1, 2. Nnawedhe addi wibarela elabo ela nnakalihu?

KUBUWELA weddaga ndila, nipevo nakopolo wufwanya, vano odhulu watewene okuneleyawo ni murabo, muzongwe oroma ojerima, vano dari oruma. Vasogolova muzongwe wambela orubwa. We onosayela mburo wi othawelewo. Wagumela mburo yoyo mwebaribarene onobareleya, kahiyo?

² Emodhave enanipadduwela peeno. Kadda labo nnavira elabo enna woopiha. Podi wera onowikohesa: Ginere ogumela mburo woobareleya? Namaleba a livuru na salmos ohuwoga egi: ‘Ginere omwaddela Yehova: ‘Nyu muli nikungu naaga noothawela nnagibarela; Mulugu aaga ginamuroromelimi.’’ (Salmos 91:2) Ebaribari, Yehova podi onikavihera elabo ela edhanle makathamiho owinjhiva, ni ononivaha ejhehedho yororomeleya osogolo.

3. Neere ddi wihina Yehova akale yothawela yehu?

³ Yehova onande addi onibarela? Oliye podi onivaha kopolo dhowagonjhihana makathamiho enanifwanya, woona wi athu atene yale enanitotela makathamiho kinna kopolo omukwaranya Yehova. Podive dhinipadduwelege dhego dhabure, nihikanna ebaribari wi Yehova onodha awomihedhe dhego dhatedhene dhinereya. Bibliya ononlibiha egi: ‘Mukalenave odhivela wa Mulugu.’ (Judas 21) Akala nnofuna okaviheriwa naafwanyiwaga makathamiho, kanihiye wandana ni Yehova. Nnande addi werana ndo?

4, 5. Yehova otonyihedhile addi wi ohukanna odhivela ni iyo?

⁴ Wihina ndhowegenave wandana wehu ni Yehova, enofwanelela onona wi Yehova ohukanna odhivela ni iyo. Kubuwela dhego dhatedhene Yehova onivahiliye. Ohunivaha elabo yowoma edhalilemo muthanko ni anenyama ohiyana-iyana enanitikiniha. Vasogolova onivaha dhoojha dhodhiva ni manjhe ongulamela wihina nang’wege. Nuwindo onihudhiha Bibliya, ndina naye ni dhikalelo dhaye dhathima onniyena. Okwaranya dhego dhatedhene, mwaha wodhivela waye, Yehova omuleva mwanaye onamudhiveliye Yesu odha elabo yavati wihina anivahe egumaye. (João 3:16) Wodhela mukutho wa Yesu, nihikanna ejhehedhelo yosogolo.

⁵ Nifunelo onniyena yowamariha makathamiho, Yehova ohumusakula Yesu odhulu wihina akale mwene a Omwene waye. Omwene oyo bunasaddule elabo yatene yavati wihina ekale parayizu, munakaliwege ni murenddele malabo amatene. (Salmos 37:29) Makalelo mamodha Yehova eriliyena mwaha wodhivela, funihudhiha magano enanikavihera okala elabo yela yorusa. Yehova onafuna wi nlobelege malabwene, oliye onere onivuruwana. Mwebaribarene Yehova ohukanna odhivela ni athu atene.

6. Onande addi ohanyedha odhivela wa Yehova?

⁶ Onande addi ohanyedha odhivela wa Yehova? Okanne elemelelo yotamalela dhego dhatedhene onuwerihedha Yehova. Yowukulihaya sowi athu a peeno kinna elemelelo yotamalela. Enereya peeno, yowereya Yesu agaali elabo yavati. Nlabo dhaala, Yesu agaavulumusile aliba maranya kumi, mmodha bahi dawedhile omutamalela Yesu. (Lucas 17:12-17) Ekalelo yehu ekale ninga yamulobwana ole amutamalele Yesu. Malabo atene nimutamalelege Yehova dhego dhatedhene onanerihedhiye.

7. Yehova onafuna iyo nimudhivelege aavi?

 ⁷ Ohiya eyo, nihiyoya nimudhivelege Yehova. Yesu ahiwoga ni anamaharaye wi emudhivelege Yehova ni murima watene, ni mwiili watene, ni mubuwelo wewa watene. (Omwileri Mateus 22:37.) Eyo enatapulela ddi?

8, 9. Nnatonyihedhe addi wi nnomudhivela Yehova?

⁸ Owogave bahi wi ginomudhivela Yehova winowakwana? Newene! Iyo nnotonyihedha wi nnomudhivela Yehova ni murimihu watene, mwiili wehu watene, ni mubuwelo wehu watene wodhela dhego nnerihuna. (Mateus 7:16-20) Bibliya ononaddela pamadhene wi akala nihikanna odhivela ni Yehova nawiwelelege malamulo aye. Enoorusa wawiwelela? Naari! Mwahaya bowi ‘malamulo aye kinanyemela.’—Omwileri 1 João 5:3.

