1, 2. Yapadduwa ngovi athu enikohesa aavi?

MPULO munlubale ohugujhula luwani. Mulobwana ohuddumeya gereja ni futhi wapa athu owinjhiva. Oredda onithaniwa kanser ohumpa mayi, wahiya anamwani atanu.

² Yapadduwa ngovi athu enowikoha: Mwahaya dhigereya dhego dhowopiha dhowindala? Yikohaga enoweresa, ekalelewo ddi goyi ni widdana elabo yatene? Ki we? Onowabihaga wikoha ndala?

3, 4. (a) Habakuki amukohile ddi Yehova? (b) Yehova amwakunle addi?

³ Bibliya onosoriha wi adhari ororomeleya a Mulugu, yowikohesa ndala. Motajhiha, namavuhulela Habakuki ahimukoha Yehova egi: ‘Munagonihela ddi obure? Munahiyela ddi goyi ethabwaga? Mwahaya bwaddi ngasugwaga ogujhuliwave ni opanga vamentoni vaaga? Mwahaya bwaddi odhe widhalege owana ni okangana?’—Habacuque 1:3.

⁴ Va Habacuque 1:2, 3 Yehova onowakula nikoho na Habakuki, wodhela omuroromeliha wi ere woogolela dhego dhatedhene dhabure dhereya. Ela enatonyihedha wi Yehova ohukanna odhivela wavati vamurima ni athu. Bibliya onawoga egi: ‘Oliye annupwathani.’ (1 Pedro 5:7) Mwebaribarene Mulugu onotakaleliwa goyi nnonihu onikwaranya iyo. (Isaías 55:8, 9) Wi noonelemo, enohoweleya onona yowakula ya nikoho nna. Akala Mulugu onotakaleliwa, kito goyi enathabwela ddi?

5. Apurusori amugereja enahudhiha ddi wodhela goyi? Ki Bibliya onahudhiha ddi?

⁵ Apastori, apadiri, apurusori amugereja, enahudhiha wi goyi yatene onanitotela di Mulugu. Athu amodha enookala nusoriha wi ngovi dhinereya, di Mulugu onanifunana wi dhinereyelege, oliye dinonile muladduya. Thabwathabwa akwa mwaana, enihina yereyile ndala mwaha ere withaniwa ni Mulugu, amuhowela mwanamungero odhulu. Wula yeraga omwinkedha Mulugu. Yehova kanubuwelege werana obure. Bibliya onihina: ‘Mulugu eebaribari kaneerana dhithu dhabure, Akopolo Dhatene kanadha eerana dhithu dhovirigana!’—Jó 34:10.

6. Mwahaya bwaddi athu egamwinkedhaga Mulugu yonaga goyi?

⁶ Athu enomwinkedha Mulugu yubuwelaga wi oliye dinathonga elabo ela. Mbwenye musolo wa 3 nihudhera wi onathonga elabo ela di Saddana.

7, 8. Goyi enathabwela ddi?

⁷ Bibliya onowoga wi ‘elabo yatene eri mmadani mwa Mbure.’ (1 João 5:19) Saddana namathonga abure ni owopiha. Duliye ‘onaholosa athu aatene eelabo yavati.’ (Apocalipse 12:9) Athu owinjhiva enamutajhiha oliyeene. Bumwahaya elabo yatene edhaala athu owoota, antxiga ni abure.

⁸ Ohukalawo mwaha mmodha goyi egathabwaga mwilaboni. Adawu ni Eva ethegiliwa anamwani atene ehithega. Mwaha wa yothega, athu enowatotela goyi athu akwiwa. Aliwa enofuna okala vadhulu wapitha athu amodha. Aliwa enowana, enooya okoddoni, ni enowawoniha goyi athu amodha. (Eclesiastes 4:1; 8:9) Emodhaya sowi athu enowona goyi mwaha ‘mudhidhi rurumusa kunampaganya muthu.’ (Eclesiastes 9:11) Aliwa  yakala mburo ni mudhidhi wohifwanelela, enopadduweliwa ngovi ni dhithu dhabure morurumusa.

