1, 2. Athu enawerana makoho baani?

AHIMA enowawerana makoho owinjhiva. Podive ogawakunle, oyo onodidelave wukoha egihina, mwahaya? Mbwenye venvo onilibihedhiwe wi omwakule, onodhowave akohaga, ki mwahaya bwaddi?

² Naari akala nili azombwe obe nili athu owunnuwelavo, iyo atene nnokoha. Nnofuna onona wodhela ele nnafunihu ojha, wabala obe ogula. Ethu emodhaya iyo podi okanna makoho oofuneya amwegumini mwehu ninga dhithu dhinereye osogolo. Mbwenye nahifwanyaga dhowakuladha dhinnikola wa makoho yala, nnohiya waja dhowakuladha.

3. Mwahaya bwaddi athu owinjhiva kinafwanya dhowakula dha makoho ewa oofuneya?

³ Ki Bibliya ohukanna dhowakula dha makoho yala athima nnawerihuna? Athu owinjhiva podi wubuwela wi dhowakuladha dhili mBibliyani, mbwenye enoona wi Bibliya doorusa omonelamo. Aliwa enubuwela wi mapurusori ogereja obe mapadiri binonne yowakulaya. Amodhaya enakanna manyazo owoga wi kinonile yowakulaya. Ki we ononamo addi?

4, 5. Makoho baani athima onniwena? Ekalele ddi yapama ohuselela osayela dhowakuladha?

⁴ Mohanganyedha podi wera onofuna onona dhowakula dha makoho ninga ala: Gipadduseliwe ddi? Enaagipadduwele ddi gakwa? Mulugu ddowi ddi? Yesu, namahudhiha oovuwa, ohuwoga ayi: ‘Mudidele oloba, munere ovahiwa, mudidele osayela munere ofwanya,  mudidele ogogodda munere ofuguleliwa.’ (Mateus 7:7) Mowindala odidele osayela ofiyedha ofwanya yowakula yororomeleya.

⁵ Ehe, akala we ‘onodidela osayela’ onere ofwanya yowakulaya mBibliyani. (Provérbios 2:1-5) Dhowakuladha kadhinarusa wonelamo. Nde onahudheriwe dhinere wuvaha egumi yohagalasa peeno ni ejhehedhelo yapama osogolo. Kabeni none nikoho nnaarusa athu owinjhiva.

6. Mwahaya bwaddi athu amodha egubuwela wi Mulugu kananipwatha?

⁶ Athu owinjhiva enubuwela wi Mulugu kananipwatha. Yawubuwelihaga wi Mulugu ahere anipwathaga, elabo ela kiyakale ndala. Mwaha wi wikala koddo, widdana ni ohawa wapela elabo yatene. Athu enokala aredda, enowona goyi ni enookwa. Amodhaya enawoga ayi: akala Mulugu ononipwatha, goyi ela yahinamalela ddi?

7. (a) Anamaholela gereja owinjhiva, enawoga ddi yapadduwa ethu yabure? (b) Nnonne addi wi kahiyo Mulugu ananitotela dhithu dhabure?

⁷ Thabwathabwa anamaholela gereja enowathukulela athu wubuwela wi Mulugu dabure. Eyo enowawubuheliha athu ompwatheliha Mulugu obure watewene onereya. Aliwa enowoga wi oliye kananipwatha. Mbwenye obure kunadhelege wa Mulugu. Nihiddile addi ebaribari wi kahiyo Mulugu? Bibliya onohudhiha va Tiago 1:13 egihina, Mulugu kaneha nroromelo namuthu ni dhithu dhabure. Yolebela ela enawoga wi: ‘Muthu akala vari va yoweha, ahiwoge egi: ‘Ginna weehiwa ni Mulugu.’ Ni dhithu dhabure, Mulugu kanehiwa, newene oliye kanamweha muthu.’ Dhithu  dhatedhene dhabure dhinereya Mulugu onowoona, ehe eyo ebaribabari, mbwenye kahiyo oliye anatetedhela wi dhereyege. (Omwileri Jó 34:10-12.) Ndoweni nonelemo pama.

