Nakala vamodha ni addibilihu nnakala ninga mwene Davidi asorihe egi: ‘Ethu yapama ni sohagalasa addibila okala vamodha nuwiwanana!’ (Salmos 133:1) Mbwenye wiwanana ngo kunadha yekiwa. Kadda muthu anohowela werana epaddaaye.

1. Ethu enatikiniha vaari va nlogo na Yehova ddi?

Wadhowa omutugumanoni wa elabo emodha naarive ohiwaga ewogeloya ononege ninga ori mmulogoni mwawo. Mwaha waddi? Mwaha Bibliya ni malivuru nnalabihedhihu mamodhave wapela elabo yatene. Teto nnowilibihera odhivelana mmodha ni mukwaye. Naarive nigari a dhilabo dhohiyana-iyana atene iyo nnowilibihera ‘ovuwiha ndina na Yehova wi nimwebedhe mowiwanana.’ — Sofonias 3:9, nota.

2. Onere ddi wihina okalewove wiwanana?

‘Muthabwege odhivelana mmodha ni mukwaye, ni murima watene.’ (1 Pedro 1:22) Ki onande aavi? Kuthabwege osugwa dhoviriganiha dhaathu amodha, mbwenye osugwege dhikalelo dhewa dhapama. Ohiya wandana naathu enadhiveliwa dhithu dhimodhave dhinudhivela, osayele wanona addibila amodha ohiyana-iyana. Teto sapama wilibihera wihina niddule kasekase dha nsakulo dhiri mmurimani mwehu.— Omwileri 1 Pedro 2:17; a osugwe nota 1.

3. Wakanna muladdu nddibila mmodha onere ddi?

Iyo niri athu owiwanana, mbwenye kanilogomane. Malabo mamodha iyo podi werana ethu enawukuule athu amodha. Bumwahaya Bibliya agasoriha egihina ‘mudidele olevelelana mmodha ni mukwaye’. Teto onowenjhedhedha egi: ‘Ninga Yehova ulevelenliyeni mweregena emodhave.’ (Omwileri Colossenses 3:13.) Iyo kannanda okontari dila ngasi nimuthegenlihu Yehova. Mbwenye oliye anonilevelela. Bumwahaya, anafuna wihina naalevelelege addibilihu. Woona wihina ohumuthegela muthu mmodhaya, osayele makalelo othapanyedha museluya wihina omale. — Omwileri Mateus 5:23, 24; b osugwe nota 2.

 OHUDHERE DHITHU DHIMODHA

4. Ogonjhihe nsakulo

Ebaribari wihina nnofuna wadhivela addibila atene. Mbwenye podi ohukala ethu yokweya omudhivela muthu ohiyana ni iyo. Ki enaanikavihere ddi? Mmwileri Atos 10:34, 35, mwamala muthapanyedhe makoho enaharela:

• Yehova kahi muthu a nsakulo; kadda muthu podi othoma omulabela. Ekalelo eyo ya Yehova enavolowela aavi monelo wawo wodhela addibila ale enakala ninga ehiyana ni we?

• Dhithu baani athu a murudda wawo eneriwana dhinoniha wihina ehikanna nsakulo?

Mmwileri 2 Coríntios 6:11-13, mwamala muthapanyedhe nikoho nnaharela:

• Onande aavi wandana ni addibila ohiyana ni we?

5. Olevelelege ni murima watene ni osayelege makalelo okalawo murenddele

Iyo kannahowela omulevelela Yehova, mbwenye naari dhigari ndo oliye anonilevelela. Mmwileri Salmo 86:5, mwamala muthapanyedhe makoho enaharela:

• Olevelela wa Yehova onagomela wuuvi?

• Mwahaya bwaddi ogatamalela olevelela wa Yehova?

• Nnafuna nandane naathu atene. Dhithu baani dhaavunganyedhe wandana ngo?

Nnaamutajhihe aavi Yehova ni odidela okala owiwanana naaddibilihu vamodha naarogolihu? Mmwileri Provérbios 19:11, mwamala muthapanyedhe nikoho nnaharela:

• Muthu erana ethu enutakalela onere ddi wi omarihe muladduya?

 Malabo mamodha nnowerana dhithu dhinatakalela amodha. Eyo yapadduwa nere ddi wihina muladduya omale? Musugwe VIDIYU, mwamala muthapanyedhe nikoho nnaharela.

• Mvidiyuni muna, murogola ola enre ddi wihina amarihe muladduya?

 OVIRISEDHA

We podi okavihera mulogo okala wowiwanana mwaha walevelela addibila ni wawoniha odhivela wawo.

Ogwaddela

• Onaagonjhihe aavi nsakulo?

• Wakanna muladdu nddibila mmodhaya onere ddi?

• Mwahaya bwaddi ogafuna otajhiha ekalelo ya Yehova wodhela walevelela amodha?