⁹ Wawiwelela malamulo a Yehova winodhiha ohagalala mwigumini mwehu. (Isaías 48:17, 18) Wihina Yehova akalegeve mukwihu enaanikavihere ddi? Kasugwa nikomana.

10. Mwahaya bwaddi egahoweleya wi ohudheregeve wodhela Yehova?

¹⁰ Wandile addi wandana ni Yehova? Yukavihere fumuhudhera Bibliya, wuthukulele omunona Yehova ni okala mukwawo. Wandana wawo ni Yehova onakala ninga motho onafuniwe wi ohuthimege. Akala onafuna wi mothoya ohuthimege, wajelegevo makwini wihina ohiddege malabwene. Simodhave enafuneya, ohudhera wodhela Yehova wihina wandana wenyu onadha ogwaddeye.—Provérbios 2:1-5.

11. Wadhowaganave omuhudhera Bibliya enereye ddi?

¹¹ Wadhowaganave ohudhera wawo wa Bibliya, onere ofwanya dhithu dhimodha dhinuuddiginye murima. Yahereya ni anamahara abili a Yesu aliwa numala wonelamo dhovuhulela dha mBibliyani aatapulele Yesu, aliwa wera: ‘Murima kuwanitomowe anaddeliye mudila, anonelihagamo pamadhene dholebela?’—Lucas 24:32.

12, 13. (a) Wakanna odhivela ni Mulugu enereye ddi? (b) Wihina odhivela wawo onniwena ni Yehova odhowegeve, enafuneya ddi?

 ¹² Ninga yereyile ni anamahara a Yesu nuwonelamo dholebela dhawogiwa, podi wera ehipadduwa ni we wambeliwe omonelamo Bibliya onawogiye. Eyo ehukavihera omunona Yehova ni okanna odhivela nuliye. Kuwenye ovuguwa odhivela wawo onniwena ni Yehova.—Mateus 24:12.

¹³ Akala uhandana ni Mulugu, enofuneya wilibihedha wi wandana wenyu okale woliba. Wihina yereye ndo, odidele ohudhera wodhela Yesu ni wubuwelege makalelo ooparihedha mabasa mwigumini mwawo dhinahudheriwe. (João 17:3) Mudhidhi onamwilerigiwe ni onamuhudherigiwe Bibliya wikohege weka: ‘Muselu ndha dhinagihudhiha ddi wodhela Yehova? Dhinagikavihere addi omudhivela Yehova ni murima watene?’—1 Timóteo 4:15.

14. Olobela winanikavihere addi wenjhedha odhivela wehu ni Yehova?

 ¹⁴ Wakanna mukwawo apama kamunavira nlabo muhuthapanyile, eyo enoweriha wi wandana wenyu okale woliba. Emodhave enapadduwa, nalemela malabwene othapanya ni Yehova wodhela olobela, odhivela wehu nuliye winoliba. (Omwileri 1 Tessalonicenses 5:17.) Olobela mukono munlubale wathima onivahile Babihu oodhulu. Nalobelaga nifugulege murimihu watene. (Salmos 62:8) Oliye kanafuna wi nalobelaga naasorihege madhu mamodhave mudhidhi watene, mbwenye onafuna wi nimwaddelege dhinahowelihu. Eyo ebaribari, nadidela omuhudhera Bibliya ni olobela ni murima watene odhivela wehu nuliye winoliba.

15, 16. Mwigumini mwawo onawoona aavi mabasa oolaleya?

¹⁵ Akala nnafuna wi odhivela wehu ni Yehova odhowegeve, enofuneya nawaddelege athu amodha dhinarumedhihu. Wawaddela athu amodha dhinawoga Yehova, oneti munlubale. (Lucas 1:74) Ola mutholo Yesu aahiyedhiye Makiristawu atene eebaribari wi yeregena. Kadda muthu ohukanna mabasa yala oolaleya Omwene wa Mulugu. Kiwe ohambela olaleya?—Mateus 24:14; 28:19, 20.

¹⁶ Murumiwi Pawulo awoona mabasa ala oolaleya ninga mabasa athima, bumwahaya adhe erege nihikanna ‘dhorela.’ (2 Coríntios 4:7) Wawaddela akwawo wodhela Yehova vamodha ni efunelo yaye, ekale yego yathima mwigumini mwawo. Akala onofuna omulabela pama Yehova, mabasa ala wapwehe mburo wobajha. (Hebreus 6:10) Mabasa oolaleya enowukavihera we naale enuvuruwana omwaddamela Yehova ni wakela egumi yohimala osogolo. (Omwileri 1 Coríntios 15:58.) Ehikalawo mabasa mamodha enuhagalasa okwaranya mabasa yala?

