OHUDHERA 15
Yesu baani?
Mwilaboni yatene Yesu ohuthabwa ononiwa. Mbwenye athu owinjhiva kimunonne pama teto amodha enowoga dhithu dhohiyana-hiyana wodhela oliye. Mbwenye Bibliya onawoga ddi wodhela oliye?
1. Yesu baani?
Yesu mungero akopolo anakala odhulu. Yehova ahinapadduse ethu-sithu abanjhe ompaddusa Yesu. Bumwahaya oliye agithaniwa ‘oobajha mwa dhopaddusiwa dhatedhene.’ (Colossenses 1:15) Bibliya anawoga wihina ‘Mulugu anna mwaana mmodha’ eyo enatapulela wi Yehova ampaddusile Yesu yekaye. (João 3:16) Yesu owapara mabasa vamodha naababe Yehova. Oliye ohumukavihera Yehova opaddusa dhithu dhatedhene dhiliwo. (Omwileri Provérbios 8:30.) Yehova ni Yesu enodhivelana vanlubale. Yesu anovahedha muthenga ni dhoholela dha Yehova mwamakalelo ororomeleya. Bumwahaya Bibliya agamwithana Yesu ‘Madhu.’ — João 1:14.
2. Yesu adhenle ddi elabo yavati?
Yaka 2 mil mundduli, Yehova ahawerana matikiniho: Olabihedha muzimu waye wotxena wihina atamihedhe mbani mwa muhiyana anithaniwa Mariya egumi ya mwanaye. Nimakalelo yale Yesu obaliwa ninga muthu oomwilini. (Omwileri Lucas 1:34, 35.) Yehova aamurumile mwanaye Yesu mwilaboni yavati wihina akale Mesiya obe Kiristu, ni aavuluse athu atene. a Yesu ohakwanihedha dhovuhulela dhatedhene dhawoga wodhela Mesiya. Eyo enowakavihera athu okalana ebaribari wihina ‘Yesu di Kiristu mwaana a Mulugu ookalawo.’ — Mateus 16:16.
3. Movanene Yesu anafwanyeya wuuvi?
Nuukwa Yesu ahivenyihiwa muukwani ninga mungero, nuwindo ohogolowela odhulu. Vano, ‘Mulugu omuthomela mburo munlubale.’ (Filipenses 2:9) Ovanene Yesu ari ninga mungero akopolo. Mbwenye Yehova dithambwe okanna kopolo ompitha Yesu.
OHUDHERE DHITHU DHIMODHA
Omunone pamadhene Yesu ni onone mwahaya bwaddi ekala yofuneya omunona oliye.
4. Yesu kahi Mulugu Akopolo Dhatedhene
Bibliya anahudhiha wi Yesu mungero akopolo ali odhulu. Mbwenye naari dhigarive ndo oliye anomwiwelela babe Yehova, nnonne addi? Osugwe VIDIYU wihina woone makalelo Yesu ahiyaniye ni Mulugu Akopolo Dhatedhene.
Dholebela dha musiddo dhinonikavihera wonelamo wi Yehova ni Yesu athu ohiyana. Mwileri kadda yolebela mwamala muthapanyedhe makoho enaharela:
Mmwileri Lucas 1:30-32.
-
Madhu ala a mungero enoniha aavi wi Yesu ni Yehova “Namadhulu-dhulu,” athu ohiyana?
Mmwileri Mateus 3:16, 17.
-
Mudhidhi Yesu abaddiziwaga ndhu ndhele odhulu, nawogile ddi?
-
Ononamo wihina naari ndhu nawani?
Mmwileri João 14:28.
-
Vamuralani, munlubale ni anna mutholo baani? Di babi obe mwaana?
-
Yesu ahimwithana Yehova ninga Babe. Eyo enanihudhiha ddiniya?
Mmwileri João 12:49.
-
Yesu anoona wi analigana ni Babe? We onona wi aliwa enoligana?
5. Yowoniha wi Yesu di Mesiya
Bibliya ohukanna dhovuhulela dhowinjhiva dhakavihere athu onona wi oliye di Mesiya obe duule Mulugu amusakunliye wihina avuluse athu. Osugwe VIDIYU wegi woone dhovuhulela dhimodha dhakwanele ni Yesu agaari mwilaboni yavati.
Mwileri wodhela dhovuhulela ndho, mwamala mwathapanyedhe makoho enaharela:
Mmwileri Miqueias 5:2 wihina moone elabo waabaliwe Mesiya. b — Musugwe nota.
-
Yovuhulela ela ehakwanela? — Mateus 2:1.
Bibliya ahiwoga pamadhene makalelo akwe Mesiya. Mmwileri Salmos 34:20 ni Zacarias 12:10 wegi wone dhithu awogile Bibliya.
-
Dhovuhulela ndha dhihakwanela? — João 19:33-37.
-
Amodha enihina Yesu asayele makalelo wihina dhovuhulela ndha dhakwanele. Ononamo wi eyo enowoneleyamo?
-
Eyo enoniha ddi wodhela Yesu?
6. Ohudhera wodhela Yesu ethu yofuneya
Bibliya anowoniha wihina ethu yunlubale ohudhera wodhela Yesu ni ethu Mulugu anafuniye wi oliye erena. Mmwileri João 14:6 ni 17:3, mwamala muthapanyedhe nikoho nnaharela:
-
Mwahaya bwaddi ekala yofuneya ohudhera wodhela Yesu?
Yesu ohufugula dila wihina nandane ni Mulugu. Oliye ohudhiha ebaribari wodhela Yehova ni wodhela oliye iyo podi okanna egumi yohimala
ATHU AMODHA ENAWOGA YEGI: “Anamona a Yehova kinamurumedha Yesu.”
-
We ononamo aavi?
OVIRISEDHA
Yesu mungero akopolo. Oliye mwaana a Mulugu ni di Mesiya.
Ogwaddela
-
Mwahaya bwaddi Yesu agithaniwa “oobajha opaddusiwa mwa dhopaddusa dhatedhene”?
-
Dhithu baani erilena Yesu ahinadhe mwilaboni yavati?
-
Nnonne aavi wi Yesu di Mesiya?
WEGI ONONE DHITHU DHIMODHA
Woone dhithu dhimodha dhinoniha wi Yesu di Mesiya.
“Dhovuhulela dha mBibliyani dhinowoniha wi Yesu di Mesiya?” (Epaddi ya mu jw.org)
Mulugu ere ombala Yesu ninga athu enabaliwa aniwa? Bibliya anawoga ddi wodhela muselu yoyo?
“Mwahaya bwaddi Yesu agithaniwa mwaana a Mulugu?” (Epaddi ya mu jw.org)
Woone yohudhiha yowihina erimo aMulugu araru vamodhave enonihiwa wihina kahiyo yohudhiha ya mBibliyani.
Woone makalelo egumi ya muhiyana dhala esaddunwiwa nusayela ethu enawoga Bibliya wodhela Yesu.
“Mujudewu anowoga mwahaya bwaddi adhe apenddege nroromelo naaye” (Despertai!, Maio a 2013)
a Yohudhera 26 ni 27, nnere woona mwahaya bwaddi athu egahowela ovulusiwa ni makalelo Yesu anivulusiye.
b Wegi woone yovuhulela enawoga mudhidhi adhile Yesu mwilaboni yavati, osugwe Woonelamo 2.
