Okwa winodhana goyi ni wukuuwa. Bumwahaya Bibliya agithana okwa ninga mwiddani. (1 Coríntios 15:26) Va ohudhera 27, we ohuhudhera wi Yehova anere omugujhula mwiddani ola. Mbwenye enaapadduwe ddi naathu ekwile? Yohudhera ela onere woona mpaganyo wohagalasa wa Yehova — oliye anere wavenyiha matxikwi ni matxikwi aathu, ni enere okalawo malabo amatene. Yehova onere wavenyiha muukwani! Eyoya enere opadduwa? Enaavenyihiwe wihina ekalege odhulu obe elabo yavati?

1. Yehova anafuna awerele ddi amudhihu vamodha naakwihu ekwile?

Yehova onofuna wahogolosela okalawo ale ekwile. Jo mudhaari oororomeleya a Mulugu ahikanna ebaribari wi Mulugu kaamudduwale akwa. Oliye owoga ni Mulugu egi: ‘Nyu munere ogithana, vano miyo ginere wuwakulani [omahame].’ — Omwileri Jó 14:13-15.

2. Nnonne aavi wi anookwa enere ovenyihiwa muukwani?

Yesu agaari mwilaboni yavati, Mulugu ahinvaha kopolo wihina aavenyihe athu muukwani. Motajhiha, Yesu ahinvenyiha muukwani mwananamwali a yaka 12 ni mwanamulobwana a mamukweli. (Marcos 5:41, 42; Lucas 7:12-15) Teto ahinvenyiha Lazaru. Naarive Lazaru agaari mmahame muwari mwa malabo 4, Yesu ahinvenyiha. Yesu olobela wa Mulugu ni owoga egihina: ‘Lazaru, kakumela ode!’ Vano ‘muthu ole aakwile ahikumela ode.’ Lazaru ahihogolowela okalawo! (João 11:43, 44) Mwebaribarene akwaye Lazaru vamodha namudhaye yahihagalala okunamo!

3. Ejhehedho baani onniwena ya amudhawo ni akwawo ekwile?

Bibliya anopaganya egi: ‘Winodha wikale ovenyihiwa.’ (Atos 24:15) Athu yavenyihiwe ni Yesu mudhidhi yole kidhowile odhulu. (João 3:13) Mbwenye aliwa yahihagalala mwaha ohogolowela okalawo mwilaboni yavati. Mohulegela Yesu anere wavenyiha matxikwi ni matxikwi aathu wihina ekalewo malabo amatene mwilaboni yavati. Oliye ohuwoga egi ‘aatene eri mmubuweloni mwa Mulugu’ enere ovenyihiwa. (João 5:28, 29) Eyo enatapulela wi athu aatene eri mmubuweloni mwa Mulugu, naaleya athu ehinandiwa wawubuwela, enere ovenyihiwa.

 OHUDHERE DHITHU DHIMODHA

4. Yesu ohoniha wi podi wavenyiha anookwa

Ohudhere dhithu dhimodha Yesu amwereliye Lazaru. Mmwileri João 11:14, 38-44, mwamala muthapanyedhe makoho enaharela:

• Enanivaha ebaribari ddi wi Lazaru ahikwa? (Musugwe versu 39.)

• Yesu nuunvenyiha Lazaru, ahogolowele okala mwilaboni yavati. Yahakale wi Lazaru ahidhowa odhulu, Yesu ere omuhogolosela mwilaboni yavati?

Musugwe VIDIYU.

5. Matxikwi ni matxikwi aathu enere ovenyihiwa muukwani!

Mmwileri Salmos 37:29, mwamala muthapanyedhe nikoho nnaharela:

• Matxikwi ni matxikwi aathu ala yavenyihiwa muukwani, enakalege wuuvi?

Yesu anere wavenyiha adhaari oororomeleya vamodha naathu amodhaya. Mmwileri Atos 24:15, mwamala muthapanyedhe nikoho nnaharela:

• Athu yavenyihiwa muukwani, baani onunleliwe omoona?

• Ejhehedhelo yovenyihiwa muukwani yalibihe aavi makolo a Phelicity?

 OVIRISEDHA

Bibliya anopaganya wi matxikwi ni matxikwi aathu enere ovenyihiwa muukwani. Yehova anafuna ehogolowele okalawo ni ohunvaha Yesu kopolo wihina avenyihe.

Ogwaddela

• Ethu baani Yehova ni Yesu enunleliwa wawerela anookwa?

• Matxikwi ni matxikwi aathu enaavenyihiwe muukwani enakalege waani — odhulu obe mwilaboni yavati? Mwahaya bwaddi ogaakula ndo?

• Ohukanna ebaribari wi athu onaadhiveliwe enere ohogolowela okalawo? Enuvaha ebaribari ddi?