1. Onivahile egumi baani?

YEHOVA “di Mulugu ookalawo.” (Jeremias 10:10) Oliye dinipaddusile ni dinivahile egumi. Bibliya onosoriha egi: “Muhupaddusa dhego dhatedhene. Dhego ndha dhihikalawo ni dhihipaddusiwa wodhela efunelo yenyu.” (Apocalipse 4:11) Ebaribari, Yehova onoonifunana egumi. Egumi nvaho wathima, Yehova onivahiliye.—Omwileri Salmos 36:9.

2. Negi nikanne egumi yohagalala nerege ddi?

² Yehova ohunivaha dhatedhene nnahowelihu wihina nikalegewo, ninga yojha ni manjhe. (Atos 17:28) Oliye kananifunana dhendhave bahi, onafuna wi nikanne egumi yohagalala. (Atos 14:15-17) Negi nikanne egumi yohagalala, nawiwelelege malamulo a Mulugu.—Isaías 48:17, 18.

3. Kayini nuumpa ddibile Abeli Yehova amwerilena ddi?

³ Bibliya onahudhiha wi egumihu ni egumi yaathu amodha, ehikanna thima vamentoni va Yehova. Motajhiha Kayini mwana Adawu ni Eva amunyanyuweliye ddibile Abeli, Yehova ahiwoga nuuliye wi arabele ekalelo yele, mbwenye Kayini kafunile ovuruwana. Woona Kayini kavuruwanile, vasogolova oliye “omusadduwela ddibile Abeli ompa.” (Génesis 4:3-8) Yehova omusinyusa mwaha wa ele eriliyena. (Génesis 4:9-11) Muthu onakoya ntxiga mmurimani podi okala owopiha ni abure. Muthu yoyo kanadha aakela egumi yohimala. (Omwileri  1 João 3:15.) Yehova onafuna wi iyo nadhivelege athu atene.—1 João 3:11, 12.

4. Yehova anvahaga Moses malamulo ala Kumi afuna ooneyihe ddi?

⁴ Dhigavirile yaka 1000 Yehova ohoneyiha wi onovaha thima egumi, wodhela onvaha Moses Malamulo Kumi. Nlamulo nimodha neera: ‘Kupe.’ (Deuteronómio 5:17) Akala Muthu ompa muthu mukwaye momugana nuliyeya era opiwa.

5. Yehova ononamo aavi wodhela orahila wari?

⁵ Yehova ononamo aavi wodhela muselu worahila wari? Yehova onovaha thima egumi yamwaana ahinabaliwe. Nlamulo naavahiwe Amwana Ezarayeli, Yehova ahiwoga egihina, akala muthu di muthu amudugurula mwihiyana onna wari, nuwindo ambala mwaana ookwene, muthu yola era opiwa. (Omwileri Êxodo 21:22, 23; Salmos 127:3.) Ela enanihudhiha wi orahila wari yego yahinafwanelela.—Osugwe wonelamo 28.

6, 7. Nnonihe addi wi nnovaha thima egumi ninga Yehova?

⁶ Nnonihe addi wi nnovaha thima egumi yehu ni yaathu amodha ninga Yehova? Bumwahaya kannafuna werana ethu-sithu yeke vangovini egumi yaathu amodha. Mowindo kahiyo otakaliha mwiili mwaha omujha soola, ojha murombwe dhoviriganiha ogoogo, woona wi dhithu dhendha dhinotakaliha mwiili wehu ni dhinopa.

⁷ Egumi ni mwiili onivahile Mulugu, onofwanelela weddihaga pama. Oliye onafuna wi nsamalelege mwiili wehu. Enohoweleya okala ootxena vamentoni va Mulugu. (Romanos 6:19; 12:1; 2 Coríntios 7:1) Akala nnafuna wi webedha wehu orumedhiwege nuule onivahile egumi, nivahege thima egumi. Okanna moonelo wowi ndala, enofuneya osukuma dhego naalemelihu, nerana ndo Yehova onere onikavihera ovaha thima egumi.

