OHUDHERA 10
Mutugumano dha Anamona a Yehova dhinukavihere avi?
Onowabihaga odhowa omutugumanoni wa Anamona a Yehova? Akala onihina naari, odhowa omutugumanoni dila yobajha podi wuthuwa-thuwiha. We podi wikoha wegi: ‘Omutugumanoniwango wineriwa ddi?’ ‘Dhikalele ddi dhofuneya?’ ‘Ginayelewo ddi?’ Ohudhera wula, onere woona makalelo mutugumano dhinukaviheriwa kadda labo ni makalelo dhinukaviheriwa onfiyedha Mulugu.
1. Ethu yunlubale enathukulela Anamona a Yehova otugumana ddi?
Namaleba dhaala a Bibliya ohuleba egi: ‘Mmulogoni ginere onvuwiha Yehova.’ (Salmos 26:12) Ni madhu ala, oliye ohuwoga ethu enlubale enanithukulela otugumana: omwebedha Mulugu. Ni makalelo mamodhave, Anamona a Yehova mwilaboni yatene enotugumana sumana dhatedhene wihina envuwihe Mulugu, emwibele ni elobele. Teto vayakani, enokanna musonkano miraru wihina emwebedhe Mulugu. Anamona a Yehova enodhiveliwa vanlubale odhowa omutugumanoni.
2. Wadhowa omutugumanoni wehu onaahudherewo ddi?
Natugumana ethu yunlubale fumuhudhera Bibliya. Nnowawileri Madhu a Mulugu ‘natapulelaga pamadhene mwamakalelo owoneleyamo.’ (Omwileri Neemias 8:8.) Omutugumanoni onere ohudhera wodhela Yehova ni dhikalelo dhaye dhapama. Wahudhera makalelo Yehova anonihiye odhivela munerege othabwa wandana. Teto onere ohudhera makalelo Yehova anukaviheriye okanna egumi yohagalasa. — Isaías 48:17, 18.
3. Omutugumanoni onere wanona athu amodha. Wanona athu ayo, winuukavihere avi?
Yehova onihina nithuwa-thuwelanege ‘mmodha ni mukwaye wi nilibihane modhivela ni mabasa apama, kanihiye otugumana.’ (Hebreus 10:24, 25, nota) Mwebaribarene, omutugumanoni onere wafwanya athu enathuwa-thuwelana. Onere wawiwa athu ewogaga dhithu dhapama dha mBibliyani. Naaliwaya enofuna ohudhera wodhela Mulugu. (Omwileri Romanos 1:11, 12.) Teto, onere wanona athu ohiyana-iyana, anamatelana vamodha ni azombwe, enahagalala naarive efwanyiwaga makathamiho. Ohona dhithu dhapama dhinereya omutugumanoni? Bumwahaya, Yehova kananikongomedha odhowa omutugumanoni ebewene.
OHUDHERE DHITHU DHIMODHA
Woone ethu enapadduwa omutugumanoni wa Anamona a Yehova. Teto ohudhere mwahaya bwaddi sapama wilibihera odhowa omutugumanoni.
4. Makalelo dhineedda mutugumano dha Anamona a Yehova
Mudhidhi wa arumiwi, makiristawu yotugumana wihina emwebedhe Yehova. (Romanos 16:3-5) Omwileri Colossenses 3:16, mwamala muthapanyedhe nikoho nnaharela:
-
Mudhidhi wa arumiwi, makiristawu yamwebedha avi Yehova?
Peeno, Anamona a Yehova enotugumana wihina emwebedhe Mulugu. Wihina onone makalelo dhineedda mutugumano dhehu, Osugwe VIDIYU. Mwamala, musugwe fotu enawoniha athu egaali omutugumanoni mwindo muthapanyedhe makoho enaharela:
-
Mvidiyuni, uhona dhithu dhinereya mu Nyumba Yomwene. Dhithu baani dhinereya dhinaligana ni ndhe dhili va Colossenses 3:16?
