1-3. Wodhela okwa, makoho baani enakumelela, ki dhigereja dhowinjhiva enawakula avi makoho yala?

BIBLIYA onopaganya wi osogolo ‘kawindha wikala okwa.’ (Apocalipse 21:4) Musolo 5, nihudhera wodhela yowobola efugulele ofuru wowakela egumi yohimala. Mbwenye ofiyedha peeno athu enookwa. (Eclesiastes 9:5) Nihikalawo nikoho noofuneya nnikohesihu nnawoga: Enanipadduwela ddi nakwa?

² Nnofuna onona yowakula ya nikoho nna, nakweliwa mmudhihu namudhivelihu. Bumwahaya nigikoha: ‘Agelele wuvi? Oliye onogoona? Podi ogikavihera? Nnodha nifiye nlabo nigumane dila bili?’

³ Dhigereja dhowinjhiva dhinovaha dhowakula dhohiyana-hiyana wa makoho yala. Gereja dhimodha dhinahudhiha wi, akala oli muthu apama onodhowa odhulu, mbwenye wakala abure onovokeriwa othukuthani wa motho. Dhimodha dhinihina, wakwa onosadduwa okala muzimu, odhowa okalaga ni amudhawo ekwile wale. Dhihikalawo dhigereja dhimodha dhinawoga wi, wakwa onohogolowela obaliwa dila bili, obe okalagawove ni mwiili mmodhene, malabo mamodha podi okalagawo ni mwiili wamwanenyama.

4. Wodhela muselu wookwa dhigereja dhinahudhiha ddi?

⁴ Muselu wookwa kadda egereja enohudhiha dhego dhohiyana. Mbwenye dhatedhene dhinahudhihiwa dhimodhave. Enahudhiha wi mwiili bunakwa, mbwenye muthuya onna okalawove. Ki elaya ebaribari?

5, 6. Enanipadduwela ddi nakwa?

⁵ Yehova ohunona enanipadduwela nakwa, ni onowoga wi egumihu enamala labo nnakwihu. Okwa wihiyana ni okalawo. Nakwa ogogo wehu, mubuwelo wehu kunahala okalagawove mburo mmodha. * Nlabo nnakwihu, nnohiya woona, wiwa, ni kannubuwela ethu.

⁶ Mwene Salomawu ohuleba egi: ‘Anookwa kinonile ethu.’ Ekwile kinadhivela newene kinakanna ntxiga. ‘Omahame mburo onayiwe kawili mabasa, kawinakungiwa porogarama, kawili enonelo, newene thotho.’ (Omwileri Eclesiastes 9:5, 6, 10.) Teto va Salmos 146:4, Bibliya onowoga wi muthu akwa ‘mubuwelo waye watene’ onothima.

7. Yesu aliganihe okwa ninddi?

⁷ Mudhidhi mukwaye oofuneyesesa a Yesu vakwiliye, oliye ahiwoga ni arumiwi aye eraga: ‘Mukwihu Lazaru ohugonelavo’, mbwenye Lazaru keera ogonawene bahi, Yesu afuna awaddele wi: ‘Lazaru ohukwa.’ (João 11:11-14) Yesu aaliganihe okwa ninga ogona. Oliye kawogile wi Lazaru aali odhulu obe aali namudhaye ekwile. Newene Yesu kawogile wi Lazaru eera otabusiwa othukuthani wa motho obe onohogolowela obaliwa dila bili mmwiilini mwa muthu mmodhene. Mwamakalelo okweya Lazaru akala ninga ari mukoveni. Dholebela dhimodha dha mBibliyani dhinoliganiha okwa ninga ogona. Bibliya onihina mudhidhi yampiliwa Estevawu ‘oliye ahigonelavo muukwani.’ (Atos 7:60) Murumiwi Pawulo  ohuwoga emodhave wi Makiristawu amodha ‘ehimala ogonelavo muukwani.’—1 Coríntios 15:6.

