OHUDHERA 57
Ki watheega onere ddi?
Naarive omudhivelaga pamadhene Yehova ni wilibiheraga werana efunelo yaye malabo mamodha onerege oviriganiha. Dhoviriganiha dhimodha podi okala yothega yinlubale. (1 Coríntios 6:9, 10) Mbwenye naarive ogerilena yothega yinlubale kuddiwale wi Yehova anowuudhivela. Oliye anofuna wulevelela ni wukavihera.
1. Ki nere ddi negi Yehova anilevelele?
Muthu anamudhivela Yehova erana yothega yinlubale anoothabwa wukuuwa. Mbwenye mpaganyo Yehova awereliye athu a nlogo naaye onothabwa onilibiha: ‘Naari dhothega dhenyu dhikale dhofiila, dhinere otxenihiwa ninga funga.’ (Isaías 1:18) Nathwaruwa ni murima watene Yehova anere onilevelela. Ki muthu anoniha aavi wi ohuthwaruwa? Muthu anoniha wi ohuthwaruwa aloba nikavihero wa Yehova ni ahiya werana dhithu dhabure. Indo muthuya anere wilibihera osaddula mubuwelo waye ni dhowera dhaye dhinamuthukulela werana yothega. Teto nnere wilibihera weddela malamulo a Yehova.— Omwileri Isaías 55:6, 7.
2. Yehova anaalabihedha aavi anamaholela mulogo nathega?
Nerana yothega yinlubale Yehova ani, ‘nawithane anamaholela mulogo.’ (Omwileri Tiago 5:14, 15.) Anamaholela mulogo enomudhivela Yehova ni enodhivela mambila aye. Aliwa enolabihedha enonelo ya mBibliyani wihina emukaviherena muthu ohogolowela wandana waye wapama ni Yehova. — Gálatas 6:1.
Nathega anamaholela mulogo enanikavihera ni makalelo baani? Nathega anamaholela mulogo abili obe araru enere omulabihedha Bibliya wihina enonihe mwahaya bwaddi ele nerilihuna ekala ethu yabure. Teto aliwa enere onivaha dhoxagiha ni dholaga dhinanikavihere ohumorela yothega emodhave. Wihina ebarele mulogo, anamholela mulogo enere omukumiha mmulogoni muthu yole eerilena yotheega ahithwaruwa.
OHUDHERE DHITHU DHIMODHA
Woone makalelo Yehova ananikaviheriye nerana yothega yinlubale.
3. Ohukoya yothega enokavihera vanlubale
Nathega nnomukula vanlubale Yehova. Bumwahaya nnohowela omwaddela yothega nerilihuna. Mmwileri Salmos 32:1-5, mwamala muthapanyedhe nikoho nnaharela:
-
Ohiya okoya yothega yehu, ekalele ddi yapama omwaddela Yehova?
Teto ohiya omwaddelave Yehova yothega yehu nasayela nikavihero na anamaholela mulogo dhehu dhinere oneeddela pama. Musugwe VIDIYU, mwamala muthapanyedhe nikoho nnaharela.
-
Nvidiyuni muna anamaholela mulogo emukavihere aavi Kanon omuhogolowela Yehova?
Nawogaga nanamaholela mulogo niwogege ebaribari; aliwa enafuna enikavihere. Mmwileri Tiago 5:16, mwamala muthapanyedhe nikoho nnaharela:
-
Mwahaya bwaddi ekala yokweya anamaholela mulogo onikavihera nawogaga ebaribari?
Omwaaddele Yehova dhothega dhawo, wamala owaddele anamaholela mulogo ni orumedhe nikavihero na Yehova
4. Yehova onowaweddela thagaraga ale enatheega
Muthu erana yothega enlubale ni akoodda werana ele Yehova anawogiye wi sapama, anere okumihiwa mmulogoni. Teto iyo kannandane nuliye. Mmwileri 1 Coríntios 5:6, 11, mwamala muthapanyedhe nikoho nnaharela:
-
Emela enonyakusa othu wakanddiwa. Wandana ni muthu erilena yothega vano ahithwaruwaga onanonga aavi mulogo waatene?
Anamaholela mulogo etajhihaga thagaraga dha Yehova, enowawaja ale yerilena yothega enookumihiwa mmulogoni wihina yakavihere. Owinjhiva enohogolowela mmulogoni mwaha naarive yolagaya egaali yopiha mbani ehakavihera othwaruwa. — Salmo 141:5.
5. Yehova anonilevelela nathwaruwa
Yesu ohulabihedha nladdaniho nnanikavihera woonelamo makalelo anakala Yehova muthu athwaruwa. Mmwileri Lucas 15:1-7, mwamala muthapanyedhe nikoho nnaharela:
-
Yolebela ela enanihudhiha ddi wodhela Yehova?
Mmwileri Ezequiel 33:11, mwamala muthapanyedhe nikoho nnaharela:
-
Negi noonihe wihina nihithwaruwa ethu baani nnahowelihu werana?
Yehova anowasamalela mambila aye ninga anerana namakukula
ATHU AMODHA ENAWOGA YEGI: “Gawaddela yothega yaga anamaholela mulogo enere ogikumiha mmulogoni.”
-
Wahanvuruwane muthu awogaga ndo waamwakule aavi?
OVIRISEDHA
Nerana yothega yinlubale Yehova podi onilevelela. Mbwenye nnohowela othwaruwa ni murima watene ni osayela makalelo ohuhogolowela werana yothega ele.
Ogwaddela
-
Ekalele ddi yapama omwaddela Yehova dhothega dhehu?
-
Enahoweleya nere ddi wihina nleveleliwe dhothega dhehu?
-
Nerana yothega enlubale mwahaya bwaddi egahoweleya osayela nikavihero na anamaholela mulogo?
WEGI ONONE DHITHU DHIMODHA
Woone makalelo mulobwana dhala ooniliye thagaraga dha Yehova dhinafwanyeya va Isaías 1:18.
Anamaholela mulogo enaakavihera aavi ale etheegile?
Woone makalelo owoniha odhivela ni thagaraga wa ale ekumihiwe mmulogoni.
Wileri yopadduwa enihina “Miyo goofuna omuhogolowela Yehova” wihina woone makalelo mulobwana dhala asukume ebaribari ooniliye wi Yehova dimwithane dila bili.
“Bibliya anosaddula egumi dhaathu” (A Sentinela, 1.º a abril a 2012)
