1, 2. Akwaye amodha a Yehova yaali aani?

MUTHU baani waamusakuliwe wihina akale mukwawo omweddana? Podi wera waamusakule ole ohunuuvanyiha, oniwananiwena pama obe onna dhikalelo dhapama dhinutikiniha.

² Yehova Mulugu ahasakula athu wi ekale akwaye. Motajhiha, ahimusakula Abarawu wi akale mukwaye. (Isaías 41:8; Tiago 2:23) Muthu mmodha Yehova amudhiveliye ari Davidi. Mudhari afiyedhiliye owoga wi oomuhagalasa murima. (Atos 13:22) Namavuhulela Daniyeli aari ‘athima vanlubale’ vamentoni va Yehova.—Daniel 9:23.

3. Wihina iyo nandane ni Yehova ninga Abarawu, Davidi ni Daniyeli, neere ddi?

³ Abarawu, Davidi ni Daniyeli, yandile addi wandana ni Yehova? Yehova ahiwoga ni Abarawu egi: ‘Mwaha wi ohugiwelela.’ (Génesis 22:18) Yehova akwaye onaasakuliye baale eri owiyeviha ni enamwiwelela onawogiye. Ohiya eyo, ohenya nlogo naathu wi ekale akwaye. Yehova ahiwoga ni nlogo naamwana Ezarayeli egi: ‘Mwiwelelege madhu aaga, miyo ginokala Mulugu enyu, nyu munokala nlogo naaga.’ (Jeremias 7:23) Akala we onafuna wandane ni Yehova, omwiwelelege onawogiye.

4, 5. Yehova onaakavihera addi akwaye?

⁴ Bibliya onosoriha wi Yehova, ‘onosugwa elabo yatene, wihina amukavihere ole onna murima wapama.’ (2 Crônicas 16:9) Va Salmos 32:8 Yehova onowaroromeliha akwaye  wakavihera egihina: ‘Ginere wuvaha enonelo ni guxagihe mu dila onafunigiwe weddaga. Ginerege wulaga, mento aaga egaali txethe gusugwedhaga.’

⁵ Ohukalawo mwiddani akopolo onotakaleliwa aamonaga muthu onaveda wandana ni Mulugu. Mbwenye Yehova ononithuwathuwela wihina anikavihere. (Omwileri Salmos 55:22.) Ninga adhari a Yehova, nnomulabela oliye ni murima wehu watene. Bumwahaya nahiselelaga omuroromela Yehova podive nifwanyiwaga makathamiho oorusa. Mowindo nnorumedha madhu awogile Davidi wodhela Yehova egihina: ‘Oliye ali moono waaga wojha, kaavo onadha agithuusa.’ (Salmos 16:8; 63:8) Ethu baani oneerana Saddana wi adabwanyedhe wandana wehu ni Yehova?

6. Wodhela athu enamulabela Mulugu, Saddana awinkedhile ddi?

⁶ Musolo wa 11 nihudhera wi Saddana ohimwinkedha Yehova wi muliba woota. Oliye wera Adawu ni Eva yerege owedha osakula yekiwa yapama ni yabure sokaviheriwa ni muthu. Thalako ya Jo enotonyihedha wi Saddana awinkedhile athu atene enafuna wandana ni Yehova. Oliye wera athu atene kinamulabela Mulugu mwaha wodhivela, mbwenye enamulabela mwaha wa mareliho onaavahiye. Nuwindo Saddana wera miyo podi werana ethu siithu wihina muthu amurugunuwele Mulugu. Kabeni noone makathamiho yanfwanyile Jo ni makalelo Yehova amukaviheriye.

7, 8. (a) Murima wa Yehova wamoona aavi Jo? (b) Saddana awogile ddi wodhela Jo?

⁷ Jo ali aani? Aali mulobwana anna nroromelo novaadda, akalilewo yaka ya 3600 mundduli. Veelaboni ya vati kaavo muthu owoma murima aligana ni Jo, bumwahaya Yehova adhe amudhivelege. Jo ali muthu amoova Mulugu ni oopihiwa werena obure. (Jó 1:8) Mwebaribarene Jo ahandana ni Mulugu.

 ⁸ Mbwenye Saddana, omwinkedha Jo wera onamulabela Mulugu mwaha wa dhoorela anniyena. Nuwindo Saddana owoga ni Yehova wera: ‘Kamubarele dhego dhaye dhatedhene, nyumbaye ni dhego dhatedhene onniyena? Muhaareliha mabasa onaapariye, dhifuwo dhaye dhinna winjhiva. Mbwenye, kamwakeni dhego dhatedhene onniyena, akala mwebaribarene kanuruwaneni.’—Jó 1:10, 11.

9. Yehova aamwenyile Saddana werana ddi?

⁹ Saddana ubuwela wi Jo onamulabela Yehova mwaha womukavihera. Saddana wera ohukanna kopolo dhomukwerebeyiha Jo ahimulabelege Yehova. Mbwenye Yehova ahikanna ebaribari wi Saddana kanande omuseleliha Jo omulabela oliye. Numala, Yehova weenya wi Saddana amwehe akala mwebaribarene andanile ni Yehova mwaha wodhivela obe mareliho anvahiliye.

