OHUDHERA 11

Onaapurelemo avi wileri wawo wa Bibliya

ORUMIHE

Wakanna mabasa manlubale enowukwerebeyiha mwaha makaleloya owabajha? Yegi yukweyele podi wera onowagawa. Podi werana emodhave mudhidhi wamwilerigi Bibliya. Podi wera onowikoha wegi: ‘Gibajhe wileri livuru baani?’ Yohudhera ela, nnere woona dhithu dhokweya dhinukavihere odhiveliwa omuhudhera Bibliya ni dhinuhagalasege wamwilerigi.

1. Ekalele ddi yofuneya omwilerigi Bibliya malabo amatene?

Muthu anamwileri Bibliya obe ‘nlamulo na Yehova,’ anere okanna egumi yohagalasa. (Omwileri Salmos 1:1-3.) Vobajha, oxixe omwileri Bibliya malabo amatene mutala dhing’onove. Wonelagamo Madhu a Mulugu onerege othabwa odhiveliwa omwileri Bibliya.

2. Mudhidhi wamwilerigi Bibliya onaapurelemo aavi?

Negi nipurelemo wileri wa Bibliya, enohoweleya ‘opendda’ ndhe nnilerihu. (Josué 1:8, nota) Eyo enatapulela wihina sapama orajhiha wimela wi nubuwele ndhe nilerihu. Wilerigi wikohege: ‘Ethu ela enagihudhiha ddi wodhela Yehova? Ginaalabihedhe aavi mwigumini mwaaga? Ginaalabihedhe aavi wihina gakaviherena athu amodha?’

3. Onasayele avi mudhidhi wihina omwileri Bibliya?

Enowurusa okanna mudhidhi wihina omwileri Bibliya? Owinjhiva wa iyo kinanikweyela ofwanya mudhidhi. Mbwenye oxixe ‘olabihedha mudhidhi wawo mwamakalelo apama.’ (Efésios 5:16) We podi wanda othoma mudhidhi wihina kadda labo omwilerigi Bibliya. Athu amodha enakweyela omwileri Bibliya mambeseene. Amodha enamwileri mutana, mudhidhi woojha. Vano amodhaya enamwileri Bibliya mahiyu, yadhowaga ogona. Ki we? Mudhidhi baani wofwanelela omwileri Bibliya?

OHUDHERE DHITHU DHIMODHA

Woone dhithu dhinukavihere odhiveliwa omwileri Bibliya. Teto woone makalelo owiwegeredha wihina opurelemo mudhidhi wamuhudheraga Bibliya.

We podi odhiveliwa omwileri Bibliya, enoligana ni ojha yoojha wahinajhegiwe

4. Ohudhere makalelo odhiveliwa omwileri Bibliya

Ebaribari wihina podi ohukala ethu yokweya obajha omwileri Bibliya. Mbwenye we podi ohudhera okanna “efunelo yunlubale,” obe, odhiveliwa omwileri Bibliya. Ethu emodhave enopadduwa wambelaga ojha ethu wahinajhegiwe. Mmwileri 1 Pedro 2:2, mwamala muthapanye nikoho nnaharela:

Omwileri Bibliya malabo amatene onere wukavihera odhiveliwa omwilerigi?

Osugwe VIDIYU musugwe dhithu yerilena athu amodha wihina edhiveliwege omwileri Bibliya. Mwamala muthapanyedhe makoho enaharela.

VIDIYU: Azombwe enadhiveliwa Madhu a Mulugu (5:33)

Nvidiyuni muna, dhithu baani dhakathamiha azombwe ale omwileri Bibliya?
Ethu baani yakavihere azombwe ale ohuselela omwileri Bibliya malabo amatene?
Ethu baani yeriliwana wihina omwilerigi Bibliya wahagalasege?

Wafunaga:

Omusakule Bibliya atapuleliwe pama ni ookweya omwileri. Podi okala Tradução do Novo Mundo, anafwanyeya ni dhiwogelo dhowinjhiva.
Obajhe wileri dhipaddi dhinudhivela. Woone dhithu dhinawogiwa vakaxani “Obajhe ohudhera wawo wa Bibliya.”
Olebelege dhithu onileriwe mBibliyani. Podi olabihedha kaxa enna musolo “Onowubuwela vigomeliwe?”.
Omulabihedhe apilikativo JW Library^®. Ni apilikativo ola we podi omwileri Bibliya mutelefonini, mutabletini obe mukomputadorini.
Omulabihedhe Apendisi a Tradução do Novo Mundo. Oliye anodhana mapa, kaxa ni golosariyu dhinuhagalasege mudhidhi wamwilerigi Bibliya.

5. Wadhowaga omuhudhera Bibliya wiwegeredhege

Mmwileri Salmos 119:34, mwamala muthapanyedhe nikoho nnaharela:

Mwahaya bwaddi ekala yapama waabiha olobela wahinamwileri Bibliya ni wahinegeredhe ohudhera wawo?

Onaapurelemo aavi kadda ohudhera wa livuru nna? Wiwegeredhaga wihina wahudhere, were ayi:

Wileri ddima dhobajha dha ohudhera.
Wileri dholebela dha mBibliyani, woone makalelo dhiniwananiwa ni museluya.
Okwerete dhowakula dha kadda nikoho. Eyo enere wukavihera othapanyedha pama yohudhera ele ni namahudhihawo.

Wahinona?

Anamona a Yehova ehalabihedha a Bibliya ohiyana-iyana. Mbwenye anathabwa onidhivela di Tradução do Novo Mundo da Bíblia Sagrada mwaha dororomeleya, ookweya omoonelamo ni mwihikala ndina na Mulugu. — Osugwe epaddi musayitini “Anamona a Yehova enowalabihedha a Bibliya amodhaya?”

ATHU AMODHA ENAWOGA YEGI: “Omuhudhera Bibliya orusa. Teto kaginna mudhidhi ni ginakala ogomene.”

Ki we ononamo aavi?

OVIRISEDHA

Weegi opurelemo enawoga Madhu a Mulugu, osayele mudhidhi wihina omwileri Bibliya, olobele wihina wonelemo eleya onileriwe ni wiwegeredhege waadhowaga ohudhera.