1, 2. Mwahaya bwaddi nlobelo nikala nvaho wathima, ki enahoweleya ddi negi Yehova avuruwane malobelo ehu?

NALIGANIHIWA ni makalelo erambalale elabo yodhulu, iyo kanili yego. Yehova asugwa elabo yavati, asugwa malogo aathu atene onawoona ninga nthotho na manjhe mumpikani. (Salmos 115:15; Isaías 40:15) Anliganiha ni elabo yodhulu iyo nili oothabwesa oyeva, Salmos 145:18, 19 onawoga: ‘Yehova ori vakukuvene wa ale enamwebedha, Wa ale atene enamwebedha ni ebaribari. Oliye onowakwaniha dhatedhene dha ale enamova; yamulobaga wi akavihere oliye onowavuruwana ni onowawobola.’ Ela gari enlubale ninnihuna! Yehova Mpaddusi, onofuna wandana ni we ni onofuna ovuruwana malobelo awo. Kubuwela, oneeti munlubale wavayekiwa Yehova onanivahiye.

² Mbwenye Yehova onere ovuruwana malobelo ehu, nalobela ni makalelo onarumedhiye. Ki makaleloya bavi? Kabeni nisugwe ele Bibliya onawogiye wodhela olobela.

3. Mwahaya bwaddi nigalobela wa Yehova?

³ Yehova onofuna wi owogege nuuliye wodhela olobela. Nnonne addi? Kawerena omwileri Filipenses 4:6, 7. Wubuwele opama ninga yola. Mpaddusi a elabo yatene onowuthuwathuwela ni onofuna wi omwaddelege makathamiho enuufwanya ni dhego dhinuwitha mwiili.

4. Mwahaya bwaddi olobela malabwene, winere olibiha wandana wawo ni Yehova?

 ⁴ Nlobelo nnonikavihera wandana ni Yehova. Wandana wa athu abili winoliba yathapanyedhaga makathamiho enaafwanya ni monelo wewa. Emodhave enapadduwa ni Yehova. Mbibliyani, Yehova onosoriha monelo waye ni dhothuwathuwela dhaye wodhela we ni ele onafuniye werana osogolo. Wodhela nlobelo we podi malabwene omwaddela Yehova dhatedhene dhinuwitha mwiili. Wera ndo wandana wawo ni oliye winere oliba.—Tiago 4:8.

5. Nnonne addi wi Yehova kanawakula malobelo amatene?

⁵ Yehova onowawakula malobelo amatene? Naari! Oliye kanawakula malobelo amatene. Mudhidhi wanamavuhulela Izayiya, Yehova ahiwoga ni Amwana Izarayeli egi: ‘Naarive mwaweragana malobelo owinjhiva, kaginaavuruwana; Mwaha mada enyu ehidhala nikame.’  (Isaías 1:15) Eyo enatapulela wi, akala iyo nnowerana dhego dhabure, nalobelaga, Yehova kanawakula malobelo ehu.

6. (a) Mwahaya bwaddi egahoweleya okanna nroromelo? (b) Nnatonyihedhe addi wi nihikanna nroromelo?

⁶ Nafunaga wi Yehova avuruwane malobelo ehu, enohoweleya okanna nroromelo. (Marcos 11:24) Murumiwi Pawulo ohusoriha egi: ‘Wahikanna nroromelo kinawedheya omuhagalasa Mulugu, mwaha wi ole onamwaddamela Mulugu onohowela orumedha wi ohukalawo ni onowaareliha ale enamusayela ni ebaribari.’ (Hebreus 11:6) Mbwenye kahiyo owogave baahi wi nihikanna nroromelo. Enohoweleya woniha nroromelo nehu wodhela omwiwelela Yehova malabo amatene.—Omwileri Tiago 2:26.

7. (a) Mwahaya bwaddi naalobelaga wa Yehova egahoweleya wiyeviha ni owoga ni nriho? (b) Naalobelaga wa Yehova, nnande addi olobela ni murima wehu watene?

⁷ Naalobelaga wa Yehova neregena ni makalelo owiyeviha ni nriho. Mwahaya bwaddi? Kubuwela nahere nafuna nawoge ni namathonga obe ni mwene eelabo, nawoge nuwiyeviha ni nriho, kunoonelamo? Yehova di Mulugu Akopolo Dhatedhene, kunubuwela wi enofwanela omuriha ni wiyeviha nawogaga nuliye? (Génesis 17:1; Salmos 138:6) Malobelo ehu ekalege a nriho, ni nlobelege wa Yehova ni murima wehu watene, ohiya ovirisedha madhu mamodhave malabo amatene.—Mateus 6:7, 8.

8. Nalobela wa Yehova wodhela ethu siithu, enohoweleya wera ddi?

⁸ Ohiya eyo, naloba ethu siithu, yiwananege ni yele nlobilihu. Motajhiha, akala nihimuloba Yehova wi anivahe yojha ya kadda labo, enohoweleya wikatakata, ohiya omaala nubuwelaga wi Yehova onere onivaha nihenre  ethu. Naagumela mabasa owiyeviha naaparege ni murimihu watene. (Mateus 6:11; 2 Tessalonicenses 3:10) Yotajhiha emodha sowi, nalobela wa Yehova nilobaga nikavihero wi nande ohiya ethu yabure, nnohowela othawa dhoweha dhatedhene. (Colossenses 3:5) Kabeni noone makoho mamodha wodhela olobela.