8. Nnere ddi wi niheke egumi yehu ni egumi ya athu amodha vangovini?

 ⁸ Nihudhera wi egumi nvaho wathima. Yehova ononiroromela wi nnere werena eri yapama yahineke egumi yehu newene egumi yakwihu vangovini. Kannadha nixixa weddiha karo, mota obe ethu-sithu eneddihiwa mwamakalelo abure, newene waredhana jogu dhowopiha. (Salmos 11:5) Emodhave, nnerege osamalela nyumba yehu nnakalihuvo. Yehova ahavaha nlamulo Amwana Ezarayeli nawoga: “Wamaga nyumbawo exa, vadhuluva wekele txinga, wihina onadha amothevo muthu vano aliba enakala vaade vawo ekanne nibili.”— Deuteronómio 22:8.

9. Yehova onenya wi naapelege ddi anenyama?

⁹ Egumi ya mwanenyama sathima vamentoni va Yehova. Oliye onowenya wi naapege anenyama wihina naajhe obe esasanyiwena yowara, ni onorumedha wi nimpe mwanenyama akala onafuna anerele yego yabure. (Génesis 3:21; 9:3; Êxodo 21:28) Mbwenye nihixixe wawoniha goyi anenyama obe wapela ebewene.—Provérbios 12:10.

10. Yehova ooneyihe addi wi nikame nnatapulela egumi?

¹⁰ Vamentoni va Yehova nikame nihikanna thima mwaha egumi. Mudhidhi Kayini vampiliye ddibile Abeli, Yehova ahiwoga ni Kayini egi: “Nikame naddibilo ninna ogiithana vati vimotheliwa.” (Génesis 4:10) Nikame na Abeli natonyihedha egumi yaye, bumwahaya Yehova adhe amusinyusege Kayini mwaha ompa Abeli. Mutokora wa malabo a Nowe ogavinre, Yehova ahoneyiha pamadhene wi nikame nnatapulela egumi. Nuwindo, Yehova onvaha ofuru Nowe vamodha ni amudhaaye wi yajhege anenyama. Oliye wera: “Anenyama atene enedda  enna egumi ginowuvahani wi mwaajhege. Ninga guvahilimini makupu enajhiwa, ginowuvahani aatene.” Mbwenye yahikalavo ethu emodha Mulugu akoddihiliye wi ehijhe: “Mbwenye mwahijhe nyama ya mwanenyama niigumayeya obe nikame naye.”—Génesis 1:29; 9:3, 4.

11. Yehova awaddenle ddi nlogo Naamwana Ezarayeli wodhela nikame?

¹¹ Nuvira yaka 800, Yehova agamuwadelihe Nowe ojha nikame, vasogolova wawogana Amwaana Ezarayeli egihina: “Akala mwana Ezarayeli obe muthu adhile elabo emodha anakala ni nyu, asayaga anfwanya mwanenyema amukokolani obe balame enajhiwa ahidda, arajhihe osijha vano nikamena atibele.” Wenjhedhedha egi: “Kamujhe nikame.” (Levítico 17:13, 14) Yehova karugunusile mubuwelo anniyena wodhela nikame. Ojha nyama yahenyiwa, mbwenye nikame yahiwadelihiwa. Aliwa yampa mwanenyema wihina emujhena, nikamena yaddeliwe wi etibege nliddi yindo evuhelele ni thaya.

12. Makiristawu enoona aavi nikame?

¹² Nuuvira mwana yaka Yesu agakwile, arumiwi ni anamaholela mulogo wo Jeruzale ogiratela muselu yola, wihina esakule Nlamulo baani yavahiwe Amwana Ezarayeli nafwanelela ohariwagave ni makiristawu. (Omwileri Atos 15:28, 29; 21:25.) Yehova wakavihera wonelamo wi nikame nihikanna thima ni woona wihina nikame thotaleleya. Makiristawu oobajha kiyajha nikame newene kiyang’wa obe kiyajha nyama ya mwanenyama ahisijhiwe. Werana ndo yakale yego yowopiha ninga webedha dhikamuthu dhosema obe oraruwa. Ofiyedha peeno, makiristawu eebaribari enookodda ovahiwa nikame obe ong’wa nikame. Mwahaya  bwaddi yahirumedhaga? Yehova onafuna wi noonege nikame ninga yego yotaleleya.

13. Mwahaya bwaddi makiristawu yahirumedhaga ovahiwa nikame?

¹³ Eyo enatapulela wi makiristawu yahirumedhege ovahiwa nikame? Siyeyo! Mwaha Yehova ohunikoddiha ojha ni ong’wa nikame. Yahakale ninga Dotori eere wukoddiha ong’wa, were orumedha ovolosihiwa mmwiilini mwawo ni enjhesawu? Ebaribarene were okoodda. Emodhave, akala ohukoddihiwa ojha nikame obe ong’wa, kunaadhe orumedha ovahiwa nikame.—Osugwe wonelamo 29.