8, 9. Yakalele ddi yabure omwinkedha Mulugu wodhela makathamiho ehu? Owoge yoladdaniha.

⁸ Omubuwele muzombwe anakala vamodha naababe. Ababe enomudhivela pamadhene mwaniwa, ni enomukaviheresa osakula mweddelo wapama. Vano, oniliye wi ohunnuwa, wambela ohavuruwana ababe, ovenyavo vaade vaababe odhowa weddelaga dhaye dhabure. Nuwindo wambela omweddela bure. Egahikala yapama owoga wi di babe anamwerela obure mwanaye? Kiyawomele! (Lucas 15:11-13) Moligana ni babi ola, Mulugu kaakoddihile athu osakula ele eli yabure. Bumwahaya dhigapadduwa dhithu dhabure. Mwamukalelo yola, nubuwelege wi kahiyo omwinkedhaga Mulugu yapadduwa ethu yabure.

⁹ Mulugu ohukanna mwahaya agahiya obure wereyaga. Musolo wa 11, onere ohudhera Bibliya anahudhihiye wodhela muselu yola. Mbwenye okanne ebaribari wi Mulugu onowudhivela ni kahiyo oliye ananitotela makathamiho. Mulugu bahi dinamarihe makathamiho ehu.—Isaías 33:2.

10. Nnonne addi wi Mulugu anere omariha obure watene enerena athu abure?

¹⁰ Mulugu dotxena. (Isaías 6:3) Dhatedhene aneriyena sologomana, sotxena ni sapama. Mowindo iyo podi omuroromela. Oliye kanaligana ni athu amodhaya enerana dhithu dhabure. Mbwenye kahiyo mudhidhi watene ninfunihu waroromelaga athu. Naari namathonga oyene ali apama a elabo yatene yavati kananda  omariha obure watene enerana athu abure. Kavo muthu anna kopolo ninga Mulugu. Oliye onowanda ni onere ogomiha obure watene enerana athu. Oliye anere omariha obure nimukalakala.—Omwileri Salmos 37:9-11.

11. Mulugu anonamo addi wodhela goyi ononiwe?

¹¹ Mulugu kanadhiveliwa oonaga goyi enna athu elabo yatene ni eyo onniwena. Bibliya anhudhiha wi Mulugu ‘anodhivela opama.’ (Salmos 37:28) Eyo enowoniha wi Mulugu onowidda dhithu dhabure. Mudhidhi wa kale, obure wadhaliwa veelaboni yavati, Bibliya onowoga wi ‘murima waye wahukuwa.’ (Génesis 6:5, 6) Mulugu kasadduwile. (Malaquias 3:6) Bibliya onowoga wi oliye onowuthuwathuwelave.—Omwileri 1 Pedro 5:7.

12, 13. (a) Mwahaya bwaaddi nigaadhivela athu amodha, nnonamo addi wodhela goyi eri mwilaboni? (b) Mwahaya bwaddi nigaroromela wi Mulugu anere omariha goyi ni obure watene?

¹² Bibliya anihina Mulugu anipaddusile ni dhikalelo dholigana nuuliye. (Génesis 1:26) Dhikalelo dhatedhene dhapama ninnihuna enatonyihedha ekalelo anna Mulugu. Bumwahaya akala nnowukuwa namona muthu ahinna muladdu oonaga goyi, nnone wi Mulugu dinathabwa wukuuwa vanlubale! Nnone addi?

