OHUDHERA 06
Egumi ebanjhe avi?
Mulugu dili ‘ntxela na egumi.’ (Salmos 36:9) Eyoya onorumedha? Athu amodha kinarumedha wihina Mulugu dipadduse egumi. Akala eyo ebaribari, egumi epadduwe yekiwa teto kinna osogolowa. Mbwenye akala Yehova dipadduse egumi ehikanna osogolowa, kunoonelamo? a Nnafuna none ele anawoga Bibliya wodhela makalelo epaddusiwe egumi. Teto nnere woona mwahaya bwaddi ekala yapama orumedha eyoya.
1. Elabo ya odhulu ni yavati dhipaddusiwe avi?
Bibliya anowoga egi: ‘Vobajha Mulugu opaddusa elabo ya odhulu ni elabo ya vati.’ (Génesis 1:1) Masiyentista owinjhiva enorumedha wihina elabo ya odhulu ni ya vati dhihikanna omabajho. Ki dhibanjhe avi? Mulugu dilabihedhe kopolo dhaye obe muzimu waye wotxena, wihina apadduse elabo ya odhulu ni elabo ya vati, vamodha ni galasiya, thendderi ni planeta dhimodha. — Génesis 1:2.
2. Mulugu apaddusele ddi elabo yavati?
Yehova ‘kapaddusele ebewene, mbwenye apaddusele wihina mukaliwege.’ (Isaías 45:18) Ehikala ethu emuthukulele Mulugu opaddusa elabo ya vati: Afuna wihina okale murala wohagalasa ni wi athu ekalegemo ni mukala-kala. (Omwileri Isaías 40:28; 42:5.) Masiyentista enorumedha wihina elabo ya vati sohagalasa teto sohiyana ni planeta dhimodha. Aliwa kifwannye planeta emodha muli dhithu dhinahoweleya wihina wikale egumi.
3. Enahiyaniha athu ni anenyama ddi?
Nuumala opaddusa elabo, muthanko Yehova wapaddusa anenyama. Nuumala, ‘ompaddusa muthu ooligana ni oliye.’ (Omwileri Génesis 1:27.) Mwahaya bwaddi athu ehiyana ndhithu dhatedhene? Mwaha wi nipaddusiwe moligana ni Mulugu, eyo enowoniha wi iyo podi otajhiha dhikalelo dhaye ninga odhivela ni opama. Teto Mulugu ohunipaddusa ni ekalelo ya ohudhera dhiwogelo dhimodha, ni odhiveliwa mabasa ni jhibo. Mohiyana ni anenyama atene iyo podi omulabelaga mpaddusi ehu.
OHUDHERE DHITHU DHIMODHA
Kabe noone dhithu tharu dhinoniha wihina: (1) egumi ehikanna mpaddusi, (2) ele anawoga Mulugu wodhela makalelo epaddusiwe elabo enowoneleyamo ni (3) ethu nnahudherihu wodhela Mulugu mwaha wa dhikalelo enna athu.
4. Egumi ehikanna mpaddusi
Athu enothetheliwa mwaha wa oxixa werana dhithu etajhihaga ndhe dhipaddusiwe. Kunoonelamo wihina ole apadduse dhithu dhatedhene anohowela otamaleliwa? Osugwe VIDIYU, mwamala muthapanyedhe nikoho nnaharela
-
Athu etajhihiwa mwa dhopaddusa ddi?
Nyumba enadezenyariwa ni enamagiwa ni muthu. Ki apadduse dhithu dhatedhene dhili mwilaboni baani? Omwileri Hebreus 3:4, mwamala muthapanyedhe makoho enaharela:
-
Mwilaboni muhudhala dhithu dhipaddusiwe pama. Dhithu dha mwilaboni dhinutikiniha sivi?
-
Enowurusa orumedha wihina elabo ya vati ni yodhulu dhere opaddusiwa? Mwaha wa ddi?
Wahinona?
We podi ofwanya dhithu dhimodha dhinawoga wodhela muselu yola va sesawu “Teve um Projeto?” ni “A Origem da Vida: Teorias e Fatos”.