8. Nnonne addi wi Mulugu kanipaddusile wi nikwege?

⁸ Mulugu ampaddusaga Adawu, ampaddusile wihina akalewo mudhidhi vang’no era ndo akwe? Kahiyo ndo! Yehova ampaddusile wi akalegewo malabo amatene ni egumi yologomana. Yehova ohunivaha kadda muthu efunelo yokalawo malabo amatene. (Eclesiastes 3:11) Kaavo Babi onadhiveliwa omoona mwanaye uuluvalaga ofiyedha okwa. Newene Yehova kanadhiveliwa dhanereyelaga ndala. Kito akala Mulugu onipaddusile ni  ekalelo yowi nikalegewo malabo amatene, kivano nnakwela ddi?

9. Nlamulo naavahiwe Adawu ni Eva naharusele ddi wiwelela?

⁹ Mmunddani mwa Ideni, Yehova ahimwaddela Adawu egihina: ‘Dhowima dhatedhene dhili mmunddani muna, podi ojhaga ninga onafuneliwe. Mbwenye, muthanko onanoniha ele eli yapama ni yabure, onaajhe, mwaha wi nlabo onajhiwe, mwebaribarene onere okwa.’ (Génesis 2:9, 16, 17) Nlamulo nna kanarusile wiwelela, mwaha wi Yehova danonne yapama ni yabure wa Adawu ni Eva. Yahamwiwelele Yehova, yere woneyiha wi yoriha makalelo othonga a Mulugu. Yakale makalelo ootamalela dhatedhene Yehova avahiliye.

10, 11. (a) Saddana andile addi omuleketha Adawu ni Eva? (b) Mwahaya bwaddi edhe ehikannege ofuru woleveleliwa?

¹⁰ Yowukulaya sowi, Adawu ni Eva yahisakula ohimwiwelela Yehova. Saddana ahiwoga ni Eva egi: ‘Ebaribarene Mulugu awogile wi kamujhege dhowima dhatedhene dhili mmunddani muna?’ Eva waakula eraga: ‘Dhowima dhatedhene dha muthanko dhili mmunddani muna iyo podi ojhaga. Mbwenye, wodhela dhowima wa muthanko oli vari va mundda, Mulugu awogile wi ‘kamujhe, newene kamuhidde, mwaha wi munaakwe.’’—Génesis 3:1-3.

¹¹ Saddana waakula eraga: ‘Ebaribarene kamunakwa. Mwaha wi Mulugu ohunona wi, nlabo munaajhinyu, mento enyu enere ofuguwa ni munokala ninga Mulugu, munonege yapama ni yabure.’ (Génesis 3:4-6) Saddana afuna amubuwelihe Eva wi erege wanda osakula yeka yapama ni yabure. Oliye ahoota wodhela ele yapadduwe ni Eva asakula ohimwiwelela Mulugu. Saddana agawogile  wi Eva kaakwe, Eva othukula yowima ele wambela ojha nuwindo onvahamo mamune. Adawu ni Eva yahinona wi Yehova ahiwoga wi muhujhe yowima ele. Vajhiliwa, aliwa yahisakula ohiwelela nlamulo nookweya. Numala ojha yowima ele, yahitonyihedha wi kiyanna nthithimiho ni Babi ewa oodhivela oodhulu. Kiyafwanela oleveleliwa wodhela ele yeriliwana!

12. Mwahaya bwaddi ohiwelela wa Adawu ni Eva odhe omuukulege Yehova?

¹² Kubuwela makalelo Yehova oonile overeya mmurimani, vevale Adawu ni Eva vahoonihiliwa nriho wa Mpaddusi ewa. Wonemo addi ogaali babi, wilibihere vanlubale waalela anawo ohara dila yapama mbwenye aliwa kuhuwiwelela, vasogolova weragana ethu emodhaya wahahudhihiliwe? Kiyuwukulihe murima?

13. Madhu aawogile Yehova egi: ‘onthubini onere ohogolowelawo’ enatapulela ddi?

¹³ Adawu ni Eva vahamwiweleliwa Mulugu, aliwa yahiyelela okanna ofuru wokalawo malabo amatene. Yehova ahiwoga ni Adawu egihina: ‘Woona wi oli nthubi, onthubini onere ohogolowelawo.’ (Omwileri Génesis 3:19.) Eyo enatapulela wi Adawu ere ohogolowela okala nthubi, yakalege ninga kanapaddusiwege. (Génesis 2:7) Adawu vithegiliye, oliye okwa ni ohiya okalawo.

