yologomana ninga “yowobola”.​—Omwileri Mateus 20:28.

Yowobola muthengo onapelekiwa wihina oboliwe muthu akala afuna apiwe. (Êxodo 21:29, 30) Mulugu aapaddusaga athu kafunne wi yuluvalege ni ekwege. Nnonile addi eyowa? Mulugu ahimwaddela mulobwana obajha, Adawu, wi werana ele Bibliya anithaniye “yothega”, onokwa. Adawu ahere ahithega, kaakwa. (Génesis 2:16, 17;  5:5) Ninga Bibliya anawogiye, okwa “ohuvolowa” mwilaboni ya vati mwaha wa Adawu. Mowindo, Adawu uhavaliha anaye atene otheega ni okwa. Nnofuna yowobola wihina enoobole muukwani nivalilihu ni Adawu.​—Omwileri Romanos 5:12; 6:23.

Anna ewedhelo ya opeleka muthengo wa yobolo wihina anobole muukwani baani? Iyo nakwa, nnalivela dhothega dhehu bahi. Mwaha wohilogomana wehu kannanda wawobola athu amodha muuthegani ni muukwani.​—Omwileri Salmo 49:7-9.

Ohiyana ni iyo, Yesu aali ologomana. Mowindo oliye kahowela okwa mwaha wa dhothega dhaye—oliye kanathegege. Yesu akwele dhothega dhathwene. Mulugu ohoniha odhivela waye winddimuwa anniyena naathu wodhela omuruma mwanaye onikwela iyo. Yesu ohunooniha odhivela waye winniyena ni iyo wodhela omwiwelela Babe ni ovaha egumi yaye mwaha wa dhothega dhehu.​—Omwileri João 3:16; Romanos 5:18, 19.

Yesu agali mwilaboni ya vati ohavulumusa aredda, ohavenyiha anookwa ni ohuvevusa goyi dhaathu. Nimukalelo ola, oliye ohoniha dhinaawereliye osogolo athu owiwelela. (Mateus 15:30, 31; João 5:28) Yesu agakwile, Mulugu ohunvenyiha ni mwili womuzimuni. (1 Pedro 3:18) Voharela, Yesu ohujheha omononi wojha wa Mulugu ofiyedha Jeova onvaha kopolo dhothonga ninga Mwene a elabo yatene ya vati. (Hebreus 10:12, 13) Mwapeno Yesu annana othonga odhulu ninga Mwene. Anamaharaye ennana ovuwiha muthenga dhapama ndha wapela elabo yatene ya vati.​—Omwileri Daniel 7:13, 14; Mateus 24:14.

Vohilegela, ninga Mwene, Yesu anere olabihedha kopolo dhaye wihina amarihe goyi ni aleya enadhiha goyi. Atene enamuroromela Yesu wodhela omwiwelela enere ojhavo egumi mParayizu mwilaboni ya vati.​—Omwileri Salmo 37:9-11.