OHUDHERA 50

Onande aavi okanna murala wohagalala? — Epaddi 2

ORUMIHE

Anamwani nvaho wa Yehova. Oliye anajhehera wi ababi esamalelege pama nvaho ola. Yehova anovaha dholaga dhapama dhinakavihera ababi wakwanihedha mutholo oyo. Dholaga dha Mulugu dhinowakavihera anamwani werana epaddi yewa wi murala okale wohagalala.

1. Dholaga baani Yehova anavahiye ababi?

Yehova anafuna wi ababi yadhivelege aniwa ni ejhege mudhidhi naaliwa. Teto anafuna wihina ababi yabarelege aniwa ni elabihedhege malagano a amBibliyani wihina yalagege. (Provérbios 1:8) Oliye anowoga ni ababi egihina: ‘Mudidele walela aninyu ni dhoholela dha Yehova.’ (Omwileri Efésios 6:4.) Yehova anohagalala ababi yiwelelaga dhoholela ndha. Teto anoothabwa ohagalala ababi yakwanihedhaga mutholo wewa ehapwathelihe athu amodha.

2. Dholaga baani Yehova anavahiye anamwani?

Yehova anowoga ni anamwani egi: ‘Mwawiwelelege makolo enyu.’ (Omwileri Colossenses 3:20.) Anamwani yawiwelelaga ni yawariihaga makolo ewa enomuhagalasa Yehova. Teto makolo ewa enohagalala. (Provérbios 23:22-25) Yesu agari mwana ohuhiya mweddelo wapama. Oliye ari ologomana. Naarive dhigari ndo owawiwelela ni oowariha makolo aye, naari egari ohulogomana.— Lucas 2:51, 52.

3. Murala onalibihege aavi wandana wewa ni Mulugu?

Okala ori babi obe mayi, mohanganyedha onofuna wihina anawo emudhivelege Yehova ninga we. Ki onande aavi? Weragana ele anawoga Bibliya: ‘Walagegena [madhu a Yehova] anawo ni wawogege mwakirati vade veenyu, mweeddaga mudila, mwakinantigi ni mwavenyaga.’ (Deuteronómio 6:7) “Olaga” va yolebela ela enatapulela ohudhiha ethu modhave dila dhowinjhiva. Mohanganyedha ohunona wihina anawo yegi ehiddiwale ethu enohoweleya wawaddela dila dhowinjhivadhene. Bumwahaya yolebela ela enafuna ewoge wihina, osayele mudhidhi wihina owogege wodhela Yehova ni anawo. Makalelo mamodha fusayela mudhidhi kadda sumana wihina mwerena ohudhera wa emudhi. Naarive ohunna ahima sapama osayela mudhidhi wihina werena ohudhera wawo wa vayeka.

OHUDHERE DHITHU DHIMODHA

Woone dhithu dhinaakavihere muralawo okala wohagalalene ni obareleya.

4. Mwalelege aninyu nuudhivela

Walela ahima kahi ethu yokweya. Ki Bibliya anukavihereni aavi? Mmwileri Tiago 1:19, 20, mwamala mwathapanyedhe makoho enaharela:

Ababi enonihe aavi wi enowadhivela aniwa mudhidhi yathapanyaga naaliwa?
Mwahaya bwaaddi kiyakale yapama babi obe mayi omusinyusa mwanaye agari onyanyuwene? a — Musugwe nota.

5. Wabarele anawo

Wihina wabarele anawo, sapama othapanya naliwa wodhela muselu wogonihana, naarive okalaga ninga muselu wa manyazo. Musugwe VIDIYU, mwamala mwathapanyedhe makoho enaharela.

VIDIYU: Wabarele anawo mwaha wa dhithu dhabure (2:58)

Mwahaya bwaddi ababi amodha egarusa owoga muselu wogonihana naniwa?
Ababi amodha ewonge aavi naniwa wodhela muselu wogonihana?

Ninga aasorihe Bibliya mwilaboni ela ya Saddana obure onna othabwave. Mmwileri 2 Timóteo 3:1, 13, mwamala muthapanyedhe nikoho nnaharela:

Versu 13 enawoga wodhela athu abure, athu amodha ayo abure enowagoniha ahima. Woona wihina dhiri ndo mwahaya bwaddi ekala yapama ababi owoga naniwa wodhela muselu wogonihana ni makalelo owibarela?

Wahinona?

Anamona a Yehova ehikanna malivuru enaakavihera ababi owoga naniwa wodhela muselu wogonihana ni wahudhiha aniwa makalelo owibarela. Osugwe dhopadduwa:

Wabarele anawo (vidiyu)
Ohudhere nNamahudhiha Munlubale, kapitulu 10 ni 32
““Makalelo owoga ni anawo wodhela muselu wogonihana” (Despertai!, n.º 5 a 2016)

6. Warihege makolwawo

Anamwani naazombwe enowoniha wihina enowariha makolo ewa mwaha wa makalelo enaawogiwana. Musugwe VIDIYU, mwamala mwathapanyedhe makoho enaharela.

VIDIYU: Othapanya ni makolo aaga? Aavi? (2:19)

Mwahaya bwaddi ekala yapama azombwe wilibihera othapanya ni makolo ewa?
Azombwe enawoge aavi ni makolo ewa ni nriho?

Mmwileri Provérbios 1:8, mwamala muthapanyedhe nikoho nnaharela:

Muzombwe akalege aavi makolwaye yawoga wihina erena ethu-sithu?

7. Mukalena Ohudhera Weemudhi

Murala dha anamona a Yehova dhinokumiha mudhidhi sumana dhatedhene wihina emuhudhere Bibliya vamodha. Ohudhera ngo onithaniwa Ohudhera Weemudhi. Ohudhera ngo onedda aavi? Musugwe VIDIYU, mwamala muthapanyedhe makoho enaharela.

VIDIYU: Ohudhera Weemudhi — Makathamiho ni mareelihoya (8:04)

Murala onande aavi okanna porogarama a Ohudhera Weemudhi?
Ababi enande aavi werana Ohudhera Weemudhi wohagalasa ni onakavihere ahima? — Musugwe foto eri omabajho wa yohudhera ela.
Makathamiho baani yuthukulele ohukanna Ohudhera Weemudhi?

Yehova afuna wihina nlogo na amwana Ezarayeli nithapanyege malabo amatene wodhela Dholebela. Mmwileri Deuteronómio 6:6, 7, mwamala muthapanyedhe nikoho nnaharela:

Onaaparihedhe aavi mabasa yolaga ela?

Dhokavihera Dhohudhera Weemudhi:

Wegeredha mutugumano vamodha.
Wileri dhopadduwa dha mBibliyani ni othapanyedha.
Akala muhukanna ahima mukitihe obe mwimpirimiri mabasa anamwani enafwanyeya mu site jw.org.
Mwakanna azombwe muthapanyedhe artigu dhazombwe dhinafwanyeya mu site jw.org.
Mwerena darama dha mBibliyani ni aninyu.
Musugwe vidiyu dhiri mu jw.org mwamala muthapanyedhe.

ATHU AMODHA ENAWOGA YEGI: “Nyu, Bibliya anoothabwa warusa ahima kinamonelamo.”

Waakule aavi?

OVIRISEDHA

Yehova anafuna wihina (1) ababi yadhivelege, yalelege ni yabarelege aniwa, (2) anamwani yawiwelelege ni yarihege makolo ewa (3) murala dhimwebedhege oliye.