-
Mvidiyuni obe vafotuni, ohona ethu yudhivele?
Omwileri 2 Coríntios 9:7, mwamala muthapanyedhe makoho enaharela:
-
Mwahaya bwaddi Anamona a Yehova ehigaloba korowa mmutugumanoni?
Vamodha ni namahudhiha awo, mmoone porogarama a mutugumano a sumaneyo.
-
Epaddi ya mutugumano yudhivele obe ononiwe wi enere wukavihera sivi?
Wahinona?
Mu jw.org, onere ofwanya mburo ni mudhidhi dhinereya mutugumano elabo yatene.
-
Omutugumanoni iyo podi ovuruwana mwaha, dhipaddi dha addibila ni arogola vamodha ni vidiyu. Mutugumano dhehu dhinabajha ni dhinakuthula ni jhibo vamodha ni nlobelo
-
Dhipaddi dhimodha dha mutugumano addibila podi wakula
-
Atene enowakeliwa pama: anamatelana, azombwe, anakalaba vamodha ni anamwani
-
Omutugumanoni wa anamona a Yehova kavo anakukusa korowa
5. Enohoweleya wilibihera wihina odhowe omutugumanoni
Woone yotajhiha ya murala wa Yesu. Yaka dhatedhene yakuma oNazare edhowaga oJeruzale wi yamwebedhe Mulugu. Olenddo oyo kuwaali wokweya, woona wihina aliwa yowedda makilometuru owakwana 100, obe malabo mararu eviraga mmwang’oni. Omwileri Lucas 2:39-42, mwamala muthapanyedhe makoho enaharela:
-
Wihina muthu eedde olenddo wodhowa oJeruzale yohoweleya wilibihera?
-
Mwahaya bwaddi malabo mamodha enohoweleya wilibihera wihina odhowe omutugumanoni?
-
Ononamo wi odhowa omutugumanoni winere wukavihera? Mwaha wa ddi?
Bibliya onihina ethu yofuneya otugumana wihina nimwebedhe Yehova. Omwileri Hebreus 10:24, 25, mwamala muthapanyedhe nikoho nnaharela:
-
Mwahaya bwaddi sapama wilibihera odhowa omutugumanoni?
ATHU AMODHA ENOWOGA YEGI: “Kinahoweleya okuma vaade wihina wamwebedhe Mulugu. Wamwilerigi Bibliya ehakwana.”
-
Yolebela baani obe yotajhiha ya mBibliyani enoniha mubuwelo wa Yehova wodhela mutugumano?
OVIRISEDHA
Odhowa omutugumanoni winere wukavihera ohudhera wodhela Yehova ni okanna wandana wapama nuliye. Teto dhinere wuvaha gari yomwebedha Mulugu vamodha ni athu amodha.
Ogwaddela
-
Mwahaya bwaddi Yehova agafuna wihina ndhowege omutugumanoni?
-
Onaahudhere ddi omutugumanoni wa Anamona a Yehova?
-
Onowubuwela makalelo mamodha mutugumano dhinukaviheriwa?
WEGI ONONE DHITHU DHIMODHA
Mubuwelo wodhowa omutugumanoni onowuthuwa-thuwiha? Eyo enonpadduwelaga mulobwana dhaala. Woone ethu emukavihere odhiveliwa odhowa omutugumanoni.
Woone mwahaya bwaddi muzombwe dhaala agadhiveliwa odhowa omutugumanoni ni ethu eriliyena wihina ahiyelele.
Woone dhithu enubuwela athu amodha wodhela odhowa omutugumanoni.
“Mwahaya bwaddi sapama odhowa omutugumanoni Onyumbani Yomwene?” (Epaddi ya mu jw.org)
Omunone mulobwana dhaala aali oowali mwaha wokala epaddi ya nikuru na apanga. Woone makalelo asaddunliye egumaye nudhowa omutugumanoni wa Anamona a Yehova.
“Miyo kagedda gahinna futhi” (A Sentinela, 1.º a Julho a 2014)
