MUSOLO 8
Omwene wa Mulugu ddi?
1. Musolo ola onafuna onoonelihemo nlobelo baani nivuwile?
ATHU owinjhiva ehinona nlobelo noovuwa nnithaniwa Babihu, obe nabwiya ehu. Yesu ohulabihedha nlobelo nna aahudhihaga anamaharaye makalelo oolobela. Wodhela nlobelo nna, Yesu aalobile ddi? Ekalele ddi yathima wonelamo nlobelo nna peeno?
2. Dhego baani tharu dhathima Yesu onihudhihiye oloba?
2 Yesu ohuwoga: ‘Mowindo, mulobelege mwigihina: ‘Babihu muli odhulu, ndina nenyu ntxenihiwe. Omwene wenyu odhe. Efunelo yenyu yereye elabo yavati, ninga odhulu.’’ (Omwileri Mateus 6:9-13.) Mwahaya bwaddi Yesu adhe anihudhihege oloba dhego ndha tharu?—Osugwe wonelamo 20.
3. Wodhela omwene wa Mulugu enahoweleya ddi onona?
3 Iyo nihudhera wi Mulugu onithaniwa Yehova. Nihoona ele Mulugu onaafuniyena athu ni elabo yavati. Ki Yesu afuna awoge ddi veriliye ‘omwene wenyu odhe?’, Nnohowela onona omwene oyo ddi, ni onande addi otxeniha ndina na Mulugu.
OMWENE WA MULUGU DDI?
4. Omwene wa Mulugu ddi? Ki mweneya baani?
4 Omwene wa Mulugu, onamathonga otikiteriwe odhulu, Yehova dimusankule Yesu wi akale Mweneya. Bibliya onithana othonga wula, omwene wa Mulugu. ‘Oliye di Mwene nabwiya, aanamathonga, aatene.’ (1 Tim. 6:15) Yesu ambela othonga, onere wakavihera athu aatene wakwaranya anamathonga atene eliwo, mwaha oliye dakopolo wapitha anamathonga aatene.
5. Omwene wa Mulugu onathongege elabo yavati ogaali waani?
5 Yesu nuvenyihiwa muukwani ahimala malabo 40, nuwindo ohogolowela odhulu. Osogolowa Yehova omusakula wi akale mwene a mumweneni mwaye. (Atos 2:33) Omwene wa Mulugu onerege othonga elabo yavati wula ogaali odhulu. (Apocalipse 11:15) Bumwahaya Bibliya agithanaga ‘omwene wodhulu.’— 2 Timóteo 4:18.
6, 7. Enamwerihe ddi Yesu okala namathonga oofwanelela?
6 Bibliya onawoga wi Yesu di namathonga oofwanelela wapitha anamathonga atene a elabo yavati, woona wi oliye ‘baahi dihinakwa.’ (1 Timóteo 6:16) Anamathonga a elabo yela bootega ni enookwa, mbwenye Yesu kanadha akwaga. Dhatedhene Yesu onafuniye werana dhinaakale dhapamave ni dhinere onikavihera okalawo malabo amatene.
7 Yovuhulela ya mBibliyani enowoga wi Yesu, mwene athagaraga ni oohaguvela onyanyuwa: ‘Muzimu wotxena wa Yehova onaakale ni oliye, Muzimu wathotho ni wenonelo, Muzimu wolaga ni wowedha, Muzimu wenonelo ni womovana Yehova. Oliye onere ohagalala mwaha omoova Yehova, Kanathongege wodhela dhowona, newene kanasumulelege wodhela ele aaddeliwiye. Onere wathonga ni ekalelo yapama ale enna murima wapama.’ (Isaías 11:2-4) Were odhiveliwa okanna mwene owindala?
8. Nnonne addi wi Yesu kanaathongege yeka?
8 Mulugu ohasakula athu amodha wi yathongege vamodha ni Yesu odhulu. Motajhiha, murumiwi Pawulo ohuwoga ni Timotiyu egihina: ‘Naavilelagave, nnere olamula nuliye.’ (2 Timóteo 2:12) Athu enalamulege ni Yesu enaakale angasi?
9. (a) Athu ala enathongege ni Yesu eli angasi? (b) Mulugu ambele wasakula alini?
9 Musolo wa 7 nihudhera wi, murumiwi Juwawu ahimona Yesu athongaga vamodha ni a 144 000. A 144 000 ala baani? Juwawu onowoga wi aliwa ‘yanna ndina naye ni ndina na Babe nigalebiwe vakoveni.’ Oliye wenjhedhedhave: ‘Baala enahara Ninbila mburo bu mburo nnayiwa. Eguliwe elabo yavati.’ (Omwileri Apocalipse 14:1, 4.) A 144 000 makiristawu oororomeleya Mulugu aasakuliye wi ethonge elabo yavati ni Yesu. Aliwa yakwa kinalegela, enoovenyihiwa odhowa odhulu. (Apocalipse 5:10) Yehova ambele wasakula athu yala mudhidhi wa makiristawu oobajha, wi ekose epaddi ya 144 000.
