OHUDHERA 24
Angero baani, ki mabasa baani enapariwa?
Yehova anafuna ninone emudhi yaye eri odhulu. Emudhi eyo baangero enithaniwa ‘aana a Mulugu.’ (Jó 38:7) Bibliya anawoga ddi wodhela angero? Angero enavolowela aavi egumihu? Angero aatene enowerela epaddi ya emudhi ya Mulugu?
1. Angero baani?
Yehova abanjhe wapaddusa angero ahinathi opaddusa elabo ya vati. Aliwa enna mwili mmodhave ni Mulugu teto enakala odhulu. (Hebreus 1:14) Wihikala matxikwi ni matxikwi aangero, mbwenye kadda mungero ohuhiyana ni mukwaye. (Apocalipse 5:11) Aliwa ‘enohara madhu a [Yehova], ni enowiwelela anawogiye.’ (Salmos 103:20) Peeno, angero enowakavihera makiristawu wafwanya athu enna efunelo yohudhera wodhela Yehova.
2. Saddana ni ademoniyu aye baani?
Angero amodha kiyari oororomeleya vamentoni va Yehova. Mungero oobajha omurugunuwela Mulugu ‘anithaniwa Saddana Ddiyabo, onaholosa athu aatene eelabo yavati.’ (Apocalipse 12:9) Saddana afuna othonga vamburoni va Mulugu. Bumwahaya, oliye omuleketha Adawu ni Eva vamodha nangero amodhaya wi emurugunuwele Mulugu. Angero ayo emurugunuwele Mulugu enithaniwa ademoniyu. Yehova wawigara angero ale odhulu vano eri elabo yavati. Mbwenye mohulegela enere ogujhuliwa. — Omwileri Apocalipse 12:9, 12.
3. Saddana vamodha ni ademoniyu enanleketha nimakalelo baani?
Saddana vamodha ni ademoniyu enaaleketha athu mwaha osayela wivolosiha mmakangani. Athu enasayela wivolosiha mmakangani mudhidhi yoyo enasayela othapanya ni kopolo dhihinooneya. Eyo ethu yowoopiha. Motajhiha, athu owinjhiva enowasayela ale enaveda onona dhithu dhosogolo obe anamugu. Amodha enosayela murombwe dhinavediwa ni anamugu. Saddana anowathukulela athu orumedha wi enowandeya owoga naanokwa. Mbwenye Yehova anawoga egihina: ‘Kamwasayele athu enawoga naanokwa newene naale enasayela onona dhosogolo.’ (Levítico 19:31) Oliye anonixagiha wihina anibarele wodhela Saddana vamodha ni ademoniyu aye. Aliwa amwiddani a Mulugu ni enanifunana obure.
OHUDHERE DHITHU DHIMODHA
Ohudhere dhithu dhapama enerana angero, woopiha orivo wowivolosiha ndhithu dha makanga ni makalelo owibarela wodhela Saddana ni ademoniyu aye.
4. Angero enowakavihera athu ohudhera wodhela Yehova
Kahi wi angero enowalaleya athuya, mbwenye aliwa podi wakavihera adhaari a Mulugu wafwanya athu enna efunelo yohudhera wodhela Yehova. Mmwileri Apocalipse 14:6, 7, mwamala muthapanyedhe makoho enaharela:
-
Mwahaya bwaddi nigahowela okaviheriwa nangero nalaleyaga?
-
Kunoonamo wi ethu yapama angero wukavihera wafwanya athu enafuna ohudhera wodhela Bibliya? Mwahaya bwaddi ogona ndo?
5. Othawe wivolosiha mmakangani
Saddana ni ademoniyu aye amwiddani a Yehova. Naaliwaya amwiddani ehu. Mmwileri Lucas 9:38-42, mwamala muthapanyedhe nikoho nnaharela:
-
Ademoniyu enawerela ddi athu?
Kannafuna wahiya ademoniyu ovolowela egumihu. Mmwileri Deuteronómio 18:10-12, mwamala muthapanyedhe makoho enaharela:
-
Ademoniyu enavolowela aavi egumihu ni enaxixa owoga ni iyo nimakalelo baani? Dhithu dhinavolowela makanga dhithanbwe okalawo muruddawo siivi?
-
Ethu yapama Yehova okoddihaga wivolosiha mmakangani? Mwahaya bwaddi?
Musugwe VIDIYU, mwamala muthapanyedhe makoho enaharela.
-
Nvidiyuni, Paula ohumuwariha njhilisi mwanaye. Ononamo wi ethu yowopiha? Mwahaya bwaddi?
-
Ethu baani Paula ahoweliye werana wihina iibarele mwaha wa ademoniyu?
Makiristawu eebaribari, obajha kale enowibarela mwaha wa ademoniyu. Mmwileri Atos 19:19 ni 1 Coríntios 10:21, mwamala muthapanyedhe nikoho nnaharela:
-
Mwahaya bwaddi sapama opaha dhithu dhatedhene dhiniwanana ni makanga?
6. Ogonjhihe koddo ya Saddana vamodha ni ademoniyu aye
Ademoniyu enathongiwa ni Saddana. Mbwenye makiristawu oororomeleya enathongiwa ni mungero munlubale, arkanju Migeli, niri ndina nimodha na Yesu. Migeli ohuthabwa okanna kopolo. Mmwileri Apocalipse 12:7-9, mwamala muthapanyedhe makoho enaharela:
-
Athambwe okanna kopolo baani: Migeli nangero aye, obe Saddana ni ademoniyu aye?
-
Ononamo wi anamahara a Yesu onohowela omoova Saddana vamodha ni ademoniyu aye?
We podi ogonjhiha koddo ya Saddana vamodha ni ademoniyu aye. Mmwileri Tiago 4:7, mwamala muthapanyedhe nikoho nnaharela:
-
Onibarele aavi wodhela Saddana vamodha ni ademoniyu aye?
ATHU AMODHA ENAWOGA YEGI: “Kahi muladdu ojogari obe woona filime dhiniwanana ni makanga. Makalelo owaredha.”
-
Mwahaya bwaddi sowopiha wubuwela ndo?
OVIRISEDHA
Angero oororomeleya enonikavihera. Saddana vamodha ni ademoniyu aye amwiddani a Mulugu ni enolabihedha makanga wihina yalekethe athu.
Ogwaddela
-
Angero enakavihera aavi athu ohudhera wodhela Yehova?
-
Saddana ni ademoniyu aye baani?
-
Mwahaya bwaddi ohufunaga ovolowela makanga?
WEGI ONONE DHITHU DHIMODHA
Woone dhithu dhinoniha wi Yesu di arkanju Migeli.
Woone dhithu dhinoniha wi Ddiyabo ohukalawo, kahiyo obure ori mmurimani mwa muthu.
Woone makalelo muhiyana dhala ahiliye ovoloweliwa ni ademoniyu.
“Oliye ohoona wi egumi ehikanna osogolo” (A Sentinela, 1.º a Julho a 1993)
Woone makalelo Saddana analabihedhiye makanga wihina aalekethe athu.
“Ebaribari wodhela majiya ni okwiri” (O Caminho para a Vida Eterna, epaddi 5)