9. (a) Malobelo ehu, edhowege wawani? (b) Mwahaya bwaddi nigalobela ni ndina na Yesu?

⁹ Malobelo ehu, edhowege wawani? Yesu ohasuziha anamaharaye olobela egi: ‘Babihu muli odhulu.’ (Mateus 6:9) Ohiya eyo oliye wera: ‘Miyo gili dila, ebaribari ni egumi. Kaavo onaya wa babani ahivinre wa miyo.’ (João 14:6) Mowindala malobelo ehu edhowege wa Yehova wodhela ndina na Yesu. Mwahaya bwaddi nigalobela ni ndina na Yesu? Wihina Yehova awakule malobelo ehu, nnohowela ovaha thima ele Yesu eriliyena. Nihudhera wi Yesu ohudha elabo yavati wi anoobole muuthegani ni muukwani. (João 3:16; Romanos 5:12) Yehova ohumuthoma Yesu okala namakutha munddimuwa ni Namatoriha.—João 5:22; Hebreus 6:20.

10. Ohukalawo mukalelo wokala onahoweleya naalobelaga? Kasoriha.

¹⁰ Ohukalawo mukalelo wokala onahoweleya naalobelaga? Naari. Yehova kananiloba wi naalobelaga nikokorege, nimelege obe nigiratigi. Bibliya ononihudhiha wi iyo podi othapanya ni Yehova ni mukalelo nnafunihu. (1 Crónicas 17:16; Neemias 8:6; Daniel 6:10; Marcos 11:25) Yehova kanapwatha mukalelo wokala onahoweleya naalobelaga, mbwenye ethu yathimaya Yehova onafuniye si ekalelo yehu. Iyo podi olobela nikuwihaga, oomaleyene mudhidhi bure-bure  obe, mburo bu mburo. Nalobela wa Yehova, nnokanna ebaribari wi oliye ononivuruwana.—Neemias 2:1-6.

11. Naalobelaga, nlobege ddi?

¹¹ Naalobelaga, nlobege ddi? Nlobelege ethu siithu eniwanana ni efunelo ya Yehova. Bibliya onawoga: ‘Kanapwatha, namuloba yego si yego eniwanana ni efunelo yaye, oliye ononivuruwana.’ (1 João 5:14) Iyo podi oloba ethu siithu nnafunihu? Hee. Walobelaga okalege ninga onathapanya ni mukwawo. Nimwaddelege Yehova dhatedhene nnubuwelihu ni dhinanukuula. (Salmos 62:8) Nlobege muzimu wotxena wi onikavihere werana opama. (Lucas 11:13) Naafwanyiwaga makathamiho nlobege thotho wi nande osakula yapama, nlobege kopolo wi nande ovilelana makathamiho. (Tiago 1:5) Nathega nlobege nikurumuwelo wa Yehova. (Efésios 1:3, 7) Ohiya eyo, naalobelelege athu amodha, amudhihu ni addibilihu ammulogoni.—Atos 12:5; Colossenses 4:12.

12. Muselu dhathima dhinahoweleya iyo owoga naalobelaga siivi?

¹² Muselu wathima onahoweleya iyo owoga naalobelaga buuvi? Museluya okalege Yehova ni efunelo yaye. Nnohowela omutamalela Yehova ni murima wehu watene wodhela dhego dhatedhene opaddusiliye. (1 Crónicas 29:10-13) Iyo nihinona wi Yesu agadhile elabo yavati, ohahudhiha anamaharaye makalelo oolobela. (Omwileri Mateus 6:9-13.) Oliye ohahudhiha wi vobajhavene elobege wi ndina na Mulugu ntxenihiwe, obe naakihedhiwe wa dhego dhatedhene athu enamwinkedhiwa. Yesu ohuwoga wi nnofwanela oloba wi Omwene wa Mulugu odhe, efunelo ya Yehova yereye elabo yavati. Dhegodha sidhendha Yesu owogiliye wi iyo nlobege obe nimwaddelege. Iyo nnere woniha wi nnovaha thima nlobelo, namuhela Yehova mburo woroma.

13. Naalobelaga enohoweleya wenjhedha madhu?

 ¹³ Naalobelaga enohoweleya wenjhedha madhu? Bibliya dhendho kanawoga. Iyo podi olobela mudhidhi wowinjhiva, mudhidhi mug’onove. Motajhiha, iyo nafunaga ojha nnolobela ni madhu mang’onove, mbwenye nnowerana nlobelo nolapa namwaddelaga Yehova makathamiho ehu obe namutamalelaga. (1 Samuel 1:12, 15) Niheregena malobelo oolapa wihina  nthetheliwe ni athu amodha, ninga yeresana athu mudhidhi wa Yesu. (Lucas 20:46, 47) Yehova kanafuna malobelo owi ndo. Yehova onadhiveliwa naalobelaga ni murimihu watene.