10. Saddana omwehile ninddi Jo, nuwindo Jo erile ddi?

¹⁰ Vobajha Saddana opa dhifuwodhaye dhatene. Voharela wapa adharaye owinjhiva yamulabela. Dhoorela dhaye dhatedhene anniyena oliye oyelela. Egereye ndo, Saddana wapa anaye kumi nnipevo nowopiha. Podive dhigampadduwele ndala, Jo okalave txithi amuroromelaga Yehova. ‘Mwa dhatedhene dhereyile, Jo katheegile, newene kamwinkedhile Mulugu werana yego yabure.’—Jó 1:12-19, 22.

11. (a) Yego emodha Saddana amwerihedhiye Jo yaali ddi? (b) Nuumwerana ndala Jo awogile ddi?

¹¹ Saddana kamuselele. Ompanbihagave Mulugu eraga: ‘Vano, kasaddulani egumaye yatene ni oredda, obajhana mmakuvani ni mwiili waye watene, akala mwebaribarene kanuruwaneni.’ Vano Saddana onvokedha oredda wowopiha ni womwitha mwiili. (Jó 2:5, 7) Jo okalave txithi amuroromelaga Yehova. Vasogolova oliye wera: ‘Ginoofiyedha okwa waga gahiselele nroromelo naaga!’—Jó 27:5.

12. Jo atonyihedhile addi wi Saddana muliba woota?

 ¹² Jo kaanona wi makathamiho ale yanfwanya amutotela di Saddana. Oliye ubuwela wi di Yehova onamutotela. (Jó 6:4; 16:11-14) Podive Jo oonagave goyi, oliye okalave txithi amuroromelaga Yehova. Ebaribarene Saddana era omwinkedha, Jo kandanile ni Mulugu mwaha wa dhoorela anvahiliye, mbwenye odhivela wavati vamurima anniyena ni Yehova.

13. Mwahaya Jo okanna nroromelo noovadda, Yehova anvahile ddi?

¹³ Podive Jo ahinonaga dhereyile odhulu, oliye okala txithi amuroromelagave Mulugu ni atonyihedhaga wi Saddana muliba woota. Vasogolova Yehova onvaha mareliho ninga makalelo ootonyihedha wi ari mukwaye oororomeleya.—Jó 42:12-17.

14, 15. Yowoota baani enatonyihedha wi Saddana awinkedhile athu atene?

¹⁴ Thalako ya Jo, ohupuravo ethu yuhudhihile mwigumini mwawo? Peeno Saddana anna oninkedhave wi nnamulabela Mulugu mwaha wa mareliho onanivahiye. Jo 2:4 Saddana ohusoriha egihina: ‘Muthu onere oleva dhatedhene dhinniyena mwaha wa egumaye.’ Otonyihedhaga wi Saddana kamwinkedhile Jo bahi, oliye awinkedhile athu atene alobwana ni ahiyana wihina enamulabela Mulugu mwaha dhego onaavahiye. Dhiganvire yakadhene, Jo agakwile, Saddana kaaselele omwinkedha Yehova ni adhari a Mulugu. Motajhiha va Provérbios 27:11, Yehova onowoga egi: ‘Mwanaga okale athotho, ohagalalihe murima waga, wihina gimwakule ole onaginyemula.’

¹⁵ Wihina Saddana anoniwe wi muliba woota, ethu yapama fumwiwelela Yehova ni okala mukwaye oororomeleya. Podi akala wandana wula ni Mulugu, winohoweleya osaddula dhego dhowinjhiva mwigumini mwawo, kudduwale, wandana ni Yehova yego yathima okwaranya  ethu-sithu. Mbwenye enofuneya wubuwela pamadhene. Saddana enre, nroromelo nawo ni Mulugu nnadha nthima, nlabo nenno onadhiwe ofwanyiwa makathamiho. Malabo amatene onogana nigiddanile ni Mulugu. Nimakalelo baani?

16. (a) Murako baani Saddana onalabihedhiye wi agwadde wandana wehu ni Yehova? (b) Saddana onalabihedha mubuwelo baani wi anilapelihe ni Yehova?

¹⁶ Saddana onalabihedha murako dhohiyana-hiyana wihina aniddanihe ni Mulugu. Oliye podi onihidda amentweene oobaga owali ‘ninga poddogoma, anvedaga muthu oomutakuna’ (1 Pedro 5:8) Vowindala, kugurumele akala akwawo, amudhawo obe muthu di muthu onowuthusa wihina ohiye omuhudhera Bibliya naari ohiye werana eri yapama. Wubuwele wi bumurako mmodha Saddana anahiddiyena athu amentweene.  *(João 15:19, 20) Saddana ‘onowisaddula iwoneyihaga ninga mungero owaara.’ Oliye werihaga dhego dhabure okalaga ninga dhapama. (2 Coríntios 11:14) Malabo mamodha Saddana podi onikwerebeyiha ni mubuwelo wowi Mulugu kanadha arumedha wandana ni iyo, mwaha wa dhothega dhehu dhithabwile winjhiva.—Provérbios 24:10.