17. Mabasa ala ekalele ddi owaguveya?

 ¹⁷ Olaleya mabasa owaguveya. Bibliya onosoriha egi: ‘Olaleye muthenga,’ wenjhedhedhave eraga, ‘werena mowaguva.’ (2 Timóteo 4:2) Athu aatene enofwanelela olaleyiwa muthenga ola Womwene wa Mulugu. Bibliya onihina: ‘Nlabo ninlubale na Yehova nihaddamela! Nihaddamela, nnowaddamela mowaguva!’; ‘Kavinalegele!’ (Sofonias 1:14; Habacuque 2:3) Eyo ebaribari, Yehova onere ogujhula elabo ela ya Saddana edhanle dhego dhabure. Mudhidhiya ohunafiye, enofuneya wawaddela athu atene wihina esakule omulabela Yehova obe naari.

18. Mwahaya bwaddi nigatugumana ni Makiristawu eebaribari wi nimwebedhe Yehova?

¹⁸ Yehova onafuna iyo ntugumanege ni Makiristawu eebaribari nimwebedhege oliye. Bibliya onawoga egi: ‘Nubuwelanege mmodha ni mukwaye wi nilibihane modhivela ni mabasa apama, kanihiye otugumana, ninga emanya yaathu amodha, mbwenye nlibihanege mmodha nimukwaye, thabwathabwa noonaga wi labo ninna ofiya.’ (Hebreus 10:24, 25) Bumwahaya egafuneya wilibihedha oya omutugumanoni malabo amatene, woona wi mutugumano, oneti ninnihuna wolibihana mmodha ni mukwaye.

19. Enuukavihere ddi okanna odhivela naaddibila vamodha ni arogola ammulogoni?

¹⁹ Wakanna elemelelo yotugumana, onere okanna akwawo apama enuukavihere omwebedha Yehova. Addibila ni arogola onafwanyiwe omutugumanoni, kadda muthu ohukanna ekalelo enahiyana mmodha ni mukwaye, mbwenye atene yala enna wilibihedha wi emwebedhe Yehova. Aliwa kahiyo oologomana, malabo mamodha enoviriganiha. Yerana ethu enuvereyihe murima, walevelelege. (Omwileri Colossenses 3:13.) Ethu yapama enuukavihere malabwene wadhivela addibila ni wandana  wawo onniwena ni Yehova, fusugwa epaddi yapama aliwa enniwana.

20, 21. ‘Egumi yeebaribari’ ddi?

²⁰ Yehova onopaganya wavaha akwaye atene egumi yapama. Bibliya onahudhiha wi egumi nnafunihu okanna osogolo enaakale yohiyana niila ninnihuna peeno.

²¹ Osogolo, nnerege okalawo malabo amatene, kannakannege yaka 70 obe 80 bahi okwa. Nakala mparayizu nnere wakela ‘egumi yohimala’, yologomana, yohagalasa ni yamurenddele. Egumi ela Bibliya onithana ‘egumi yeebaribari.’ Yehova dipaganyile onivaha egumi yeebaribari, mbwenye wihina nihiyelele egumi ela, enofuneya werena dhatedhene nnandihu wi ‘nipareele nikopolo’ egumi ela.—1 Timóteo 6:12, 19.

22. (a) Nnatonyihedhe addi wi nnofuna wakela ‘egumi yeebaribari?’ (b) Wihina naakele egumi yohimala enafuneya ddi?

²² Nnatonyihedhe addi wi nnofuna wakela ‘egumi yeebaribari?’ Enofuneya ‘werena opama’ ni ‘oreela ni mabasa apama.’ (1 Timóteo 6:18) Eyo enatapulela oparihedha mabasa nnahudherihu mBibliyani. Mbwenye ofwanya egumi yeebaribari kahiyo yokweya, enofwanelela wilibihedha. Naherana ndo, nnoyelela egumi yohimala. Nvaho ola wa Yehova enaakele badhari enna nroromelo, wodhela ‘opama wohifwaneliwa.’ (Romanos 5:15) Mohanganyedha Babihu oodhulu, onere wavaha egumi, adhari aye atene enna nroromelo.

23. Mwahaya bwaddi egafuneya, okanna dhosakula dhapama?

²³ Vano wabihe wikoha: ‘Ginna omwebedha Yehova mwamakalelo onarumedhiye?.’ Wonelamo wi ehikalawo yego mwigumini mwawo enahoweleya osaddula, kulegele, osaddule mudhidhi ohunathi ogwaddeya. Namuroromela Yehova, neerana dhatedhene wi nimwiwelele onere  onibarela. Oliye onere wobola nlogo naye malabo yala ookuthula enasugweriwa ni Saddana. Yehova ohupaganya wakwaneliha efunelo yaye yomudhana parayizu ohunadha amala. Wafuna okanna egumi yeebaribari, dhosakula dhawo dhikalege dhapama.