10. Yehova ni Yesu vamodha ni a 144 000 enerege onithonga pama, mwahaya bwaddi?
10 Mwaha wowasakula athu ala yathongege ni Yesu, Yehova ohoniha wi ononipwatha vanlubale. Yesu onaakale namathonga apama mwaha wi oliye ohunona ohilogomana wehu. Yesu onowabihaga okala mwilaboni yavati ni ohunona goyi. Murumiwi Pawulo ohuwoga wi Yesu ohukanna odhivela ni iyo, oliye ‘ohunona ndhe dhinanihalela,’ oliye ‘wehiwe ni dhoweha dhatedhene ninga iyo, mbwenye katheegile.’ (Hebreus 4:15; 5:8) Nalaya a 144 000 ehinona enatapulela ddi emuthu. Aliwa ehiwanana ohulogomana ni oredda. Mowindo nnofwanela ororomela wi Yesu ni 144 000 enerege onisamalela pama ni enerege wawona makathamiho ehu.
OMWENE WA MULUGU ONERE DDI?
11. Mwahaya bwaddi Yesu adhe aahudhihege anamaharaye oloba wi efunelo ya Mulugu yereyege odhulu?
11 Yesu ohahudhiha anamaharaye oloba wi efunelo ya Mulugu yereyege odhulu. Mwahaya? Musolo wa 3 nihudhera wi Saddana Ddiyabo ohumurugunuwela Yehova. Yehova ohenya wi Saddana vamodha ni ademoniyu aye ekale odhulu mudhidhi mug’nove. Mowindala kahiyo atene yaali odhulu yerana efunelo ya Mulugu. Musolo wa 10, nnere ohudhera wodhela Saddana ni ademoniyu aye.
12. Dhopadduwa bili dhofuneya dhilebiwe va Apocalipse 12:10 siivi?
12 Bibliya onowoga wi Yesu nusakuliwa ninga mwene a omwene wa Mulugu, ohuwana koddo ni Saddana. (Omwileri Apocalipse 12:7-10.) Versu 10 enowoga dhopadduwa bili dhofuneya. Yobajha, omwene wa Mulugu ohambela othonga, mweneya di Yesu Kiristu. Yanabili, Saddana ohiigariwa odhulu odha elabo yavati. Osogolowa nnere woona wi dhopadduwa nda dhihimala wakwanela.
13. Saddana nuwigariwa odhulu, epadduwile ddi?
13 Bibliya onowoga wi angero oororomeleya yahihagalala vaamoniliwa Saddana ni ademoniyu aye egiigariwe odhulu. Bibliya onowoga: ‘Odhulu ngo muhagalale, ni nyunwa munakalawo!’ (Apocalipse 12:12) Mwapeno odhulu wihikala murenddele ni wiwanana mwaha wi atene enakalawo enomwiwelela Mulugu.
Saddana ni Ademoniyu evokedhiwiwa elabo yavati, goyi enna othabwa
14. Saddana nuwigariwa odhulu enapadduwa ddi ni elabo yavati?
14 Mbwenye peeno dhego dhatedhene mwilaboni dhihimala ovirigana. Dhinonipadduwela dhego dhabure ‘mwaha Ddiyabo ohunikitela’ ni ‘ohunona wi omuhalele mudhidhi mug’onove.’ (Apocalipse 12:12) Saddana oli owalive. Oliye ohiigariwa odhulu, ni ohunona wi onere ogujhuliwa mohilegela. Bumwahaya aganitotela makathamiho, widdela ni goyi wapela elabo yatene yavati.
15. Efunelo ya Mulugu ni elabo yavati siivi?
15 Mbwenye Mulugu afuniye ni elabo yavati ohukannave. Oliye onofuna wi athu ekale oologomana ni ekalegewo malabo amatene mparayizu elabo yavati. (Salmos 37:29) Ki omwene wa Mulugu onande addi wakwaneliha efunelo yela?
16, 17. Yovuhulela ya Daniel 2:44 enanihudhiha ddi wodhela omwene wa Mulugu?
16 Yovuhulela ya Daniel 2:44 enowoga wi ‘Malabo a mamwene ala, Mulugu oodhulu onere otikitera omwene ohunadha ogujhuliwa. Omwene oyo kunaakakanihiwege. Onere ogujhula ni omariha omwene watene wa mwilaboni, Omwene wa Mulugu baahi bunathongege malabo amatene.’ Yovuhulela ela enanihudhiha ddi wodhela omwene wa Mulugu?
17 Yobajha, yolebela ela enanihudhiha wi omwene wa Mulugu wambele othonga ‘malabo a mamwene ala.’ Eyo entapulela wi omwene ogahambela othonga, mamwene eelabo yavati yathongaga. Yanabili, enanihudhiha wi omwene wa Mulugu kunadha omala ni kunaakakanihiwege. Yanatharu, omwene wa Mulugu onere ogujhula omwene dhiliwo windo othongege elabo yatene. Omwene wa Mulugu onaakale omwene wapama onathongege elabo yatene yavati. Vano athu enere okanna onamathonga enahoweliwa.
