OHUDHERA 35

Makalelo oothoma dhithu dhapama

ORUMIHE

Athu aatene nnohowela othoma dhithu. Dhothoma dhimodha podi osaddula egumihu ni opatha wandana wehu ni Yehova. Motajhiha, iyo podi othoma mburo winakalegihu, makalelo oofwanya yoojha ni akala nnere otela obe naari. Nathomaga dhithu dhapama nnohagalala teto nnomuhagalasa Yehova.

1. Onathome aavi dhithu dhapama omulabihedhaga Bibliya?

Ohunathi othoma ethu, olobele wa Yehova olobaga nikavihero teto woone Bibliya anawogiye wodhela muselu yoyo. (Omwileri Provérbios 2:3-6.) Dhithu dhimodha Yehova onowoga makaleloya owerana. Yakala ndo, yothoma yapama fumwiwelela oliye.

Ki akala Mulugu kawogile makalelo owerana ethu-sithu, onere ddi? Naari dhigarive ndo, Yehova anere wuholela ‘mudila munahoweliwe weddagamo.’ (Isaías 48:17) Nimakalelo baani? Bibliya ohukanna malagano enukavihere. Malagano ebaribari ya mBibliyani enanihudhiha ele Yehova anubuweliye wodhela ethu-sithu. Malabo mamodha nnowonelamo ele Mulugu anubuweliye nileri dhopadduwa dha mBibliyani. Noonelamo makalelo Yehova anoneliyemo dhithu, nnothoma dhithu dhinamuhagalasa.

2. Dhithu baani onahoweliwe wubuwela wahinathome ethu-sithu?

Bibliya onihina: ‘Muthu athotho ahinerena ethu-sithu anarajhiha wubuwela.’ (Provérbios 14:15) Eyo enatapulela wi, nihinathome ethu-sithu, nnohowela wimela nubuwele dhithu dhatedhene dhinavolowelamo. Wikohe: ‘Malagano baani a mBibliyani eniwanana ni muselu ola? Gathoma ethu ela mubuwelo kunaginyemelege? Yothoma yaga enaapathe aavi egumi yaathu amodha? Vano yinlubaleya: ‘Yothoma ela enere omuhagalasa Yehova?’ — Deuteronómio 32:29.

Yehova dinafwanelela onaddela dhithu dhapama ni dhabure. Nanona pama malamulo ni malagano a Yehova teto nawiwelela, nnokanna yowubusedha ya murima yapama. Yowubusedha ya murima ekalelo ninnihuna enanikavihera woona akala ethu sapama obe sabure. (Romanos 2:14, 15) Yowubusedha ya murima yapama enere onikavihera othoma dhithu dhapama.

OHUDHERE DHITHU DHIMODHA

Woone makalelo malagano a mBibliyani vamodha ni yowubusedha yehu ya murima enanikaviheriwa othoma dhithu dhapama.

3. Omuhiye wihina Bibliya uholelege

Malagano a mBibliyani enaniholele aavi nathomaga ethu-sithu? Musugwe VIDIYU, mwamala muthapanyedhe makoho enaharela.

VIDIYU: Wahiye malagano a mBibliyani eholele egumawo (5:54)

Ofuru wosakula ddiniyani?
Mwahaya bwaddi Yehova adhe anivahege ofuru wosakula?
Ethu baani Yehova onivahiliye wihina enikaviherege othoma dhithu dhapama?

Mmwileri Efésios 5:15, 16, wihina moone nlagano na mBibliyani. Mwamala muthapanyedhe “makalelo olabihedha pama mudhidhi wawo” wihina . . .

omwileri Bibliya malabo amatene
okala mulobwana, muhiyana, babi, mayi obe mwaana apama
woona mutugumano ni mulogo

4. Oxagihe yowubusedha yawo ya murima wihina othomege dhithu dhapama

Bibliya awoga makalelo owerana ethu-sithu enokweya werana. Ki Bibliya ahiwoga makalelo owerana ethu? Musugwe VIDIYU, mwamala muthapanyedhe makoho enaharela.

VIDIYU: “Okanne yowubusedha ya murima yapama” (5:13)

Nvidiyuni, murogola ola erilena ddi wihina axagihe yowubusedhaye ya murima wihina athome ethu yamuhagalase Yehova?

Mwahaya bwaddi kahi yapama waloba amodha wihina enithomelege dhithu? Mmwileri Hebreus 5:14, mwamala muthapanyedhe makoho enaharela:

Waloba athu wihina enithomelege dhithu enakala ninga ethu yokweya, mbwenye ethu baani kadda muthu anahoweliye onona?
Enuukavihere ddi oxagiha yowubusedhawo ya murima ni othoma dhithu dhapama?

Ninga mapa, yowubusedha murima enonikavihera osakula dila nnahowelihu ohara mwigumini

5.Oriihe yowubusedha ya murima yaathu amodha

Athu bohiyana, bumwahaya enothoma dhithu dhohiyana. Ki vano nnonihe aavi wi nnoriha yowubusedha ya murima yaathu amodha. Woone dhopadduwa bili:

Yopadduwa 1: Murogola dhala anadhiveliwa wimakiyaari otamela mulogo wiri arogola ehinadhiveliwa wawoona ahiyana egimakiyari.

Mmwileri Romanos 15:1 ni 1 Coríntios 10:23, 24, mwamala muthapanyedhe nikoho nnaharela:

Onalabihedhe avi versu ndha wakala ni muthu anona wi sabure werana ethu wula yowubusedha yawo ya murima yuwenyaga?

Yopadduwa 2: Ddibila dhala ohunona wi Bibliya kanakoddiha ong’wa, mbwenye oliye othoma ohung’wa. Vano oliye withaniwa wihina ajhe vade va ddibila dhala. Mbwenye ofwanyawo dhong’wa.

Mmwileri Eclesiastes 7:16 ni Romanos 14:1, 10, mwamala muthapanyedhe nikoho nnaharela:

Onalabihedhe aavi versu ndha wakala ni muthu anerena dhithu dhinanyemeliha yowubusedhawo ya murima?

Onere ddi wihina othome dhithu dhapama?

1. Olobele wa Yehova olobaga nikavihero wihina othome ethu yowerana. — Tiago 1:5.

2. Osayele mBibliyani ni mmalivuruni mwehu wihina ofwanye malagano enukavihere wonelamo muselu onafuniwe, ni owoge naaddibila owithwelavo omuzimuni.