9. Nnone addi wi Yehova onere wamariha makathamiho atene enanifwanya?

⁹ Yehova kananitotela obure. Oliye kanathukula nibili mwaha wokalawo koddo, opanga ni wonihana goyi onereya. Kahiyo oliye oneriha wi dhereyege ngovi, oddiginyeya weelabo, mutokora obe mpulo. Podi wera onokala nuwikohawa: ‘Akala Yehova dakopolo dhatedhene odhulu ni elabo yavati, mwahaya bwaddi ahimarihaga makathamiho atene enanifwanya?’ Iyo nihinona wi Mulugu ohukanna odhivela ni iyo, mbwenye oliye ohukanna mwahaya agaahiya makathamiho othabwa.—1 João 4:8.

10. Saddana amwinkedhile ddi Mulugu?

¹⁰ Mmunddani mwa Ideni Saddana ohumuleketha Adawu ni Eva ofiyedha omurugunuwela Mulugu. Saddana omwinkedha Mulugu wi namathonga abure. Oliye wera, Mulugu onovita dhego dhapama dhafwanela okanna Adawu ni Eva. Saddana afuna aliwa erumedhege wi podi withongaga pama sokaviheriwa ni Mulugu.—Génesis 3:2-5; Osugwe wonelamo 27.

11. Nikoho baani nnafunihu waakula?

¹¹ Adawu ni Eva numutheegela Yehova aliwa omusadduwela. Annya yubuwela wi yerege owedha osakula yekiwa yapama ni yabure. Yehova ooneyihe addi wi Adawu ni Eva yeriliwana yahiviriganiha?

12, 13. (a) Adawu ni Eva nutheega, mwahaya Yehova adhe ahaguvelege waapa? (b) Yehova amwihiyele ddi Saddana ni athu wiita omwene wewa?

¹² Adawu ni Eva nutheega, Yehova kaguvele waapa.  Oliye wahiya wi yabaalege ahima. Ninga mwapaganyile Yehova, aliwa yere wabala ahima, yasakulege yekiwa baani afunege wathonga. Mbwenye, podive Saddana erege wera ddi efunelo ya Yehova yodhaliha elabo yavati ni athu oologomana, enere wereya kanalepela.—Génesis 1:28; Isaías 55:10, 11.

¹³ Saddana amwinkedhaga Yehova, kalivo Adawuve bahi ni Eva, yahikalavo matxikwi ni matxikwi angero yonile dhereyaga. (Jó 38:7; Daniel 7:10) Nuwindo Yehova ohiya mudhidhi wi Saddana athonge elabo yatene ya vati, athu yiite onamathonga wewa. Yehova adhe eeregena ndala afuna atonyihedhe wi Saddana muliba woota.

14. Nuvira yaka dhowinjhivadhene athu exixaga makalelo oothonga yoneye ddi?

¹⁴ Yaka dhowinjhivadhene athu exixiliwa makalelo othonga ofiyedha peeno, kaavo agiratile vampaddoni voomwene awedha othonga pama. Vano kaavo onanganyedha wi Saddana muliba woota. Ebaribarene athu, enohowela nikavihero na Mulugu. Namavuhulela Jeremiya ahiwoga ebaribari egi: ‘Yehova, gihinona pamadhene wi athu kinawedha withonga yekiwa. Newene kinawedha weddiha, manyalo ewa.’—Jeremias 10:23.

15, 16. (a) Mwahaya bwaddi Yehova agahiya goyi okalawo mudhidhi wowinjhivene? (b) Yehova ahinamariheladdi makathamiho enanifwanya?