14. (a) Kadda labo nlobelege dila ngasi? (b) Ki eyo enatapulela ddi wodhela Yehova?

¹⁴ Kadda labo nlobelege dila ngasi? Yehova ononikongomedha owoga ni oliye malabo amatene. Bibliya onawoga egi: ‘Muwaralihe olobela,’ ‘Kamuselele olobela’ ni ‘Mudidele olobela.’ (Mateus 26:41; Romanos 12:12; 1 Tessalonicenses 5:17) Ela enatapulela wi Yehova onovuruwana malobelo ehu. Nimutamalelege malabo amatene wodhela odhivela ni ovaha waye. Ohiya eyo nimulobege Yehova wi anitodole aniholele, ni anivahe  kopolo. Noonelamo wi olobela winotxova, nnerege olobela wa Yehova malabo amatene.

15. Mwahaya bwaddi egahoweleyaga wera ‘amem’ namala olobela?

¹⁵ Mwahaya bwaddi egahoweleyaga wera ‘amem’ namala olobela? Madhu owi ‘amem’ enatapulela ‘mwebaribarene’ obe ‘ekale ndo.’ Neera ‘amem’ omagomihedho wa nlobelo, nnotonyihedha wi nnawoga ni murima wehu watene. (Salmos 41:13) Bibliya ononihudhiha wi muthu mmodha amala olobela, iyo naakula ‘amem’ nikuwihaga obe mmurimani nnotonyihedha wi nnorumedha nde owogiliye.—1 Crónicas 16:36; 1 Coríntios 14:16.

16. Yehova onowawakula malobelo ehu? Kasoriha.

¹⁶ Yehova onowawakula malobelo ehu? Hee, onowawakula. Bibliya onosoriha egi: ‘Nyu munaavuruwana malobelo.’ (Salmos 65:2) Yehova onowiwa ni onowawakula malobelo a matxikwi ni matxikwi aathu, onowawakula ni makalelo oohiyana-iyana.

17. Yehova onaalabihedha addi angero ni adhari aye a elabo yatene yavati wi awakule malobelo ehu?

¹⁷ Yehova onowalabihedha angero ni adhari aye a elabo yela yavati wi awakule malobelo ehu. (Hebreus 1:13, 14) Motajhiha enopadduwa ni athu owinjhiva enalobela elobaga nikavihero wi emonelemo Bibliya, mudhidhi yole Namona a Yehova otwanyuwela vaade vaye. Bibliya onowoga wi angero enokavihera olaleya ‘muthenga dhapama’ dhomwene wapela elabo yatene yavati. (Omwileri Apocalipse 14:6.) Ohiya eyo, namala olobela wa Yehova wodhela makathamiho obe ethu nnahowelihu, ddibila obe murogola podi onikavihera ni ethu yele nnahowelihu.—Provérbios 12:25; Tiago 2:16.

18. Yehova onalabihedha addi muzimu wotxena ni Bibliya wi awakule malobelo ehu?

 ¹⁸ Yehova onolabihedha muzimu wotxena wi awakule malobelo ehu. Namuloba nikavihero wi nande wagonjhiha makathamiho, Yehova ononivaha muzimu wotxena wi oniholele ni onivahe kopolo. (2 Coríntios 4:7) Ethu emodha onalabihedhiye wi awakule malobelo ehu di Bibliya. Bibliya ononikavihera osakula dhego dhapama. Namwilerigi Bibliya nnofwanyamo dholebela dhinanikavihera. Nakala omutugumanoni, dhowakula dha addibila obe namaholela mulogo ileri yolebela, podi okala makalelo mamodha Yehova onawakuliye malobelo ehu.—Gálatas 6:1.

19. Mwahaya bwaddi malabo mamodha iyo podi wubuwela wi Yehova kanawakula malobelo ehu?

¹⁹ Malabo mamodha, naloba yego onoovira mudhidheene, iyo podi wikoha: Mwahaya bwaddi ofiyedha peeno Yehova ahakulaga malobelo aaga? Onone wi oliye ohunona mudhidhi ni makaleloya oowakula malobelo ehu. Yehova ohunona ele nnahowelihu. Nididele olobela wihina noonihe wi nnaloba ni murima wehu watene ni nnomuroromela. (Lucas 11:5-10) Yehova onowawakula malobelo ehu mudhidhi nahubuwelihu. Motajhiha, naafwanyiwaga makathamiho, nnolobela wi Yehova anikavihere, mbwenye ohiya wamariha makathamihoya oliye podi onivaha kopolo wi nande ovilela.—Omwileri Filipenses 4:13.

20. Enapadduwa ddi naalobelaga malabwene wa Yehova?

²⁰ Olobela nvaho munlubale Yehova onivahiliye! Nikanne ebaribari wi oliye ononivuruwana. (Salmos 145:18) Naalobelaga malabwene wa Yehova ni murima wehu watene, wandana wehu nuuliye onakala wolibeene.