¹³ Bibliya anahudhiha wi ‘Mulugu doodhivela.’ (1 João 4:8) Odhivela bunamuthukulela werana dhatedhene anafuniye. Iyo nnodhivela mwaha wi Mulugu doodhivela. Kubuwela ayi: Wahere owedhaga, were omariha goyi ni obure oliwo? Woona wi Mulugu dakopolo ni doodhivela, mwahaya bwaddi, ahimahariga goyi ni obure oliwo? Okanne ebaribari wi dhatedhene  apaganyile Mulugu mulivuruni muna dhinere wereya, oliye kanoota! Mbwenye wihina okanne ebaribari wa ndha dhipaganyiliye, enofuneya omunona pamadhene Mulugu.

14. Ndina na Mulugu baani, kito nnonile addi wi oliye onafuna wi omwinthanegena?

¹⁴ We wafunaga okanna mukwawo, ethu baani yobajha onafuniwe omwaddela? Ndina nawo. Ki Mulugu, ohukanna ndina? Dhigereja dhowinjhiva enihina ndina naye di Mulugu obe Nabuya. Mbwenye madhu ala nthithimiho, eri ninga owoga ‘mwene’ obe ‘namathonga’. Mulugu onafuna wi omunone ndina naye wi di Yehova. Salmos 83:18 anawoga: ‘Wihina athu enone wi nyu, ndina nenyu di Yehova, Nyu bahi dili Eedhuludhulu eelabo yatene ya vati.’ Anamaleba a Bibliya ehilabihedha ndina nna dila dhowakwana 7000. Yehova onafuna wihina onone ndina naye ni omwinthanegena. Oherana ndala, ni efunelo yowi okale mukwaye.

15. Ndina na Yehova nnatapulela ddi?

¹⁵ Ndina na Mulugu nihikanna yotapulela enlubale. Nnatapulela wi oliye podi wakwaneliha ethu sithu anafuniye. Kaavo ethu enamurusa.  Anithaniwana ndina nna na Yehova duliyene bahi. *

16, 17. Entapulela ddi madhu ala enawoga (a) ‘Akopolo dhatedhene?’ (b) ‘Mwene amukalakala?’ (c) ‘Mpaddusi?’

¹⁶ Ninga nilerihu va Salmos 83:18 vinawoga wi: ‘Nyu baahi, dili Eedhuludhulu eelabo yatene ya vati.’ Ni va Apocalipse 15:3 vinihina: ‘Manlubale ni ootikiniheya  bimabasinyu, Yehova Mulugu akopolo dhatedhene. Dhowogowa ni dhebaribari sidila dhenyu, Mwene amukalakala.’ Madhu owi ‘akopolo dhatedhene’ enatapulela ddi? Enatapulela wi Yehova bahi dinna kopolo okwaranya dhopaddusiwa dhatedhene. Madhu owi ‘mwene amukalakala’ enatapulela wihina Yehova kanna omambelelo newene omagomo. Salmos 90:2 Onawoga wi oliye Mulugu ‘ahinna omambelelo newene omakuthulo.’

¹⁷ Yehova bahi dili Mpaddusi. Apocalipse 4:11 Anawoga ayi: ‘Yehova, Mulugu ehu, nyu difwanelele wakela nthithimiho, orihiwa ni kopolo, mwaha wi muhupaddusa dhithu dhatedhene. Dhithu ndha dhihikalawo ni dhihipaddusiwa wodhela efunelo yenyu.’ Eyo ebaribari, angero, thendderi, dhowima dha muthanko ni oba dha muniya, dhatedhene onooniwe apaddusile di Yehova.

18. Mwahaya bwaddi athu amodhaya egubuwela wi ethu yorusa wandana ni Mulugu? Bibliya anawoga ddi wodhela muselu yola?

¹⁸ Athu yilerigi dhikalelo dhapama dha Yehova, aliwa enowubuwela ayi: Mulugu dakopolo dhatedhene, dofuneyesesa, ni ali wolapela ni miyo, ki oyo onogipwatha? Mbwenye Mulugu onafuna wi nubuwelege ndala? Naari, Yehova onafuna wi nimwaddamele. Bibliya onowoga wi Mulugu ‘kali wolapela wa kadda muthu wa iyo.’ (Atos 17:27) ‘Mulugu onafuna wi we omwaddamela, ni ohuroromeliha wi anere wuwaddamela.’ — Tiago 4:8.