¹⁵ Mwahaya bwaddi Yehova agenya okalawo goyi mudhidhi wowinjhivene? Ohinamarihela ddi dhego dhabure dhinanipadduwela? Mudhidhi onnana  otonyihedha wi onamathonga wa Saddana kahiyo wapama. Athu ehixixa onamathonga watene mbwenye kaavo awedhile othonga pama. Siyensiya ni tekonolojiya kadhinna kopolo dhomariha, obure, ohawa, otimbwini ni koddo. Mwebaribarene dhego ndha dhinna othabwa. Dhinowoniha wi athu enohowela nikavihero na Mulugu.

¹⁶ Yehova kanamariha mwaha wi oliye erana ndo enakalege ninga onokavihera onamathonga wa Saddana. Vano athu yamonege ninga onowanda othonga pamadhene. Bumwahaya Yehova ahimukaviheraga Saddana newene ahawadelihaga athu orumedha dhowoota dha Saddana.—Hebreus 6:18.

17, 18. Yehova onadha amarihe makathamiho ala ni mukalelo baani?

¹⁷ Onororomela wi Yehova podi omariha obure watene Saddana onaatoteliye athu? Hee. Mwaha kavo ethu enanvila Mulugu. Yehova ohunona wi woota wa Saddana winoodha wigome nlabo nimodha. Vano efunelo ya Yehova anniyena omambelelo yowomihedha elabo yavati wihina ekale parayizu, yereye ninga mwafuneliye. ‘Atene eli mmahame ammubuweloni’ evenyihiwe. (João 5:28, 29) Mudhidhi yoyo obulela, okwa athu enerege okohedha. Yesu anere omariha obure watene Saddana eriliyena. Yehova onere omulabihedha Yesu ‘wihina agujhule mabasa a Ddiyabo.’ (1 João 3:8) Bumwahaya nigamutamalela vanlubale Yehova, ohaguvela onyanyuwa ni onivaha oneti womunona, ni wosakula akala nnafuna namathonga ehu akale Yehova obe naari. (Omwileri 2 Pedro 3:9, 10.) Peeno nnowoona goyi, mbwenye kadda labo Yehova ononivaha kopolo wi naagonjhihe makathamiho enanifwanya.—João 4:23; omwileri 1 Coríntios 10:13.

 ¹⁸ Yehova kanamuwaddihedha muthu osakula othongiwa nuliye. Atene ehivahiwa oneti wosakula enafuniiwa. Vano kandowe noone mwahaya bwaddi oneti ola, odhe okalege wathima wakaddamuthu.

19. Oneti baani onivahile Yehova? Ki nnoneyihe addi wi nnotamalela?

¹⁹ Yehova ohunivaha oneti wosakula onanihiyaniha ni anenyama. Iyo kaninliga ni anenyama yahinna mubuwelo wosakula yapama ni yabure. (Provérbios 30:24-28) Kanili makina enalabela ele epandheliwiwa bahi. Mbwenye iyo nnowanda wisakulela yekihu, ethu enandhivela, akwihu owaweddana, ni ethu nnafunihu weragana mwigumini mwehu. Yehova ohunona wi neragana dhego ninga dhenda, dhinonihagalasa.

20, 21. Ojhavo ofuru wawo fuusakula ddi?

²⁰ Yehova onafuna wi nimudhivelege ni murima watene. (Mateus 22:37, 38) Oliye ori ninga babi onaddeliwa ni mwaanaye eraga: “Babani miyo ginowudhivelani” Mwaana yoyo kere owaddihedhiwa wihina awoge madhu ala, mbwenye enakuma vati vamurima vaye. Emodhave, Yehova ohunivaha oneti wosakula omulabela oliye obe naari. Ohiya werana efunelo yamuliba apaddusile, Adawu ni Eva esakule omurugunuwela Yehova. Kiwe onalabihedhe aavi ofuru wawo wosakula?

²¹ Wafuna ojhavo pama ofuru wawo, osakule omulabela Yehova. Athu owinjhiva ehisakula omulabela Yehova ohiya omulabela Saddana. (Provérbios 27:11) Mulugu amariha goyi yatene ni adhana elabo exa yosakula yawo enaakale eevi? Yowakulaya ya nikoho nna, enafwanyeya musolo onaharela.