17. Mwahaya bwaddi nigamwiwelela Yehova?

¹⁷ Namwiwelela Yehova onawogiye nnere otonyihedha wi Saddana muliba woota. Wihina nimwiwelele enaanikavihere ddi? Bibliya onosoriha egi: ‘Omudhivele Yehova Mulugu awo, ni murima wawo watene, egumi yawo yatene  ni kopolo dhawo dhatedhene.’ (Deuteronómio 6:5) Iyo nnomwiwelela Yehova mwaha wi nnomudhivela. Odhivela wehu ni Yehova wunnuwa, kadhinanirusege werana dhatedhene onafuniye. Murumiwi Juwawu ohuleba egi: ‘Omudhivela Mulugu winatapulela ohara malamulo aye, woona wi malamulo aye kinanyemela.’—1 João 5:3.

18, 19. (a) Dhego baani Yehova onanikoddihiye werana? (b) Nnone addi wi Yehova kananiloba werana dhego nahinawedhihu werana?

¹⁸ Dhego baani Yehova onanikoddihiye werana? Dhego dhimodha dhinamutakalela Yehova dhihisorihiwa vakwaduruni ‘ Widde ele Yehova oniddiye.’ Vobajhavene podi woneyaga ninga ethu yapama wula egaali yabure. Mbwenye wamwileri Bibliya, opendda pamadhene wileriwe, onowonelamo wi sapama wiwelela ele Yehova onawogiye. Werana ninga enahoweleya, enofwanelela osukuma dhuudhivelesa kale. Omambelelowene podi okala yorusa osaddula egumi yawo wihina wiwananihe niile enafuneya,  mbwenye onokanna murenddele ni ohagalala onafwanyeya naale yandane ni Yehova. (Isaías 48:17, 18) Nnone addi wi iyo podi osaddula egumi yehu?

¹⁹ Yehova kanadha aniloba werena ethu nahinandihu. (Deuteronómio 30:11-14) Oliye dili mukwihu eebaribari, oninonne pama okwaranya iyo nannya. Yehova ohunona nde dhinawedhihu nindhe dhahinawedhihu werana. (Salmos 103:14) Murumiwi Pawulo ohunilibiha egihina: ‘Mulugu dororomeleya ni kanuhiyeni wehiwa ni dhithu muhinandinyu ovilelana, mbwenye yadha yowehaya oliye anere wukaviherani wihina mwakwanihe.’ (1 Coríntios 10:13) Iyo podi ororomela wi Yehova onere onivaha kopolo wihina nerena eri yapama. Oliye onere wuvaha ‘kopolo dhohikala dha masika.’ wi wagonjhihe makathamiho amatene enuufwanya. (2 Coríntios 4:7) Mwamakalelo ohiyana-hiyana Pawulo akaviheriwiye ni Yehova vari va makathamiho, ahiwoga eraga: ‘Ginowedha  werana dhatedhene mwaha wa ole onagivaha kopolo.’—Filipenses 4:13.

20. Dhikalelo baani dhinafwanelela otajhiha, mwahaya bwaddi?

²⁰ Akala onafuna wi Yehova akale mukwawo, osukume dhego dhatedhene dhinamutakalela, weregena dhinamudhivela. (Romanos 12:9) Enandana ni Yehova baale enadhivela ndhe onadhiveliwiye. Ninga nda dhilebiwe va Salmos 15:1-5. (Omwileri.) Akwaye a Yehova enotajhiha dhikalelo onniyena, ninga ‘odhivela, ohagalala, murenddele, ohaguvela onyanyuwa, opama, owoma murima, nroromelo, opwaaseya ni onona wiihiha.’—Gálatas 5:22, 23.

21. Enuukavihere ddi wi wande otajhiha dhikalelo dha Yehova?

²¹ Enuukavihere ddi wi wande otajhiha dhikalelo nda dha Yehova? Wafuna wi onone dhego dhinamudhivela Yehova, okanne elemelelo yoowileri ni yomuhudhera Bibliya malabwene. (Isaías 30:20, 21) Wakanna elemelelo yela, odhivela wawo ni Yehova onerege wenjhedhedheya vano kinakale ethu yorusa omwiwelela.

22. Mareliho baani onawakeliwe wasakula omwiwelela Yehova?

²² Osaddula egumi winasorihiwa vala, wiliganihiwe ni muthu onakuguula guwo dhawale nuwindo owara guwo dhixa. Bibliya onihina enofwanelela ‘okuguula emuthu yakale’ wihina ‘niware emuthu exa.’ (Colossenses 3:9, 10) Kahiyo ethu yokweya werana yego yowi ndala, mbwenye Yehova onowaroromeliha wavaha ‘yowakela enlubale’ athu yale enamwiwelela. (Salmos 19:11) Wamwiwelelaga Yehova onere woneyiha wi Saddana muliba woota. Wahimulabelege Yehova mwaha wa mareliho onupaganyihe wuvaha osogolo, mbwenye omulabelege ni murima wawo watene nuudhivela. Werana ndala onere wandana pamadhene ni Mulugu.