OHUDHERA 09

Malobelo enolibiha wandana wehu ni Yehova

ORUMIHE

Onofwanyiwaga makathamiho ogahowela yolaga? Ohukanna makoho amwegumini mwawo onafuniwe wihina ofwanye dhowakuladha? Onohowela olibihiwa ni okaviheriwa? Onofuna okanna wandana wapama ni Yehova? Malobelo enokavihera ofwanya dhowakula dha makoho ala. Ki makalelo apama a olobela baavi? Mulugu anoovuruwana malobelo amatene? Onere ddi wihina Mulugu avuruwane malobelo awo? Kabe noone muselu ola.

1. Malobelo ehu eyege wawani, ki niwogege ddi?

Yesu ohuhudhiha wihina malobelo ehu eyege wa Mulugu ehu oodhulu. Yesu alobelesa ndo. Oliye ohuwoga egi: ‘Vano, mulobelege mwegi: “Babi ehu, ali odhulu . . . ”’ (Mateus 6:9) Malobelo ehu yadhowaga wa Yehova wandana wehu winoothabwa oliba.

Nalobelaga podi owoga ethu-sithu. Mbwenye Mulugu anaawakule malobelo eniwanana ni efunelo yaye. ‘Naalobaga ethu-sithu eniwanana ni efunelo yaye [efunelo ya Mulugu], oliye onovuruwana.’ (1 João 5:14) Yesu ohuwoga dhithu dhofwanelela oromola nalobelaga. (Omwileri Mateus 6:9-13.) Ebaribari wihina iyo podi owoga dhithu dhamwigumini mwehu nalobelaga. Mbwenye kanidduwale walobelela amodha ni omutamalela Mulugu mwaha wa dhithu dhatedhene ananereliye.

2. Nilobelege ni makalelo baani?

Nalobelaga niwogege dhithu dhebaribari. Bumwahaya, Bibliya anonikongomedha wihina ‘ninfugulelege Mulugu murima wehu.’ (Salmos 62:8) Iyo podi olobela ni ndhu nootaama obe vati-vati, mawora bi mawora obe mburo watene. Teto iyo podi olobela nigakokonre, nigakiratile obe nigaali owimelene. Yinlubaleya nalobelaga nimuriihege Yehova.

3. Mulugu anawaakula avi malobelo ehu?

Oliye onowawakula mwa makalelo ohiyana-iyana. Motajhiha, mBibliyani nnofwanyamo dhowakula dha makoho ehu. Wileri Madhu a Mulugu ‘podi onvaha thotho ole ahinonne dhithu dhowinjhiva.’ (Salmos 19:7; omwileri Tiago 1:5.) Yehova podi onikurumusa naafwanyiwaga makathamiho. Teto podi walabihedha adhaari aye nahowelaga.

OHUDHERE DHITHU DHIMODHA

Woone dhithu dhinahoweleya werana wafunaga wihina Mulugu avuruwanege malobelo awo. Teto woone makalelo malobelo enukaviheriwa.

4. Egi Mulugu avuruwane malobelo ehu enahoweleya nere ddi?

Egi Yehova avuruwane malobelo ehu neregena dhithu baani? Osugwe VIDIYU.

VIDIYU: Mulugu anowavuruwana malobelo amatene? — Epaddi ya vidiyu (2:42)

Yehova anafuna wihina nalobelaga malobeloya edhowege wa oliye. Omwileri Salmos 65:2, mwamala muthapanyedhe makoho enaharela:

Ononamo wihina “Namavuruwana malobelo” anafuna wi olobelege wa oliye? Mwaha wa ddi?

Egi Mulugu avuruwane malobelo ehu, neddelege ndhe dhinamuhagalasa. Omwileri Miqueias 3:4 ni 1 Pedro 3:12, mwamala muthapanyedhe nikoho nnaharela:

Nnakanne avi ebaribari wi Yehova anere wavuruwana malobelo ehu?

Mukoddoni, makuru mamenli elobelaga wihina Mulugu akavihere ogonjhiha. Ononamo wi Mulugu anere wawakula malobelo ala?

5. Nilobelege ni murima watene

Athu amodha ehudhere wi yalobelaga wa Mulugu yavirisedhege madhu mamodhave. Mbwenye siyeyo Mulugu anafuniye? Omwileri Mateus 6:7, mwamala muthapanyedhe makoho enaharela:

Wegi ‘ohuvirisedhege madhu mamodhave’ walobelaga werege avi?

Ononamo avi kadda labo wubuwela ethu uvahe Mulugu windo owoge yeyo walobelaga? Weragana yeyo, onere woona wihina vasumanani onerege oromola dhithu tanu nabili dhohiyana-hiyana ohihogolowelaga waromola madhu mamodhave.

Babi anodhiveliwa mwanaye athapanyaga nuliye ni murima watene. Emodhave ni Yehova. Onohagalala nalobelaga ni murima watene

6. Malobelo nvaho wa Mulugu

Malobelo enaanivahe avi kopolo, thabwa-thabwa naafwanyiwaga makathamiho? Osugwe VIDIYU.

VIDIYU: Malobelo enonikavihera owanana makathamiho (1:32)

Bibliya anowoga wihina malobelo podi onivaha murenddele webaribari. Omwileri Filipenses 4:6, 7, mwamala muthapanyedhe makoho enaharela:

Ebaribari wihina malobelo kinamarihe makathamiho awo malabo amatene. Naari dhigarive ndo mwahaya bwaddi egakavihera?
Dhithu dhinudhivela walobelaga sivi?

Wahinona?

Madhu owi “amem” enatapulela “dhikale ndo” obe “ebaribari”. Okuma mudhidhi alebiwe Bibliya madhu ala enalabihedhiwa omagomihero wa malobelo. — 1 Crónicas 16:36.

7. Osayele mudhidhi wihina olobele

Malabo mamodha nnopinyaminyeya ofiyedha odduwala olobela. Olobela yaali ethu yofuneya mwigumini mwa Yesu? Omwileri Mateus 14:23 ni Marcos 1:35, mwamala muthapanyedhe makoho enaharela:

Yesu egi afwanye mudhidhi wolobela era avi?
Wegi ofwanye mudhidhi wolobela were ddi?

ATHU AMODHA ENAWOGA YEGI: “Malobelo ethu enaakurumusa athu baahi, mbwenye kinaakavihera.”

Ononelamo avi?

OVIRISEDHA

Nalobelaga ni murima watene podi okanna wandana wapama ni Mulugu, onivaha murenddele ni onivaha kopolo nnahowelihu wihina neregena dhithu dhinamudhivela Yehova.