19. (a) Onande addi wandana ni Mulugu? (b) Dhikalelo baani dha Yehova dhudhivele vanlubale?

¹⁹ Onande addi wandana ni Mulugu? Yesu ohuwoga egi: Wihina ekanne egumi yohimala, yunoneni nyu, Mulugu mmodha eebaribari, nuule mmurumilinyu, Yesu Kiristu. (João 17:3) Vowindo odhowegenave ohudheragave wihina omunone pamadhene Yehova vamodha ni Yesu. Weragana ndala, onere wakela egumi yohimala. Motajhiha, nihihudhera wihina ‘Mulugu doodhivela.’ (1 João 4:16) Ohiya eyo oliye ohukanna dhikalelo dhimodha dhowoma. Bibliya anawoga wi Yehova ‘dathagaraga ni ohaguvela onyanyuwa, oovilela, oodhivela wahinamala ni eebaribari.’ (Êxodo 34:6) ‘Yehova dapama ni owaguva olevelela.’ (Salmos 86:5) Mulugu doojhejhiha ni oororomeleya. (2 Pedro 3:9; Apocalipse 15:4) We onere ohudherave dhikalelo dhimodha dha Mulugu wadidela omwileri Bibliya.

20-22. (a) Ki onande addi omwaddamela Mulugu wula wahimonaga? (b) Ethu baani enahoweleye wi olabihedhe wihina wahihiye omuhudhera Bibliya?

²⁰ Ki onande addi omwaddamela Mulugu wula  wahimonaga? (João 1:18; 4:24; 1 Timóteo 1:17) Wambela omwileri Bibliya, finamonigiwe Yehova wi muthu eebaribari. (Salmos 27:4; Romanos 1:20) Mudhidhi onamunonigiwe, odhivela wawo onerege othwabwa ni onerege ofunave onfiyedha oliye.

²¹ We onere wonelamo wi Yehova Babi ehu. (Mateus 6:9) Ohiya egumi anivahiliye, oliye onofuna wi egumihu eneddelege pama. Si emodhave babi oodhivela anamuhoweliyena mwanaye. (Salmos 36:9) Mwebaribarene, Bibliya onohudhiha wi enowenyeya wihina we wandane ni Yehova. (Tiago 2:23) Kubuwela ethu ninga yela! Yehova mpaddusi, onofuna wi okale mukwaye!

²² Podi wera athu amodhaya yambele wutujela wihina ohiye omuhudhera Bibliya. Yovaga wihina onodha okumemo mugereja wayesiwemo. Wahihiye wi muthu di muthu uyelelihe wandana wawo ni Yehova. Yehova muthu apama omwandanana onakanniwena.

23, 24. (a) Mwahaya bwaddi egafuneyaga wi waweregena makoho? b) Musolo onaharela nnahudhere ddi?

²³ Wamuhudheraga Bibliya podi wera omambelelo dhinere okalawo dhithu wahinoneligiwemo pama. Wahikanne manyazo okoha wihina okaviheriwe. Yesu awogile wi enofwanelela wiyeviha ninga ahima. (Mateus 18:2-4) Ahima odhiveliwa wawerana makoho owinjhiva. Mulugu onafuna wi ofwanye dhowakuladha. Mowindala wamuhudheraga Bibliya, ompwasedhege pamadhene wihina wahanganyedhege wi gihifwanya ebaribari. — Omwileri Atos 17:11.

²⁴ Makalelo ookweya omunona Yehova fumuhudhera Bibliya. Musolo onaharela, nnere onona mwahaya bwaddi Bibliya adhe akalege ohiyana ni malivuru mamodha.