18. Koddo baani enaagujhule anamathonga a elabo yavati?
18 Ki omwene wa Mulugu onande addi othonga elabo yavati? Ehinathi ofiya koddo ya Mulugu, enithaniwa Armajedo, ademoniyu enere ‘watujela mamwene a elabo yavati, wi etugumanele owana koddo ya nlabo ninlubale na Mulugu, Akopolo dhatedhene.’ Hee, onamathonga waathu winere ogujhuliwa ni omwene wa Mulugu.—Apocalipse 16:14, 16; Osugwe wonelamo 10.
19, 20. Mwahaya bwaddi nigahowela omwene wa Mulugu?
19 Mwahaya bwaddi nigahowela omwene wa Mulugu? Mwaha wobajha: Nnothega, nnokala aredda ni nnokwa. Mbwenye Bibliya onowoga wi omwene wa Mulugu wambela othonga, nnerege okalawo malabo amatene. João 3:16 onawoga wi: ‘Mulugu ohudhivela vanlubale elabo, omuleva mwanaye mmodha, wi alene aatene enaamuroromele yahitolosiwe, mbwenye ekanne egumi yohimala.’
20 Mwaha wanabili: Nihirijhiwa athu abure. Owinjhiva enowota, kinaroromeleya ni ehikanna mweddelo wabure. Iyo kannanda omariha obure ola, mbwenye Mulugu onere werana. Yafiya koddo ya Armajedo athu abure enere opiwa. (Omwileri Salmos 37:10.) Mwaha wanatharu: Anamathonga a elabo ela yavati, kinawedha omariha makathamiho aathu ni kinaroromeleya. Aliwa kinaakavihera athu wi emwiwelelege Mulugu. Bumwahaya Bibliya agawoga egi: ‘Athu yathonganaga enitotela goyi.’ — Eclesiastes 8:9.
21. Omwene wa Mulugu wambela othonga elabo yavati onere ddi?
21 Armajedo avira, omwene wa Mulugu onere wakwaneliha efunelo ya Mulugu elabo yavati. Motajhiha, Saddana ni ademoniyu aye enere ovokedhiwa mukambura. (Apocalipse 20:1-3) Mowi eeno, kaavo onakalege muredda naari okwa. Mwaha okwa wa Yesu, athu atene oororomeleya enere okanna egumi yohimala mparayizu. (Apocalipse 22:1-3) Omwene ola onere otxeniha ndina na Mulugu. Eyo enatapulela ddi? Enatapulela wi Omwene oyo wambela othonga elabo yavati, athu atene enerege othithimiha ndina na Mulugu Yehova. — Osugwe wonelamo 21.
YESU AMBELE OTHONGA ALINI?
22. Nnonne addi wi Yesu kavahiwe omwene mudhidhi yole ofiyiliye odhulu?
22 Yesu ohahudhiha anamaharaye olobela: ‘Omwene wenyu odhe.’ Eyo entonyihedha wi omwene wa Mulugu waadhe osogolo. Vobajha Yehova ere otikitera onamathonga, mwanaye Yesu daakale mweneya. Yesu aasakuliwe okala mwene mudhidhi yole afiyiliye odhulu? Naari, oliye ahijheha vag’ono. Yesu nuvenyihiwa muukwani, Peduru ni Pawulo yowogesa yovuhulela eli va Salmos 110:1 wodhela Yesu. Yolebela ela Yehova ohuwoga wi: ‘Okirati omononi waga wojha, ofiyedha miyo wapweha amwiddani awo omanyaloni wawo.’ (Atos 2:32-35; Hebreus 10:12, 13) Yesu aajhehe mudhidhi mungasi wi Yehova amusakule akale mwene?
Omwene wa Mulugu onere wakwaneliha efunelo ya Mulugu
23. (a) Yesu ambele othonga alini? (b) Musolo onaharela nnahudhere ddi?
23 Yaka ya 1914 ehinathi ofiya, nikuru namakiristawu eebaribari yahonelamo wi ele yaali yaka yofuneya mwa dhovuhulela dha mBibliyani. Dhego dhinapadduwa ovenya yaka yela dhinowoniha wi aliwa yahiwoga ebaribari. Mwebaribarene Yesu ambele othonga yaka yela ya 1914. (Salmos 110:2) Vano Saddana ohuvokedhiwa elabo yavati, ni ‘omuhalele mudhidhi mug’onove.’ (Apocalipse 12:12) Musolo onaharela, nnere woona dhego dhinapadduwa dhinoniha wi nili mudhidhi wokuthula. Nnere ohudhera wi omwene wa Mulugu onere othonga elabo yatene yavati ni onere wakwaneliha efunelo ya Mulugu.—Osugwe wonelamo 22.