14. Athu enakwela ddi?

 ¹⁴ Adawu ni Eva yahamwiwelele Mulugu, yere okalawo ofiyedha peeno. Mbwenye wodhela ohiwelela, aliwa ehithega, osogolowa okwa. Yothega eri ninga eredda enavaliwa, nivanlihu ni ababi ehu oobajha. Iyo atene nnobaliwana yothega, bumwahaya nigakwa. (Romanos 5:12) Mbwenye Mulugu kaafuna wi eyo enipadduwelege. Mulugu newene kanafuna wi athu ekwege, Bibliya onowithana okwa ninga ‘mwiddani.’—1 Coríntios 15:26.

15. Onona ebaribari wodhela okwa, enobola addi?

¹⁵ Ebaribari wodhela okwa enowobola wa dhohudhiha dhowoota. Bibliya onahudhiha wi ole okwile kanoona opa newene kanukuuwa. Iyo kannanda owoga ni oliye, newene oliye owoga ni iyo. Kannanda wakavihera, newene aliwa onikavihera. Anookwa kinanda onooniha goyi, bumwahaya iyo kannawoova. Mbwenye, dhigereja dhowinjhiva dhinahudhiha wi anookwa enodhowa okalaga mburo mmodha, iyo podi wakavihera wodhela wavaha korowa apadiri, obe anddimuwa amwigereja. Mbwenye nanona ebaribari wodhela okwa, kannalekethiwa ni dhohudhiha nda dhowoota.

16. Dhigereja dhowinjhiva dhinahudhiha ddi wodhela okwa?

¹⁶ Saddana onolabihedha dhigereja dhowoota wihina anilegethe ni anubuwelihe wi ale ekwile ehikalawo. Motajhiha, dhigereja dhimodha dhinahudhiha wi nakwa, akala enavenyamo odhowa okalaga mburo mmodhaya Ki egereja yawo enahudhiha ndo, obe enahudhiha ele Bibliya onawogiye wodhela okwa? Saddana onolabihedha dhowoota nda wi athu ehinfiyedhege Yehova.

17. Mwahaya bwaddi muselu wa thukutha yamotho enomuruwaniha Yehova?

¹⁷ Dhigereja dhowinjhiva dhinahudhiha dhego Bibliya  ohunahudhihiye. Motajhiha, amodhaya enahudhiha wi athu abure enaya yaddumeyiwe othukuthani wa motho ni malabo amatene. Yohudhiha yela enomuruwaniha Yehova. Oliye newene kanubuwelege wawoniha athu goyi! (Omwileri 1 João 4:8.) We wamonemo addi babi onamuddumeya mwanaye nlada vamothoni wi amusinyuse? We were woona wi eyo ethu yabure vanlubale. Newene kuwandane ni muthu yoyo. Saddana onafuna nrumedhege wi Yehova onowerana ndo.

18. Mwahaya bwaddi nihawoovaga anookwa?

¹⁸ Dhigereja dhimodha dhinahudhiha wi muthu akwa, onokala muzimu. Dhigereja nda dhinahudhiha wi nnohowela othithimiha obe woova muzimu ndo, woona wi podi wandana obe widdana ni iyo. Athu owinjhiva enorumedha dhohudhiha dhendha. Aliwa enowawoova anookwa, ofiyedha wawebedha omuhiya Yehova. Ononege wi anookwa kinoona newene kinubuwela ethu, kinahoweleya iyo wawoova. Yehova dili mpaddusi ehu. Oliye di Mulugu eebaribari, nimwebedhege oliye baahi.​—Apocalipse 4:11.

19. Onona ebaribari wodhela anookwa, enanikavihera addi?

¹⁹ Onona ebaribari wodhela anookwa, enonobola wa dhohudhiha dhowoota dha mmagerejani. Ebaribari ela enere onikavihera wonelamo mpaganyo wotikiniha wa Yehova wodhela egumi yehu osogolo.

20. Musolo onaharela nnahudhere ddi?

²⁰ Malabo a mundduli, mudhari mmodha a Mulugu ithaniwa Jo ahikoha ayi: ‘Muthu akwa, podi ohogolowela okalawo?’ (Jó 14:14) Ebaribarene muthu akwile podi ohogolowela okalawo? Mulugu ononivaha yowakula yohagalasa mBibliyani. Musolo onaharela nnere ohudhera muselu yola.