OHUDHERA 05
Bibliya muthenga anivahile Mulugu
Yehova ohunivaha nvaho wohagalasa: Bibliya. Nvaho ola onna malivuru mang’ono owakwana 66. Vano we podi wikoha: ‘Bibliya adhele wuvi? Yubuwelo dhili mBibliyani saani?’ Wihina nawakule makoho ala nrajhihe woona makalelo nimwakenlihu Bibliya.
1. Akala athu bimulembe Bibliya, mwahaya bwaddi nigawoga wi madhu a Mulugu?
Bibliya alebiwe ni athu owakwana 40 muwari mwa yaka 1600. Livuru noobajha nlebiwe yaka ya 1513 M.W.O; vano noogomihera nlebiwe yaka ya 98 M.W. Athu amodha emulebe yaali: Anamakukula, anamatota oba teto amodha yaali anamathonga, eyo enowoniha wihina athu emulembe Bibliya yaali ohiyana-iyana. Naari dhigari ndo, dhipaddi dhatedhene dha mBibliyani dhinowiwana. Mwaha wa ddi? Mwaha wi Bibliya anadhela wa Mulugu. (Omwileri 1 Tessalonicenses 2:13.) Athu ala kilembe yubuwelo dhewa. Mbwenye ‘yahiwoga wodhela Mulugu elabihedhiwaga ni muzimu wotxena.’ a (2 Pedro 1:21) Alabihedhaga muzimu waye wotxena, Mulugu wavethela obe wathukulela alobwana ale oleba yubuwelo dhaye. — 2 Timóteo 3:16.
2. Mulugu alebenle aani Bibliya?
Mulugu aalebenle Bibliya athu a ‘malogo, mahimo, dhiwogelo ni athu atene.’ (Omwileri Apocalipse 14:6.) Bumwahaya Mulugu adhe enyege wihina Bibliya atapuleliwe ni dhiwogelo dhowinjhiva wapitha malivuru amatene. Athu a dhilabo dhatedhene podi wileri muthenga dhapama dhili mBibliyani, naari egaali a dhilabo ni dhiwogelo dhohiyana-iyana.
3. Yehova ambarele addi Bibliya?
Bibliya ohufwanyiwa makathamiho manlubale, mbwenye Yehova kahile wihina muthu obe ethu-sithu emuthihe onaddela muthenga waye. Ethu yobajha sowihina yalabihedhiwe dhithu dhihinaliba otala, ninga koru ni papiru. Ki dhandeyile avi wihina Bibliya anifwanye? Mwaha athu yamudhivela Bibliya, aliwa yokopiyari Madhu a Mulugu dila dhowinjhivadhene ekopiyarelaga koru dhixa ni papiru dhixa. Makathamiho mamodha sowihina athu yanna owedha ehixixa omutolosa Bibliya. Naari dhigari ndo Yehova ohabarela madhu aye! Mudhidhi watene wahikala athu yahela egumi yewa vang’ovini wihina embarele Bibliya. Eyo enowiwanana ni ele anawoga Bibliya egi: ‘Madhu a Mulugu ehu enokalawo ni mukala-kala.’ — Isaías 40:8.
OHUDHERE DHITHU DHIMODHA
Woone makalelo Mulugu alabihedhiye athu wihina emulebe Bibliya, makalelo ambareliye ni ethu eriliyena wihina athu atene a elabo ya vati yilerigi madhu aye.
4. Madhu a Mulugu enomuwoga mwinya a Bibliya
Woone VIDIYU. Wamala omwileri 2 Timóteo 3:16, muthapanyedhe.
-
Akala athu bimulembe Bibliya, mwahaya bwaddi agithaniwa Madhu a Mulugu?
-
Onorumedha wihina Mulugu diwaddenle yubuwelo dhaye athu enakala mwilaboni ya vati?
Sekeretariyu podi oleba karta, mbwenye madhu enafwanyeya mukartani ba mwinnya a empereza, ni makalelo mamodhave athu bimulembe Bibliya mbwenye muselu onafwanyeyamo odhele wa Mulugu
5. Bibliya ohuthabwa ofwanyiwa makathamiho, mbwenye ofiyedha peeno ohukalawo
Akala Bibliya Madhu a Mulugu, yere owomela wihina ambarele. Teto Bibliya ohufwanyiwa makathamiho owinjhiva. Muwari mwa yaka dhowinjhivadhene athu enna owedha ehixixa watolosa Madhu a Mulugu. Anamasogolela a gereja kayafuna wihina athu ekalena Bibliya. Naarive ni makathamiho ala, athu owinjhiva ehihela egumi yewa vang’ovini wihina ebarele livuru nna. Vano kabeni nimunone muthu ahenle egumi yaye vangovini wihina ambarele Bibliya. Woone VIDIYU, mwamala muthapanyedhe ponto dhinaharel.
-
Nuumala onona dhithu dhatedhene yerilena athu wi embarele Bibliya, onokanna efunelo ya omwileri? Mwaha wa ddi?
Omwileri Salmos 119:97, mwamala muthapanyedhe nikoho nnaharela:
-
Mwahaya bwaddi athu edhe ehelege egumi yewa vang’ovini wihina emutapulele ni emugawe Bibliya?
6. Livuru naathu atene
Bibliya livuru nithambwe otapuleliwa ni nnathabwa ogawiwa wapela elabo yatene. Omwileri Atos 10:34, 35, mwamala muthapanyedhe makoho enaharela:
-
Mulugu anafunela ddi wihina Bibliya atapuleliwe ni agawiwe ni dhiwogelo dhowinjhiva?
-
Enathabwa othukula murima wodhela Bibliya ddi?
Waddamela athu
100%
mwilaboni yatene
podi omwileri Bibliya ni ewogelo enoneliwamo pama
Ohukalawo ni
3000
dhiwogelo dhokwaranya
Bibliya antero obe epaddi modha
5 000 000 000
Nna numero na Bibliya epidiwe,
okwaranya malivuru amatene eliwo
ATHU AMODHA ENAWOGA YEGI: “Bibliya livuru nakale nlebiwe ni athu.”
-
We ononamo aavi?
-
Enuvaha ebaribari wi Bibliya Madhu a Mulugu ddi?
OVIRISEDHA
Bibliya Madhu a Mulugu, oliye ohera dhatedhene wihina athu atene ekalena.
Ogwaddela
-
Bibliya egi Mulugu ohavethela athu wi emulebe, enatapulela ddi?
-
Enathukula murima ddi wodhela makalelo atapuleliwe ni anagawiwa Bibliya? Ononamo avi mwaha wa Bibliya wakwaranya makathamiho amatene enfwanye?
-
Ononamo avi mwaha wa dhithu dhatedhene Mulugu eriliyena wihina uwaddele muthenga waye?
WEGI ONONE DHITHU DHIMODHA
Wileri dhithu dhimpadduwele Bibliya, obajha dholebela dha mada dhakale ofiyedha aBibliya enatapuleliwa peeno.
“Bibliya afinye aavi malabo ala a peeno” (Despertai!, Novembro a 2007)
Woone makalelo Bibliya aagonjhihiye makathamiho mararu.
“Thalako yotikiniha wodhela makalelo Bibliya afiliye peeno” (A Sentinela, n.º 4 a 2016)
Woone makathamiho yaafwannye athu yamutapulela Bibliya.
Bibliya ohutapuleliwa ni ohukopiyariwa dila dhowinjhivadhene. Ki onakanne avi ebaribari wi madhu a mBibliyani kisadduliwe?
a Ohudhera 07, nnere woona wi muzimu wotxena kopolo Mulugu analabihedhiye wihina erena efunelo yaye.