14, 15. Ekalele ddi yapama makiristawu ovaha thima egumi ni omwiwelela Yehova?

¹⁴ Kito akala Dotori eere, wahivahiwa nikame onokwa? Kadda muthu ohukanna yothoma yaye, akala onafuna amwiwelele Mulugu obe naari! Makiristawu enoovaha thima egumi evahiwiwa, mbwenye enosayela makalelo mamodha oofwanelela enavulusa egumi, ohiya ovahiwa nikame.

¹⁵ Iyo nnofuna okanna egumi yapama, mbwenye kiyakale ethu yapama walupa malamulo a Yehova wi nivuluse egumihu. Yesu ohuwoga egi: “Ole onafuna ovulusa egumi yaye onere oyelela, mbwenye ole onayelela egumi yaye mwaha wa miyo onere ofwanya.” (Mateus 16:25) Iyo nnafuna nimwiwelele Yehova, bumwahaya nigamudhivela. Oliye dinonile eri yapama mwigumini mwehu, mowindo nnoona egumi ninga yathima ni yotaleleya ninga Yehova onooniye.—Hebreus 11:6.

16. Mwahaya bwaddi adhari a Mulugu egamwiwelela oliye?

¹⁶ Makiristawu oororomeleya a Mulugu ehikoma wi yiwiwelele nlamulo nna nnawoga wodhela nikame. Aliwa kinarumedha ojha naari ong’wa nikame, newene  kinarumedha ovahiwa nikame. * Mbwenye enorumedha makalelo mamodha enavulusa egumi. Ehikanna ebaribari wi muliba opaddusile egumi vamodha nnikame ohunona eri yapama mwigumini mwehu. We onorumedha wi oliye dinonile eri yapama mwigumini mwawo?

17. Makalelo apama oolabihedha nikame Yehova avahiliye Amwana Ezarayeli baavi?

¹⁷ Nlamulo na Mulugu avahiwe Moses, Yehova ahiwoga ni Amwana Ezarayeli egi: “Egumi ya yopaddusiwa eri munikameni , ela miyo guvahilimini valtareni wihina dhithimihiwena dhothega dhenyu. Woona wi thinikame nnathimiha dhothega.” (Levítico 17:11) Amwana Ezarayeli yathega, yoloba nikurumuwelo wa Yehova, aliwa yomuthukula mwanenyama wihina akuthiwena mukutho ni yomuloba namakutha wi akuthulele nikame na mwanenyama ole valtareni. Ala yaali makalelo apama oolabihedha nikame Yehova avahiliye Amwana Ezarayeli.

18. Dila baani efuguleliwe mwaha Yesu ovelela egumaye?

¹⁸ Yesu nuudha elabo yavati, oliye obibiddela mukutho wanenyama weriwesana, wodhela ovelela egumi yaye obe okuthula nikame wihina dhileveleliwe dhoothega dhehu. (Mateus 20:28; Hebreus 10:1) Yesu nuuvelela egumaye yathima, Yehova onvenyiha muukwani wi adhowe odhulu, mowindala Yehova wafugulela dila athu atene wi yakele egumi yohimala.—João 3:16; Hebreus 9:11, 12; 1 Pedro 1:18, 19.

19. “Wihina nihikanne nibili ni athu atene” nere ddi?

 ¹⁹ Mukono munlubale Yehova onivahiliye sigumi yathima ninnihuna. Bumwahaya nigilibihedha wawaddela athu wi ekanne nroromelo ni Yesu wihina yakele egumi yohimala. Iyo nnowadhivela athu mwaha wi nnafuna naliwene yakele egumi yohimala ni nnowahudhiha makalelo okanna egumi yohimala. (Ezequiel 3:17-21) Neerana ndala nnere owoga ninga murumiwi Pawulo erile: “Kaginna nibili ni athu atene, mwaha kagihiyile wulaleyani efunelo yatene ya Mulugu.” (Atos 20:26, 27) Hee, nnere woneyiha wi nnovaha thima egumi ni nikame nalaleyaga athu amodha wodhela Yehova ni nawaddelaga wi egumi sathima.