Athu etelane ovanene enafuna wihina ohagalala yanniwana labo na matelo ewa wikale wa malabo amatene. Mwebaribarene eyo enowandeya. Makiristawu etelane kale ni enilibihera oparihedha mabasa dholaga dha mBibliyani ehinona wi enowandeya okanna ohagalala.

1. Dholaga baani Bibliya anaavahiye alobwana?

Yehova ohasakula alobwana ninga musolo wa vamuralani. (Omwileri Efésios 5:23.) Oliye anajhehera wihina dhithu anathoma mulobwana dhikavihere murala watene. Bibliya anowoga naalobwana egi: ‘Mudidele wadhivela amwaarinyu.’ (Efésios 5:25) Eyo enatapulela ddi? Mulobwana anamudhivela mwariye, anomuriha akala vade, ni akala vaari vaathu amodha. Oliye anombarela ni anowerana dhatedhene wihina amusamalele epaddi yomwilini ni ya mmubuweloni. (1 Timóteo 5:8) Teto yinlubaleya, anosamalela epaddaaye yomuzimuni. (Mateus 4:4) Motajhiha, oliye podi olobela ni omwileri Bibliya ni mwariye. Mulobwana anamusamalela mwariye anolibiha wandana waye ni Yehova. — Omwileri 1 Pedro 3:7.

2. Dholaga baani Bibliya anaavahiye ahiyana?

Madhu a Mulugu enowoga nahiyana yegi ‘Okanne oriha wa vati va murima ni mamuno.’ (Efésios 5:33) Muhiyana anaande aavi werana? Oliye podi ovaha thima dhikalelo dha mamune ni wilibihera waye wihina amusamalele ni asamalele anaaye. Teto oliye podi omuriha mamune mwaha okavihera dhothoma dhaye ni owoga nuliye mwamakalelo apama naarive ahiri mukiristawu. Muhiyana anamuriha mamune kanamuwoga obure naathu amodha.

3. Anamatelana enaalibihe aavi matelo ewa?

Bibliya anowoga wodhela anamatelana egi: ‘Oobili enakale mwiili mmodhave.’ (Mateus 19:5) Eyo enatapulela wihina yerena dhatedhene wihina odhivela enniwana mmodha ni mukwaye ohuridhe. Aliwa enolibiha matelo ewa mwaha ojha mudhidhi vamodha ni othapanyedha moonelo wewa ni mubuwelo wewa nuudhivela teto ehikuwanaga. Omuhiya Yehova, kaavo muthu mmodhaya mwigumini mwewa ari athima ahiri mwariye obe mamune. Teto enowilibihera vanlubale wihina ehagayelege athu amodhaya.

 OHUDHERE DHITHU DHIMODHA

4. Mulobwana anohowela omudhivela ni omusamalela mwariye

5. Muhiyana anohowela omudhivela ni omuriha mamune

Bibliya anomukongomedha muhiyana omuriha mamune, naarive akala mukiristawu obe naari. Mmwileri 1 Pedro 3:1, 2, mwamala muthapanyedhe nikoho nnaharela:

• Akala mamuno kanamulabela Yehova, mohanganyedha onofuna wihina amulabelege. Ethu yapama siivi: omuwogana mudhidhi watene wodhela Bibliya obe okala muhiyana apama, odhivela ni anriho? Mwahaya bwaddi?

Aateninyu, mulobwana ni muhiyana podi othoma dhithu dhapama. Malabo mamodha muhiyana podi ohurumedha dhithu athomile mamune. Oliye podi owoga anubuweliye mbwenye mwamakalelo apama ni oriha, ahiddiwalaga wihina Yehova amuthomele mulobwana mutholo wothoma dhithu vamuralani.  Enohoweleya muhiyana wilibihera wihina akaviherege dhothoma dha mamune. Ndo, muhiyana anere werana epaddaaye wihina murala okale wohagalala. Mmwileri 1 Pedro 3:3-5, mwamala muthapanyedhe nikoho nnaharela:

• Muhiyana amurihaga mamune Yehova anakala aavi?

6. Enowandeya wagonjhiha makathamiho vamateloni

 OVIRISEDHA

Mulobwana ni muhiyana podi okala oohagalala yadhivelanaga, teto yarihanaga ni yaparihedhaga mabasa dholaga dha mBibliyani.

Ogwaddela

• Mulobwana anerena aavi epaddaaye wihina akanne matelo ohagalasa?

• Muhiyana anerena aavi epaddaaye wihina akanne matelo ohagalasa?

• Akala ohutela obe ohuteliwa, malagano baani a mBibliyani enaalibihe matelo awo?