OHUDHERA 55

Okavihere mulogo wawo

ORUMIHE

Wapela elabo yatene matxikwi ni matxikwi aathu enomulabela Yehova mmulogoni mwewa. Aliwa enothabwa ovaha thima dhoholela enakeliwa ni enofuna okavihera mulogo. Ki we ohukanna efunelo emohive?

1. Onalabihedhe aavi mudhidhi wawo ni kopolo dhawo wihina okavihere mulogo?

Iyo atene podi okavihera mulogo. Motajhiha, we podi wathukula anakalaba obe ale enahowela nikavihero wihina wadhowena omutugumanoni? Obe we podi wakavihera weragana dhithu ninga oxela vaade vewa obe ogula ethu enahoweliwa. (Omwileri Tiago 1:27.) Teto iyo podi wivelela oxela obe owomihedha Nyumba ya Omwene. Kaavo muthu anawaddihedhiwa wapara mabasa ayo. Mbwenye odhivela ninnihuna ni Mulugu vamodha ni addibilihu funanthukulela ‘wivelela ni murima watene.’ — Salmo 110:3.

Anamona a Yehova amodha ebaddiziwe podi okavihera mulogo ni makalelo mamodhaya. Motajhiha, addibila podi wilibihera wi ekale adhaari okavihera obe anamaholela mulogo. Teto addibila ni arogola podi wakavihera mabasa oolaleya mwaha okala apiyonero. Anamona a Yehova amodha enowanda akavihera mabasa omaga Nyumba dha Omwene. Amodha enotamela murudda onahoweleya anamalaleya Omwene.

2. Nnaalabihedhe aavi dhokanna dhehu wihina nikaviherena mulogo?

Iyo podi ‘omuthithimiha Yehova ndhithu dhapama ninnihuna.’ (Provérbios 3:9) Gari yinlubale werana yovelela yehu wihina nikavihere mulogo ni mabasa oolaleya enapariwa mwilaboni yatene. (Omwileri 2 Coríntios 9:7.) Teto dhovelela dhehu dhinolabihedhiwa yapadduwa ng’ovi. Amodha ehikanna elemelelo “yopweha ethu nikukuru”, obe okoya mwana korowa kadda sumana obe kadda mweri wihina evelele. (Omwileri 1 Coríntios 16:2.) Iyo podi ovaha yovelela yehu mu kaxani dhiri Onyumbani Yomwene obe mu site donate.pr418.com. Makalelo nnalabihedhihu dhokanna dhehu winonivaha ofuru woomoniha Yehova makalelo nnamudhivelihu.

OHUDHERE DHITHU DHIMODHA

Woone makalelo okavihera mulogo wawo.

3. Okavihere mulogo ni dhokanna dhawo

Yehova ni Yesu enohagalala yamonaga muthu avahaga dhokanna dhaye ni murima watene. Motajhiha, Yesu ahimoona maamukwele dhala ohawa apelekaga yovelela yaye. Mmwileri Lucas 21:1-4, mwamala muthapanyedhe makoho enaharela:

Negi nimuhagalase Yehova, enahoweleya fuvaha korowa dhowinjhiva?
Yehova ni Yesu enona aavi dhokanna nnavelelihu ni murima watene?

Weegi onone makalelo dhinalabihedhiwa dhovelela, musugwe VIDIYU. Mwamala muthapanyedhe nikoho nnaharela.

VIDIYU: “Nvaho wa Yehova” (4:47)

Dhovelela dhinalabiheriwa wihina dhikaviheriwena mulogo dha mwilaboni yatene?

4. Iyo podi wivelela wihina nikavihere

Adhaari Yehova akale yodhiveliwa osamalela mburo yamwebedhiwamo oliye. Mbwenye dhahoweleya kahiyo korowave. Mmwileri 2 Crônicas 34:9-11. Mwamala muthapanyedhe nikoho nnaharela:

Amwana Ezarayeli yakavihera aavi osamalela Tempulu?

Wihina woone makalelo Anamona a Yehova enatajhihiwa amwaana Ezarayeli, musugwe VIDIYU. Mwamala mwathapanyedhe makoho enaharela

VIDIYU: Owomihedhe mburo nnamwebedhihumo Mulugu (3:31)

Mwahaya bwaddi ekala yofuneya oxela ni osamalela Nyumba ya Omwene yayo?
Ki onakavihere ni makalelo baani?

5. Addibila podi werana dhithu dhimodha mmulogoni

Bibliya anowakongomedha makiristawu wilibihera wihina ekavihere mulogo. Weegi woone yopadduwa, musugwe VIDIYU. Mwamala mwathapanyedhe makoho enaharela.

VIDIYU: Addibila — Mumparele mabasa Yehova (5:19)

Mvidiyuni mune, ddibila Ryan erile ddi wihina akavihere mulogo?

Bibliya anosoriha dhikalelo dhinahoowela wihina addibila ekale adhaari okavihera obe anamaholela mulogo. Mmwileri 1 Timóteo 3:1-13, mwamala muthapanyedhe makoho enaharela:

Dhikalelo baani addibila enahowela okala adhaari okavihera obe namaholela mulogo enahoweliwa okanna?
Ki dhikalelo baani murala wewa onahoweliwa okanna? — Musugwe versu 4 ni 11.
Addibila yilibiheraga okanna dhikalelo ndho mulogo onakavihereya ni makalelo baani?