‘Mwebaribarene, nyumba yatene enamagiwa ni muthu mbwenye apadduse dhithu dhatedhene di Mulugu’
5. Dhithu anawoga Bibliya wodhela dhopaddusiwa dhinowoneleyamo
Va Génesis kapitulu 1, Bibliya anowoga makalelo epaddusiwe elabo ni dhigumi. Enofwanelela orumedha? Obe onona wi dhithu dhowoota? Osugwe VIDIYU, mwamala muthapanyedhe
-
Bibliya anoohudhiha wihina elabo epaddusiwe malabo matanu na mmodha a mawora 24?
-
Ononamo wi ele anawoga Bibliya wodhela opaddusa enowoneleyamo? Mwaha wa ddi?
Omwileri Génesis 1:1, mwamala muthapanyedhe nikoho nnaharela:
-
Masiyentista enorumedha wihina elabo ya odhulu ni yavati ehikanna omabajho. Monelo ola oniwanana avi ni ele woniliwe mBibliyani ovanene?
Athu amodha enubuwela wihina Mulugu alabihedhe oruthuwa wihina apadduse dhithu dhili mwilaboni. Monelo wewa enubuwela wihina Mulugu apadduse selula modha nuwindo selula ele osadduwaga okalaga dhigumi dhimodha. Omwileri Génesis 1:21, 25, 27, mwamala muthapanyedhe makoho enaharela:
-
Bibliya anoniha wi Mulugu alabihedhe oruthuwa wihina apadduse oba, anenyama ni athu? Obe apadduse dhithu dhatedhene dhinna egumi ni ‘makalelo ewa’? b
6. Athu ehihiyana vanlubale ndhithu dhatedhene apadduse Mulugu
Iyo nihiyana ni anenyama apadduse Yehova. Omwileri Génesis 1:26, mwamala muthapanyedhe makoho enaharela:
-
Iyo nnowanda wadhivela athu ni waweddela thagaraga. Mwaha wa ddi? Mwaha wihina nipaddusiwe moligana ni Mulugu. Eyo enanihudhiha ddi wodhela ekalelo ya Mulugu?
ATHU AMODHA ENAWOGA YEGI: “Dhithu dhinawoga Bibliya wodhela makalelo epaddusiwe elabo kahiyo ebaribari. Dhinowootiwa.”
-
We onorumedha? Mwaha wa ddi?
OVIRISEDHA
Yehova ohupaddusa elabo ya odhulu ni ya vati ni dhigumi dhatedhene dhilimo.
Ogwaddela
-
Bibliya anawoga ddi wodhela makalelo epaddusiwe elabo ya odhulu ni ya vati?
-
Mulugu alabihedhe oruthuwa wihina apadduse dhigumi dhatedhene dhili mwilaboni ya vati? Obe ere opaddusa dhithu dhatedhene modha-modha?
-
Enahiyaniha athu ni dhopaddusa dhimodha ddi?
WEGI ONONE DHITHU DHIMODHA
Woone dhopaddusiwa dhinoniha wihina wihikala mpaddusi.
“Dhopaddusa dhinanihudhiha ddi?” (Despertai!, Setembro a 2006)
Woone makalelo Bibliya anaakaviheriye ababi wahudhiha aniwa ang’ono wodhela dhopaddusa.
Woone akala enowandeya orumedha oruthuwa ni opaddusa mudhidhi mmodhave.
“Mulugu alabihedhe oruthuwa wihina apadduse dhithu dhatedhene dhinna egumi?”(Epaddi ya mu jw.org)
Amodha enihina makuva akale efwanyiwe ni dhithu enaxixa masiyentista dhinowiwanana ni oruthuwa. Mbwenye eyo ebaribari?
A origem da Vida — Cinco Perguntas Que Merecem Resposta (buruxura)
a Ohudhera 25, nnere woona efunelo Mulugu anniyena ni athu.
b MBibliyani madhu owi “makalelo ewa” enagiwana dhithu dhowinjhiva dhinna egumi.
